ዬ ማጻፋ 81 - ጋሞ ማጻፋ

ኣሳፌይ ዛማሬታ ካቦስ ሱሱልኤን ዬጺዳ ማዛሙሬ

¹ ኑስ ዎልቃ ጊዲዳ ጾሳስ ኡፋይሳን ዬጺቴ፤ ያቆቤ ጾሳስ ኢሊሊቴ!

² ማዛሙሬ ዶሚቴ፤ ካራቤ ባቂቴ፤ ዲኒኔ ማሲንቆን ሎኦ ማዛሙሬ ዬጺቴ።

³ ኣጊናይ ጼሪዛ ዎዴኔ ማን ጌሊዛ ዎዴ ባኣሌስ ዛዬ ፑኒቴ።

⁴ ሃይሲ ኢስራኤሌስ ዎጋ፤ ያቆቤ ጾሳይ ኢሚዳ ኣዛዞ።

⁵ ጊብጼ ቢታ ኢዚ ዬዲ ኬዚዳ ዎዴ ዮሴፌ ዛሬታስ ዎጋ ሂስቲ ዎዴስ፤ ታኒ ኤሮንታ ቃላራ ኢዚ ታስ፥

⁶ «ኢንቴ ሃሼፔ ቶሆ ዎዲስ፤ ኢንቴ ኩሼ ዴጾ ጎሾፔ ሼምፒሳዲስ።

⁷ ኢንቴ ሜቶ ዎዴ ታና ጼይጊዴታ፤ ሂስቲን ታኒ ኢንቴና ኣሻዲስ፤ ታኒ ሻራ ጊዶራ ዳዳን ኢንቴና ኣላዲስ፤ ማሪባ ጌቴቲዛ ፑልቶ ሃ ማታን ታኒ ኢንቴና ፓጫዲስ።

⁸ «ታ ዴሬዞ! ታኒ ኔና ሴሪዛይሳ ሲያ! ኢስራኤሌ ኣሳዉ! ኔ ታና ኤዝጋ ሲዪዳኮ ኣዜ ዲዛይ!

⁹ ኢንቴ ጊዶን ኣላጋ ጾሲ ዶፖ፤ ሃራ ጾሳስ ጎይኖፍቴ።

¹⁰ ታኒ ጎዳ ኢንቴ ጾሳ፤ ኢንቴና ጊብጼ ቢታፌ ኬሳዳ ኤሂዳይ ታና ኢንቴ ጎዳ፤ ኔ ዶና ኬሃ ሃንጋ፤ ታኒ ኔና ቱና።

¹¹ «ጊዶ ኣቲን ታ ኣሳቲ ታ ቃላ ሲዪቤቴና፤ ኢስራኤሌቲ ታስ ኩሼ ኢሚቤቴና።

¹² ሄሳ ጊሻስ ታኒ ኢስቲ ባ ዎዚና ሙሜቴ ባ ዶሶይሳ ሃናና ማላ ኣጋጋዲስ።

¹³ «ታ ዴሬይ ታና ሲዪዳኮ! ኢስራኤሌ ኣሳይ ታ ኦጌ ካሊዳኮ!

¹⁴ ታኒ ኢስታ ሞርኬታ ኢስታስ ጉልባቲሳና፤ ኢስታ ባሊጋራታካ ታ ሾጫናኮሺን።

¹⁵ ጎዳ ኢጺዛይቲ ኢዛ ሲንን ኩንዳና፤ ኢስቲ ሜርናስ ቃጻዬታና።

¹⁶ ጊዶ ኣቲን ታኒ ኢንቴና ሙሩታ ጊስቴ ሚዛና፤ ቃሴ ዛላፌ ኢንቴና ኤስ ካልሳና» ጊሺን ሲያዲስ።