ዬ ማጻፋ 77 - ጋሞ ማጻፋ

ኣሳፌይ ዛማሬታ ካቦ ኤዶታኔስ ዬጺዳ ማዛሙሬ

¹ ታኒ ታ ቃላ ቁ ሂስታዳ ጾሳኮ ዋሳይስ፤ ታና ሲያና ማላ ታ ኢዛ ዎሳይስ።

² ታኒ ሜቶቲዳ ጋላስ ጾሳ ኮያይስ፤ ኦማርሲካ ሼምፖንታ ታ ኩሼታ ኢዛኮ ሚጫይስ፤ ጊዲኮካ ታኒ ሚኔታናስ ዳንዳያቤኬ።

³ ኣቤት ጾሳዉ! ታ ኔና ቆፓሼ ጬጫይስ፤ ታ ዩሻ ቆፓሼ ኬሃ ዳቡርዴስ።

⁴ ታ ኣይፌፔ ስኮ ይሳዳሳ፤ ታስ ጋናዚ ያና ጋካናስ ጬጫዲስ።

⁵ ታኒ ኣዳ ዎዴታ ቆፓዲስ፤ ካሴ ኣዳ ላይታካ ሃሳኣዲስ።

⁶ ታ ዬጺዳይሳ ጊዶ ዩሻ ቆፓዲስ፤ ታኒ ዎዚናን ኣኬካዲስ፤ ታ ኣያናይ ታና ዴንን፥

⁷ «ጎዳይ ኑና ሜርናስ ዬጊ ኣጋኔ? ሃይሳፌ ጉዬ ኑና ሎኦ ቤሴኔ?

⁸ ኑና ሲቂዛይሳ ሙሌራ ኣጊዴ? ኢዚ ዮቲዳ ሂዶታይ ሻሬቲዴ?

⁹ ጾሲ ባ ማሪዛይሳ ኣጊዴ? ሃንቆን ባ ቃታ ኣጊዴ?» ጋ ኦይቻይስ።

¹⁰ ኡባፌ ቃ ጾሳዉ! ታና ቆሂዳይ፥ ኔ ኡሻቻ ኩሼይ ካሴይሳ ኑና ማዶንታ ኣጎይሳ።

¹¹ ጎዳዉ! ኔ ኦሶታ ታኒ ቆፓና፤ ኔኒ ቤኒ ዎዴ ኦዳ ማላሊሲዛ ኦሶታ ኡባ ታ ዩሻ ቆፓና።

¹² ኔ ኦዳ ኡባ ታኒ ዛራ ዛራዳ ቆፓና፤ ኔ ዎልቃማ ኦሶታ ኡባ ታኒ ኣኬካና።

¹³ ኣቤት ጾሳዉ! ኔ ኦጌይ ጌሻ፤ ኑ ጾሳ ማላ ሃራ ጊታ ጾሲ ኦኔ?

¹⁴ ኔኒ ማላሊሲዛዝ ኦዛ ጾሳ፤ ዴሬታ ጊዶን ኔ ዎልቃ ቤሳሳ።

¹⁵ ያቆቤኔ ዮሴፌ ዜሬ ጊዲዳ ኔ ዴሬታ ኔኒ ኔ ዎልቃን ዎዛዳሳ።

¹⁶ ኣቤት ጾሳዉ! ሃቲ ኔና ቤኢዳ፤ ሃቲ ኔና ቤኢዲ ያዪዳ፤ ጪማ ኣባቲካ ኮኮሪዳ።

¹⁷ ሻራቲ ኢራ ኢሚዳ፤ ሳሎን ዳዳይ ጉሚዴስ፤ ዎልቃን ዋዋጪ ጊዴስ።

¹⁸ ኔ ዳዳ ጉንይ ጎቴ ጫርኮ ጊዶን ኮሺሚዴስ፤ ኔ ዎልቃን ጶሌ ሳኣ ፖኢሲዴስ፤ ቢታይካ ቃጺ ኮኮሪዴስ።

¹⁹ ኔኒ ኣባ ጊዶራ ሄሜታሳ፤ ጪማ ኣባ ጊዶራ ካንሳ፤ ጊዲኮካ ኔ ቢዳ ጌዶይ ኤሬቴና።

²⁰ ሙሴኔ ኣሮኔ ኩሼን ኔኒ ኔ ዴሬዛ ዶርሳ ዉዴ ማላ ካሌዳሳ።