ዬ ማጻፋ 76 - ጋሞ ማጻፋ

ኣሳፌይ ዛማሬታ ካቦስ ዲታን ዬጺዳ ማዛሙሬ

¹ ጾሲ ዩሁዳን ኤሬቲዴስ፤ ኢዛ ሱንካ ኢስራኤሌን ጊታ።

² ኢዛ ዱንካኔይ ሳሌሜን ዴስ፤ ኢዛስ ዱሳሶይካ ጺዮኔ።

³ ኢዚ ሄሳን ዱኪዛ ዎንዳፌ ዪሻ፥ ጎንዳሌ፥ ጊ ማሻታኔ ሃራ ኦላ ሚሻታ ሜንሬ ዬጊዴስ።

⁴ ኣቤት ጾሳዉ! ኔኒ ቦንቾ ማይኣዳ ጶላሳ፤ ኔ ቴማቴ ጊታ ዙማታፔካ ኣስ።

⁵ ጎባ ኦላንቻቲ ቦንቄቲዳ፤ ኢስታፌ ኢሶይካ ባ ኩሼ ዴንና ዳንዳይቤና፤ ኢስቲ ዎልቃማ ስኮ ስኪዳ።

⁶ ኣቤት ያቆቤ ጾሳዉ! ኔ ሃንቆ ጋሶን ቶጋ ኣሳቲኔ ቶጋ ፓራቲ ኩንዲ ኣቲዳ።

⁷ ኣቤት ጾሳዉ! ኔኒ ያሻሳ! ኔ ሃንቆይ ሱሊዳ ዎዴ ኔ ሲንን ኦኔ ኤቃናይ?

⁸ ኔኒ ሳሎፔ ፒርዳ ሲሳዳሳ፤ ቢታይ ያያዳ ሲርጲ ጋዱስ።

⁹ ኣቤት ጾሳዉ! ሃይሲ ሳኣ ቦላ ኡንኤቲዳይታ ኣሻናስ ኔኒ ፒርዳስ ዴንዲን ሃንዴስ።

¹⁰ ኔኒ ኣስ ሃንቂኮካ ሄሲ ኔ ቦንቾስ ጊዴስ፤ ኦላፔ ኣቲዳይቲ ኔ ባኣሌ ቦንቻና።

¹¹ ጎዳ ኢንቴ ጾሳስ ኣዲኒቴ፤ ሄ ኣዲኔቲዳይሳካ ጋቴ፤ ኢዛ ዩሾን ዲዛ ኡባቲ ኢዛስ ያሺሲዛ ኢሞታ ኤኪ ዪቴ።

¹² ኢዚ ኦቶሬቲዛ ዳናታ ካዉሻና፤ ዎልቃማ ካዎታካ ኢዚ ያሺሳና።