ዬ ማጻፋ 73 - ጋሞ ማጻፋ

ሄን ማጻፋ ( ማዛ 73—89 ) ኣሳፌ ማዛሙሬ

¹ ዎዚና ጌሽ ጊዲዳ ኢስራኤሌ ኣሳስ ጾሲ ኣይ ማላ ኪያ!

² ጊዶ ኣቲን ታ ቶሆይ ጴቲን ታ ኩንዳይቻዳ ጉሶን ኣታዲስ።

³ ኣይስ ጊኮ ኢታ ኣሳታኔ ማካላንቻታ ዱሬቴ ቤኣዳ ታኒካ ኢስታ ማላ ሃናናስ ኣሞታዲስ።

⁴ ኢስታስ ቱጋይ ዴና፤ ኢስታ ኣሳቴይ ፓያኔ ሚኖ።

⁵ ኢስቲ ሃራ ኣሳይ ቱጋቲዛ ማላ ቱጋቴቴና፤ ሃራ ኣሳ ማላካ ሜቶቲ ኤሬቴና።

⁶ ሄሳ ጊሻስ ኢስቲ ኦቶሬቴ ኣሌቆ ማላ ቆን ኣቴስ፤ ማካላቴ ኣፋላ ማላ ማይኤቴስ።

⁷ ኢስታ ዎዚናፔ ኢታ ቆፋይ ፑልቴስ፤ ባንታ ኣይፌ ኬሲ ዴሬቄቴስ።

⁸ ኢስቲ ቂቴሲኔ ኢታ ሃሳዬቴስ፤ ኢስቲ ባንታ ኦቶሮን ሃራታ ኡንኤናዉ ማንዴቴስ።

⁹ ኢስቲ ሳሎን ዲዛ ጾሳ ባንታ ዶናን ጫዬቴስ፤ ሳኣን ዴኢዛ ኣሳ ባንታ ኢንጻርሳን ዱኬቴስ።

¹⁰ ሄሳ ጊሻስ ዴሬ ኡባይ ኢስታኮ ጎቼስ፤ ኢስቲ ዮቲዛይሳካ ኡባ ኤሶን ኣማኔቴስ።

¹¹ ኢስቲ፥ «ጾሲ ኣይ ኤሪዜ? ኡባፌ ቃ ጾሳስ ኤራቴ ዲዜ?» ጌቴስ።

¹² ሄኮ ኢታቲ ሃይሳ ሚሳቴቴስ፤ ኢስቲ ኡባቶ ዉዱ ጎንታይታ፤ ዱሬቴ ቆ ጋኪዳይታ።

¹³ ሂስቲን ታኒ ዎዚና ጌሻቴን ናጊዳይሲ ታና ኣይ ማዲዴ! ታ ኩሼ ታ ጺሎቴን ሜጪዳይሲ ጮ ታና ሊቤና።

¹⁴ ጋላስ ኩሜ ታኒ ሜቶ ቤያዲስ፤ ዎንቲን ዎንቲን ታኒ ቃጻዬታዲስ።

¹⁵ ታኒ ኢስቲ ሃሳይዛይሳ ማላ ሃሳያና ቆፒዳኮ ኔ ዴራስ ታ ኣማኔቶንታ ኣስ ጊዳና።

¹⁶ ታኒ ሃ ዮኦዛ ሻካ ኤራናስ ቆፓዲስ ጊዶ ኣቲን ታ ኤራፔ ቦላ ጊዲዴስ።

¹⁷ ሄሲካ ታኒ ጾሳ ጌሻሶሆ ጌላና ጋካናሲኔ ኢታታ ዉርሴ ቤኣና ጋካናሳ።

¹⁸ ኣዳካ ኔ ኢስታ ሃሊጺዛሶን ዎዳሳ፤ ኔኒ ኢስታ ዱጌ ባሻሶ ዬዳዳሳ።

¹⁹ ኢስቲ ሃሳኦንታ ኤሶን ይዳ፤ ዳጋማን ኢሶይካ ኣቶንታ ዲፒ ጊዳ።

²⁰ ኣቤት ጎዳዉ! ኔኒ ዴንዲዛ ዎዴ ኣሲ ስኮፌ ቤጊን ይዛ ኣጉሞ ማላ ኢስቲ ያና።

²¹ ታኒ ዪሎቲዳ ዎዴኔ ታ ዎዚናይካ ማዱንጺዳ ዎዴ፥

²² ታኒ ቆፋይ ባይንዳ ዳማዲስ፤ ታኒ ኔ ሲንን ሚዛ ማላ ጊዳዲስ።

²³ ጊዶ ኣቲን ታኒ ኡባቶካ ኔናራ ዳይስ፤ ታ ኡሻቻ ኩሼዛካ ኔኒ ኦይካዳሳ።

²⁴ ኔ ዞሬን ታና ካሌዳሳ፤ ሄሳፌ ጉዬ ኔኒ ታና ቦንቾስ ኤፋና።

²⁵ ሳሎን ኔፔ ኣቲን ታስ ሃራይ ኦኒ ዲዜ? ሳኣንካ ኔፔ ሃራ ኦናካ ኮይኬ።

²⁶ ታ ዎልቃይኔ ታ ዎዚናይ ዳቡራናስ ዳንዳዬስ፤ ጊዶ ኣቲን ጾሲ ታ ዎዚናስ ሚኖቴኔ ታስ ሜርና ቃዳ።

²⁷ ኔፔ ሃኪዛይቲ ያና፤ ኔስ ኣማኔቶንታይታ ኡባ ኔኒ ይሳና።

²⁸ ጊዶ ኣቲን ታስ ጾሳኮ ሺቆይ ሎኦ፤ ኔ ኦሶ ኡባ ዮታና ማላ። ታኒ ኡባ ሃሪዛ ጎዳ ታ ባቃታ ኣቲዛሶ ኦዲስ።