ዬ ማጻፋ 66 - ጋሞ ማጻፋ

ዛማሬታ ካቦስ ዬጼቲዳ ማዛሙሬ

¹ ሳኣን ዲዛ ኣስ ኡባይ ኢንቴ ቃላ ቂሲዲ ኢሊሊሳን ጾሳ ጋላቲቴ።

² «ጾሳ ሱን ቦንቼቶ!» ጊዲ ዬጺቴ፤ ቦንቾ ጋላታ ኢዛስ ኢሚቴ።

³ ጾሳስ፥ «ኔ ኦሶቲ ኣይ ኬና ማላሊሲዞ! ኔ ዎልቃይ ዳሮ ጊዲዳ ጊሻስ ኔ ሞርኬቲ ያሻን ኔ ሲንን ኮኮሬቴስ።

⁴ ሳኣን ዲዛ ኡባይ ኔስ ጎይኔስ፤ ኔና ሳቤስ፤ ኔ ሱንስ ጋላታ ማዛሙሬ ዬጼስ» ጊቴ።

⁵ ሃ ዪቴ፤ ጾሲ ኦዳዝ ቤኢቴ፤ ኢዚ ኣሳ ጊዶን ማላሊሲዛ ኦሶ ኦዴስ።

⁶ ኢዚ ኣባ ሃ ሻኪዴስ፤ ቃሴ ቤኒ ኑ ኣዋቲ ሻፋራ ሜላ ቢታራ ቶሆን ፒኒዳ፤ ኑኒካ ኢዚ ኦዳ ኦሶን ኡፋዬቲዶስ።

⁷ ኢዚ ባ ዎልቃን ሜርናስ ሃሬስ። ካዎቴታ ኡባካ ባ ኣይፌን ጼሌስ፤ ሄሳ ጊሻስ ማካሊዛይቲ ኢዛ ቦላ ቁ ቁ ጎፔቶ።

⁸ ኣሳዉ! ኑ ጾሳ ጋላቲቴ፤ ኢንቴ ጋላታ ጬንጉርሳይ ሲዬቶ።

⁹ ኢዚ ኑና ሼምፖራ ፓጻ ዎዴስ፤ ኑኒ ኩንዶንታ ማላካ ናጊዴስ።

¹⁰ ኣቤት ጾሳዉ! ኔኒ ኑና ፓጫ ጼላዳሳ፤ ቢራ ሴሪሲ ጌሺዛ ማላ ኑና ጌሻዳሳ።

¹¹ ኔኒ ኑና ዎጺማዴን ጌልዳሳ፤ ኑ ዞኮንካ ዴጾ ባኦ ባኢሳዳሳ።

¹² ኑ ሞርኬቲ ኑና ሁኤራ ዱጌ ዬና ማላ ኦዳሳ፤ ኑኒ ሃ ጊዶራኔ ታማ ጊዶራ ካንዶስ፤ ጊዶ ኣቲን ሃኢ ኑና ኢሻሎ ሶሆ ኤሃዳሳ።

¹³ ታኒ ጹጌቲዛ ያርሾራ ኔ ጌሻሶሆ ጌላዳ ታ ኣዲና ኔስ ጋና።

¹⁴ ታኒ ሜቶቲዳ ዎዴ ታ ዶናፔ ታ ኬሲዳይሳ ታ ኢንጻርሳን ታ ኣዲኔቲዳ ኣዲና ታ ጋና።

¹⁵ ታኒ ኔስ ጹጌቲዛ ያርሾስ ሞታ ሺሻና፤ ሳዎ ያርሾስ ርሾታ፥ ኮርማታኔ ኮርቤታ ሺሻና።

¹⁶ ኢንቴኖ ጾሳስ ያዪዛይቶ! ኡባቲ ሃ ዪዲ ሲዪቴ፤ ጾሲ ታስ ኦዳይሳ ታኒ ኢንቴስ ዮታና።

¹⁷ ታ ቃላ ቁ ሂስታዳ ታኒ ኢዛኮ ዋሳዲስ፤ ታ ኢንጻርሳንካ ኢዛስ ጋላታ ሺሻዲስ።

¹⁸ ታኒ ታ ዎዚናን ናጋራ ጌንዳኮ፥ ጎዳይ ታ ዎሳ ሲዬና።

¹⁹ ጊዶ ኣቲን ጾሲ ቱማፔ ታስ ሲዪዴስ፤ ታ ዎሳካ ኤዝጊዴስ።

²⁰ ታ ዎሳ ካንታ፥ ባ ሜርና ሲቆ ታፔ ሃሶንታ ጾሳይ ጋላቴቶ።