ዬ ማጻፋ 64 - ጋሞ ማጻፋ

ዳዊቲ ዛማሬታ ካቦስ ዬጺዳ ማዛሙሬ

¹ ኣቤት ጾሳዉ! ታ ማጋና ኔኒ ሲያ፤ ታ ሼምፖዮ ዎናስ ማንዲዛ ታ ሞርኬታፔ ታና ኣሻ።

² ፓላ ኣሳታ ማቆፌኔ ማካላንቻታ ዱላታፔ ታና ጌን።

³ ኢስቲ ባንታ ኢንጻርሳ ማሻ ማላ ሌፊዳ፤ ቃሴ ማርዜ ቃላታ ዎንዳፌ ዪሻ ማላ ዱካናስ ጊግሲዳ።

⁴ ኢስቲ ቆቴቲዲ ባንታ ዎንዳፌን ጺሎ ኣስ ዱኬቴስ፤ ኣሲ ኣኬኮንታ ዲሺን ዱካናስ ጉዬ ጌቴና።

⁵ ኢስቲ ኢታ ኦናስ ኢሶይ ኢሳራ ማቄቴቴስ፤ ጌማራ ዎጺማዴ ዎናስ ዞሬቴቴስ፤ ኢስቲ፥ «ኑና ኦኒ ቤኣኔ?» ጌቴስ።

⁶ ኢስቲ ጌኔ ማቄቲሼ፥ «ኑኒ ሎኦ ማቆ ማቄቲዶስ» ጌቴስ፤ ሄሲካ ኣሳ ዎዚናይኔ ካሃይ ኢታን ኩሚዳይሳ ቤሴስ።

⁷ ጊዶ ኣቲን ጾሳይ ኢስታ ባ ዪሻን ዱካና፤ ኢስቲ ኣኬኮንታ ማዱንና።

⁸ ኢዚ ኢስቲ ሃሳይዳ ቃላ ኢስታ ቦላ ዛራና፤ ኢስታካ ባሻን ጋና፤ ኢስታ ቤኢዳ ኡባይ ኣሙሲዲ ሁኤ ቃና።

⁹ ሄ ዎዴ ኣሳይ ኡባይ ጾሳስ ያያና፤ ጾሳ ኦሶ ቆንጬን ዮታና፤ ኢዚ ኦዳይሳካ ዩሺ ቆፓና።

¹⁰ ጺሎቲ ጎዳን ኡፋዬቴቶ፤ ኢዛካ ባስ ባቃቲ ኣቲዛሶ ኦቶ፤ ዎዚና ሱሬቲ ኡባይ ኢዛ ጋላቴቶ።