ዬ ማጻፋ 63 - ጋሞ ማጻፋ

ዩሁዳ ባዞን ዲዛ ዎዴ ዳዊቴ ማዛሙሬ

¹ ኣቤት ጾሳዉ! ኔኒ ታ ጾሳ፤ ታ ኔና ዎዚናፔ ኮያይስ፤ ታ ኣሾይካ ኔና ኣሞቴስ። ሃ ባይንዳ ሜላ ቢታይ ሃ ኮይዛ ማላ ታ ኣሳቴይ ኔና ሳሜቴስ።

² ታኒ ኔና ጌሻሶሆን ጼላዲስ፤ ኔ ዎልቃኔ ኔ ቦንቾ ታኒ ቤኣዲስ።

³ ኔ ሜርና ሲቆይ ዴኦፔ ሎኤስ፤ ታ ኢንጻርሳይ ኔና ጋላቴስ።

⁴ ታ ዴኦ ላይንካ ታኒ ኔና ጋላታና፤ ኔ ሱንን ታ ኩሼ ፑዴ ኔኮ ዴንና።

⁵ ኣሲ ሎኦ ካ ሚ ካሊዲ ኡፋዬቲዛ ማላ ታ ሼምፖያ ኔናን ኡፋዬታና፤ ታኒ ታ ኢንጻርሳን ኡፋይሳ ዬን ኔና ጋላታና።

⁶ ታኒ ታ ሂጻን ዳሼ ኔና ሃሳኣይስ፤ ኦማርስ ኩሜ ኔ ኦሶ ዩሻ ቆፓይስ፤

⁷ ኔኒ ታና ማዲዛ ጊሻስ ታኒ ኔ ቄፌ ኩዋን ኡታዳ ኡፋይሳን ዬጻይስ።

⁸ ታ ሼምፖያ ሺጵ ጋ ካላዱስ፤ ኔ ኡሻቻ ኩሼይካ ታና ሚን ኦይኪዴስ።

⁹ ጊዶ ኣቲን ታና ዎና ኮይዛይቲ ቢታ ጋርሳን ጪማ ኦላን ሞጌታና።

¹⁰ ኢስቲ ማሻስ ኣ ኢሜታና፤ ኢስቲ ጎዳሬ ካዎ ጊዳና።

¹¹ ጊዶ ኣቲን ካዎይ ጾሳን ኡፋዬታና፤ ጾሳ ሱንን ጫቂዛ ኡባይ ኢዛ ጋላታና፤ ዎርዶ ሃሳይዛይታ ዶናይ ጊዲኮ ጎርዴታና።