ዬ ማጻፋ 60 - ጋሞ ማጻፋ

¹ ኣቤት ጾሳዉ! ኔኒ ኑና ኣጋዳሳ፤ ኑና ሜንሬ ዬጋዳሳ፤ ኔኒ ኑና ሃንቄታዳሳ፤ ሃኢ ጊዲኮ ሲማዳ ኑና ጊጊሳ።

² ኔኒ ቢታዮ ቃዳ ዛኢሳዳሳ፤ ኢዛ ኮኮሪዛ ጊሻስ ኔኒ ኢዚ ዛኣ ኩን።

³ ኔኒ ኔ ኣሳ ሜቶ ቤሳዳሳ፤ ኔኒ ኑና ማሲዛ ዎይኔ ኡሹ ኡሻዳሳ።

⁴ ኔስ ያዪዛይቲ ባንታ ሞርኬታ ዎንዳፌፔ ኣታና ማላ ማላታ ኢማዳሳ።

⁵ ኔኒ ሲቂዛይቲ ኣታና ማላ ኔ ዎልቃን ኑና ኣሻ፤ ኔኒ ኑኮ ኣላ።

⁶ ጾሲ ባ ኬን ዲሼ፥ «ታኒ ጾናዳ ሴኬሜ ቢታ ሻካና፤ ቃሴ ሱኮቴ ሾባ ጊሻና።

⁷ ጋላኣዴይኔ ሚናሴይ ታይታ፤ ኤፍሬሜይ ታስ ሁኤ ቆቤ፤ ዩሁዳይ ታስ ካዎቴ ጉፌ።

⁸ ሞኣቤይ ታ ሜጬቲዛሶ፤ ኤዶሜይ ታስ ጫማ ዎዛሶ፤ ታኒ ፊሊስጼሜ ጾናዳ ጌሬራና» ጊዴስ።

⁹ ጊምቤቲዳ ካታማኮ ታና ኦኔ ኤፋናይ? ኤዶሜ ጋካናስ ታና ኦኔ ካሌናይ?

¹⁰ ኣቤት ጾሳዉ! ኑና ኣጊዳይ ኔና ጊዲኪ? «ኔኒ ኑ ቶራንቻታራ ኦላስ ኬዚኬ» ጋዳሳ።

¹¹ ኣሳፔ ጊዲዳ ማዶይ ሃዳ፤ ሄሳ ጊሻስ ኑ ሞርኬታ ቦላ ኑስ ጾኖ ኢማ።

¹² ጾሳ ዎልቃን ኑ ሞርኬታ ኑኒ ጾናና፤ ኢዚ ኑ ሞርኬታ ዬታና።