ዬ ማጻፋ 59 - ጋሞ ማጻፋ

ሳኦሊ ዳዊቴ ዎናስ ኪቲዳ ኣሳቲ ኢዛ ኬ ዶዲ ኡቲዳ ዎዴ ዳዊቲ ዛማሬታ ካቦስ፥ «ይሶፋ» ጌቴቲዛ ዲ ጊጊሶን ሺሺዳ ዎሳ ማዛሙሬ

¹ ኣቤት ታ ጾሳዉ! ታ ሞርኬታፔ ታና ኣሻ፤ ታ ቦላ ዴንዲዛይታፔ ታና ናጋ።

² ኢታ ኦዛይታፔ ታና ማዳ፤ ሱ ጉሲዛ ኣሳታፔ ታና ኣሻ።

³ ኣቤት ጎዳዉ! ኢስቲ ታና ዎናዉ ዛማዲዲ ናጊዛይሳ ቤኣ! ሜንጼ ኢታ ኣሳቲ ታኒ ሞሮኔ ናጋራ ኦንታ ዲሺን ታ ቦላ ዱላቴቴስ።

⁴ ኣይኮ ሞሮ ታ ኦንታ ዲሺን ታና ይሳናስ ጊጌቲዳ፤ ሃይሳ ኔኒ ቤኣዳ ታና ማዳና ዴንዳ።

⁵ ኣቤት ጎዳዉ! ኡባፌ ዎልቃማ ጾሳዉ! ኔኒ ኢስራኤሌ ጾሳ፤ ካዎቴታ ኡባ ቃጻያናስ ኔ ቤጋ፤ ማካላ ኦዛይታ ማሮፓ።

⁶ ኢስቲ ካና ማላ ሆስካቲሼ ካታማ ጊዶን ዩዪ ፔኢዲ ኦማርስ ሲማና።

⁷ ኢስታ ዶናፔ ኬዚዛይሳ ሲዪቴ! ኢስታ ኢንጻርሳይ ማሻ ማላ፤ ኢስቲ፥ «ኦኔ ኑና ሲያናይ?» ጊ ቆፔቴስ።

⁸ ጊዶ ኣቲን ኣቤት ጎዳዉ! ኔኒ ኢስታ ቦላ ሚጫሳ፤ ካዎቴታ ኡባ ካሳ።

⁹ ታ ጾሳዉ! ኔ ታስ ሚጻ ጊዲዳ ጊሻስ ታ ኔናን ኣማኔታይስ።

¹⁰ ታ ጾሳይ ባ ሜርና ሲቆን ታናራ ጋይታና፤ ታ ሞርኬታ ኩንዴ ኢዚ ታና ቤሳና።

¹¹ ኣቤት ኑስ ጎንዳሌ ጊዲዳ ጎዳዉ! ታ ኣሳይ ኔኒ ሃሎ ኬሲዛይሳ ባሎንታ ማላ ኔኒ ኢስታ ዎ ይሶፋ፤ ጊዶ ኣቲን ኔ ዎልቃን ኢስታ ላላኔ ካዉሻ።

¹² ኢስቲ ባንታ ዶናፔ ኬሲዛ ናጋራ ጊሻስ፥ ባንታ ኢንጻርሳ ቃላ ጊሻስ፥ ኢስቲ ቃንጊዳ ቃንጌ ጊሻሲኔ ዎርዶቲዛ ጊሻስ ባንታ ኦቶሬቴን ኦይኬቴቶ።

¹³ ኔ ሃንቆን ኢስታ ይሳ፤ ኢስታ ሙሌራ ዲፒ ሂስታ፤ ሄ ዎዴ ጾሲ ያቆቤ ዜሬ ኣይሲዛዴኔ ሳኣ ጋጻ ጋካናስ ዲዛ ዴራ ሃሪዛዴ ጊዲዳይሳ ኣሲ ኡባይ ኤራና።

¹⁴ ኢስቲ ካና ማላ ሆስካቲሼ ካታማ ጊዶን ዩዪ ፔኢዲ ኦማርስ ሲማና።

¹⁵ ኢስቲ ሚዛ ሚሽ ሃሲሼ ዩዬቴስ፤ ካሎንታ ኣጊኮ ካና ማላ ላዌቴስ።

¹⁶ ጊዶ ኣቲን ታኒ ኔ ዎልቃ ሳባና፤ ማላዶ ማላዶ ኔ ሜርና ሲቆ ጊሻስ ዬጻና። ኔኒ ታስ ሜቶ ጋላስ ዜምፖኔ ባቃታ ኣቲዛ ሚጻ።

¹⁷ ኣቤት ጾሳዉ! ታ ዎልቃይ ኔና፤ ኔ ታስ ሚጻ፤ ኔ ሜርና ሲቆን ታና ሲቃሳ፤ ሄሳ ጊሻስ ጋላታ ዬን ታ ኔና ሳባና።