ዬ ማጻፋ 56 - ጋሞ ማጻፋ

ፊሊስጼሜ ኣሳይ ጌቴ ካታማን ዳዊቴ ኦይኪዳ ዎዴ ዳዊቲ ዛማሬታ ካቦስ ዬጺዳ ዬ፤ «ሃሆሶን ዲዛ ዎላ ቦላ ኡቲዳ ሃራጴዮ» ጌቴቲዛ ዲ ጊጊሶን ሺቂዳ ዎሳ

¹ ኣቤት ጾሳዉ! ኣሳይ ታና ኡንኤስ፤ ታ ሞርኬቲ ታና ኡባ ዎዴ ዬዴቴስ፤ ሄሳ ጊሻስ ኔ ታስ ቃታ።

² ታ ሞርኬቲ ኡባ ጋላስ ታና ዬዴቴስ፤ ዳሮቲ ኦቶሬቴን ታና ኦሌቴስ።

³ ታና ባቢሲዛ ዎዴ ታ ኔናን ኣማኔታይስ።

⁴ ታኒ ጾሳን ኣማኔቲዛ ጊሻስ ባቢኬ፤ ኢዚ ኢሚዳ ሂዶታ ቃላ ጊሻሲካ ኢዛ ጋላታይስ፤ ታ ጾሳን ኣማኔታይስ፤ ኣሲ ታና ኣይ ኦኔ?

⁵ ኡባ ጋላስ ታ ሞርኬቲ ታፔ ሞሮ ዴማናስ ዎጼቴስ፤ ኢስቲ ኡባ ዎዴ ታና ቆሃናስ ዞሬቴቴስ።

⁶ ሺቂዲ ታ ቦላ ማቄቴቴስ፤ ዛማዲ ኡቲዲ ታና ካሌቴቴሲኔ ታ ጌዶን ኤቄቴቴስ፤ ታና ዎናስካ ኮዬቴስ።

⁷ ጾሶ! ኢስታ ኢታቴ ጊሻስ ኢስታ ዬዶፋ፤ ሄ ካዎቴታ ኔ ሃንቆን ካዉሻ።

⁸ ኔኒ ታ ዬሆ ቤያዳሳ፤ ታ ኣፉን ማካዳሳ፤ ኡባቲካ ኔ ማዝጋባን ጻፌቲዳ።

⁹ ታኒ ኔና ጼይጊዛ ዎዴ ታ ሞርኬቲ ጉዬ ሲሜቴስ፤ ጾሲ ታናራ ዲዛይሳ ታኒ ሄሳን ኤራይስ።

¹⁰ ታ ኢዛ ቃላ ጋላቲዛ ጾሳን፥ ታ ኢዛ ቃላ ሳቢዛ ጎዳን፥

¹¹ ታኒ ሄ ጾሳን ኣማኔቲዛ ጊሻስ ባቢኬ፤ ኣሲ ታና ኣይ ኦኔ?

¹² ኣቤት ጾሳዉ! ታኒ ኔስ ኣዲና ኣዲኔታዲስ፤ ታ ኣዲኔቶይሳ ጋላታ ያርሾ ኔስ ጋና።

¹³ ኔኒ ታ ሼምፖዮ ሃይቆፔ ታ ቶሆታ ጴፔ ኣሻዳሳ። ሄሳ ጊሻስ ኢዚ ሼምፖራ ፓጻ ዲዛይታስ ፖኢሲዛ ፖኦን ጾሳ ሲንን ታ ሲሜሬታና።