ዬ ማጻፋ 52 - ጋሞ ማጻፋ

ኤዶሜ ቢታ ኣስ ዶይቄይ ሳኦሌኮ ቢዲ፥ «ዳዊቲ ኣቢሜሌኬ ሶ ቢዴስ» ጊዲ ዮቲ ሲሚን ዳዊቲ ዛማሬታ ካቦስ ሃሳኣን ሺሺዳ ጊንጾ

¹ ሃይሶ ዎልቃማዞ! ጾሲ ኔና ካቺዴስ፤ ኔ ኣይስ ኢታ ኦሶን ናሼታይ? ኣይስ ኡባ ጋላስ ጬቄታይ?

² ኔኖ ባሌን ኩሚዳ ጌናንቻዉ! ሃራታ ይሳና ቃጻሳ! ኔ ኢንጻርሳይካ ቃራ ማጋላ ማላ።

³ ኔኒ ሎኦ ኣጋዳ ኢታ ሲቃሳ፤ ቱማ ሃሳያናፔ ዎርዶ ሃሳያ ዶሳሳ።

⁴ ኔኖ ባሌን ኩሚዳ ዎርዳንቻዞ! ኔኒ ኣስ ማዱንዛ ቃላ ሲቃሳ።

⁵ ጊዶ ኣቲን ጾሲ ኔና ሜርናስ ይሳና፤ ኢዚ ኔና ኔ ኬፌ ቡጪ ኬሳና፤ ፓጻ ዲዛይታ ጊዶፌካ ቃሊ ዲጋና።

⁶ ጺሎቲ ሃይሳ ቤኢዲ ያያና፤ ኢስቲ ኢዛ ቦላ ሂዝጊ ሚጫና፤

⁷ «ጾሳ ባስ ዜምፖ ኦንታዴ፥ ባ ዱሬቴ ዳሮን ኣማኔቲዛዴ ባ ኢታ ኦሶን ሚኒዛዴ ሃይሳ ቤኢቴ!» ጋና።

⁸ ጊዶ ኣቲን ኣጪዛ ዎጋራ ሚ ማላ ታኒ ጾሳ ኬን ኣጫይስ፤ ኢዛ ሜርና ሲቆን ታኒ ሜሪ ሜርናስ ኣማኔታይስ።

⁹ ኔኒ ኦዳ ኡባስ ታኒ ኔና ሜርናስ ጋላታይስ፤ ኔ ሎኦ ጊዲዳ ጊሻስ ታ ኔ ሱንን ሂዶታ ኦይስ፤ ታኒ ጾሳ ዴራ ሲንን ኔ ኪያቴ ሳባና።