ዬ ማጻፋ 50 - ጋሞ ማጻፋ

ኣሳፌ ማዛሙሬ

¹ ዎልቃማ ጎዳይ፥ ጾሳይ ሃሳዬስ፤ ኣርሼይ ሞኪዛሶፔ ዉሊዛሶ ጋካናስ ሳኣን ዲዛ ኣሳ ጼይጌስ።

² ሙሌራ ሎኦ ጊዲዳ ጺዮኒፔ ጾሲ ፖኢሴስ።

³ ኑ ጾሲ ያና፤ ኢዚ ጮኡ ጌና። ሚዛ ታማይ ኢዛ ሲንና፤ ዎልቃማ ጎቴይ ኢዛ ዩሾና።

⁴ ጾሲ ባ ኣሳ ፒርዳናስ ሳሎኔ ሳኣ ጼይጌስ።

⁵ «ታናራ ያርሾን ጫቄቲዳ ጌሻታ ታኮ ሺሺቴ» ጌስ።

⁶ ጾሲ ባርካ ፒርዲዛ ጾሳ ጊዲዳ ጊሻስ ሳሎቲ ኢዛ ጺሎቴ ኣዋጄቴስ።

⁷ «ታ ኣሳዞ ኔ ሲያ! ታኒ ኔስ ዮታይስ፤ ኢስራኤሌ ኣሳዉ! ታኒ ኔ ቦላ ማርካታይስ። ታኒ ጾሳይ ኔ ጾሳ።

⁸ ኔ ያርሾ ጊሻሲኔ ኔኒ ኡባቶ ሺሺዛ ጹጌቲዛ ያርሾ ጊሻስ ታኒ ኔና ቦሪኬ።

⁹ ሄሳ ማላካ ኔ ዲርሳፌ ኮርማታ፥ ዎይኮ ኔ ጻርጳፌ ዴይሻታ ኤካናዉ ኮይኬ።

¹⁰ ዎራን ዲዛ ዶኣ ኡባቲ ታሳ፤ ሺ ዙማታ ቦላን ዲዛ ሜሄቲካ ታይታ።

¹¹ ታኒ ዙማታ ቦላ ዲዛ ካፎታ ኡባ ኤራይስ፤ ዴምባን ዲዛ ሜቴቲ ኡባይ ታይታ።

¹² ሳሎ ጉፋንን ዲዛ ኡባይ ታሳ፤ ሄሳ ጊሻስ ታ ጋፊኮካ ኔስ ዮቲኬ።

¹³ ታኒ ኮርማታ ኣሾ ሚኬ፤ ዎይኮ ዴይሻታ ሱ ኡዪኬ።

¹⁴ ጾሳስ ጋላታ ያርሾ ሺሻ፤ ኔ ኣዲና ኡባፌ ቃ ጾሳስ ጋ።

¹⁵ ሜቶ ጋላስ ኔ ታና ጼይጋ፤ ታ ኔና ኣሻና፤ ኔካ ታና ቦንቻና» ጌስ።

¹⁶ ጊዶ ኣቲን ጾሲ ናጋራንቻስ፥ «ታ ዎጋ ኔኒ ዛራ ዛራዳ ቢዳናስ ዎይኮ ታ ጫቆ ቃላ ኔ ዮታናስ ኔስ ኣይ ማታይ ዲዜ?

¹⁷ ኔ ታ ሴራ ኢጻሳ፤ ታ ቃላታካ ካሳ።

¹⁸ ኔኒ ካይሶ ቤኢዳ ዎዴ ኢዛራ ዳቦታዳሳ፤ ላይማቲዛይታ ማባራንካ ዙፔታሳ።

¹⁹ ኔኒ ኔ ዶና ኢታ ሃሳያናስ ዶያዳሳ፤ ኔ ሃሳይዛ ሃሳያይ ዎርዶ ጻላ።

²⁰ ኣሶን ኣሶን ኔ ኢሻ ዚጊራሳ፤ ኔ ኣዪ ና ሱንካ ሞራሳ።

²¹ ኔኒ ሃይሳ ኡባ ኦዛ ዎዴ ታኒ ጮኡ ጋዲስ፤ ሄሳ ጊሻስ ኔኒ ታና ኔ ማላ ጋዳ ቆፓዳሳ፤ ጊዶ ኣቲን ሃኢ ታኒ ኔና ዋላሳይስ፤ ቃሴካ ታ ኔና ቆንጬን ሴራይስ።

²² «ኢንቴኖ ጾሳ ዶጊዛይቶ! ሃይሳ ኣኬኪቴ፤ ኢንቴ ኢጺስ ጊኮ ታኒ ኢንቴና ሜንሬና፤ ሄ ዎዴ ኢንቴና ኦኒካ ኣሼና።

²³ ታስ ጋላታ ኢሚዛ ኣሲ ታና ቦንቼስ። ሱሬ ኦጌራ ቢዛ ኣስ ታኒ ኣቶቴ ቤሳና» ጌስ።