ዬ ማጻፋ 49 - ጋሞ ማጻፋ

ቆሬ ናይቲ ዛማሬታ ካቦስ ዬጺዳ ማዛሙሬ

¹ ዴሬዞ፥ ኢንቴ ኡባቲካ ሃይሳ ሲዪቴ! ኢንቴኖ ሳኣ ቦላ ዲዛ ኡባቶ! ሃይሳ ኤዝጊቴ።

² ቃይኔ ዚቃይ፥ ዱሬይኔ ማንቆይካ ሲዪቴ።

³ ታ ዎዚና ቆፋይ ኣኬካ ኢሜስ፤ ታ ዶናይ ኣ ኤራቴ ቃላ ሃሳዬስ፤

⁴ ታኒ ታ ሃይ ሌሚሶታኮ ዛራና፤ ኢስታ ቢርሼካ ታ ዲን ቆንጪሳና።

⁵ ሜቶ ጋላሲ ዪዛ ዎዴኔ ኢታቴን ታና ላቢዛይቲ ዶዲ ኡቲኮ ታ ኣይስ ባቦ?

⁶ ባ ኣቆታን ኣማኔቲዛይታሲኔ ባ ዱሬቴ ዳሮን ጬቄቲዛይታስ ታ ኣይስ ባቦ?

⁷ ኣሲ ባርካ ባና ዎዜና፤ ዎይኮ ባ ሼምፖ ጊሻስ ጾሳስ ዋጋ ቃንጻናስ ዳንዳዬና።

⁸ ኣሳ ሼምፖ ዋጋይ ኬሂፔ ኣልኦ፤ ሼምፖ ዱዛ ዋጋይ ሙሌካ ዴና።

⁹ ኣይ ዋጋ ቃንጺንካ ኢዚ ሜርናስ ዴኣና ማላ፥ ዎይኮ ኢዚ ሃይቆንታ ማላ ኦናዉ ዳንዳዬና።

¹⁰ ኤያቲኔ ዳማቲ ሃይቂዛ ማላ ኣ ኤራንቻቲካ ሃይቃና፤ ኡባይካ ባ ኣቆታ ሃራስ ዬጊ ባና፤ ሄሳ ኡባይካ ቤኣና።

¹¹ ዳሮ ጋዴ ኢስቲ ባ ሱንን ሃሪኮካ ኢስታስ ሜርና ኬይ ዱፎ፤ ኢዚካ ኢስታስ ዬሌታፔ ዬሌታ ጋካናዉ ዱሳሶ ጊዳና።

¹² ኣሲ ኣይ ዱሬቲኮካ ባ ዱሬቴራ ካንና፤ ኢዚ ዶኣ ማላ ሃይቃና።

¹³ ባናን ኣማኔቲዛ ኤያታ ቃዳይኔ ኢስታ ቃላ ካሊዛይታ ዉርሴ ሳማይ ሃይሳ።

¹⁴ ሹካስ ቆሬቲዳ ዶርሳታ ማላ ኢስቲ ዱፎስ ዶሬቲዳ፤ ሃይቆይ ኢስታ ሄንንቻ ጊዳና፤ ኢስቲ ባንታ ያሊሶ ኬፌ ሃኪዲ ዱፎን ሙሳና። ሱሬ ኣሳቲ ማላዶራ ኢስታ ዱፎ ቦላራ ሲሜሬታና።

¹⁵ ጊዶ ኣቲን ጾሲ ታ ሼምፖ ዎዛና፤ ኢዚ ታና ሃይቆ ዎልቃፌ ኣሺ ኤካና።

¹⁶ ኣሲ ዱሬቲዛ ዎዴኔ ኢዛ ኣቆታይ ዳሪ ዳሪ ቢዛ ዎዴ ኢዛዴስ ያዮፋ።

¹⁷ ጋሶይካ ኢዚ ሃይቂሼ ኣይኮካ ኤኪ ቤና፤ ኢዛ ኣቆታይ ኢዛራ ኢሲፌ ዱፎን ጌሌና።

¹⁸ ኣሲ ፓጻ ዲዛ ዎዴን፥ «ታስ ኩሚዴስ» ጊኮካ፥ ኡባይ ኢዛስ ጊጊዳ ጊሻስ ጋላቴቲኮካ፥

¹⁹ ሲሚዲ ሙሌካ ፖኦ ቤኦንታሶ ባ ኣዋታ ማባራን ጋይቴስ።

²⁰ ኣሲ ኤራቴ ባይንዳ ኣይ ዱሬቲኮካ ኢዚ ዶኣ ማላ ሃይቃና።