ዬ ማጻፋ 45 - ጋሞ ማጻፋ

ጪሻታ ጊጊሶ ጌቴቲዛ ዬን ቆሬ ናይቲ ዛማሬታ ካቦስ ዬጺዳ ማዛሙሬ

¹ ታ ዎዚናፔ ሎኦ ቆፋይ ፑልቴስ፤ ታ ጊግሲዳ ጊንጾዛ ካዎዛ ሲሳና፤ ታ ኢንጻርሳይካ ኤራንቻ ጻፌ ቢኢሬ ማላ።

² ኣሳ ኡባፌ ኔኒ ኬሃ ሎኣሳ፤ ኔ ፑላን ኩሚዳ ቃላ ሃሳያሳ፤ ሄሳ ጊሻስ ጾሲ ኔና ሜርናስ ኣንጂዴስ።

³ ዎልቃማ ካዎ! ኔ ማሻ ጊጻ፤ ቦንቾኔ ቴማ ማይኣ።

⁴ ቱማቴስ፥ ኣሽኬቴሲኔ ጺሎቴስ ኔ ቴማቴ ማይኣዳ ኦላ ጾናናስ ሲን ሆርዶፋ፤ ኔ ኡሻቻ ኩሼይ ማላሊሲዛ ሚሽ ቤሶ።

⁵ ኔ ዪሻቲ ቃራታ፤ ኢስቲ ካዎ ሞርኬታ ዎዚና ኣይፌን ጫዳና፤ ካዎቴቲ ጾኔቲዲ ኔ ቶሆ ጋርሳን ኩንዳና።

⁶ ኣቤት ጾሳዉ! ኔ ካዎቴ ኣልጋይ ሜርናስ ዳና፤ ኔ ካዎቴ ጉፌይካ ሱሬቴ ጉፌ።

⁷ ኔኒ ጺሎቴ ዶሳሳ፤ ማካላቴ ኢጻሳ። ሄሳ ጊሻስ ጾሳይ፥ ኔ ጾሳይ ኔ ላጌታፔካ ኣዲ ኔና ኡፋይሳ ዛይቴን ቲይዴስ።

⁸ ካርቤፌ፥ ጎዳሬ ኡፌኔ ቡርጉዴፔ ኦሴቲዳ ሺቶን ኔ ማይኦይ ጫጫፌቲዲ ሳዎ ቱኑ ጌስ፤ ዳንጋርሳ ዛሌን ኣሌቄቲዳ ኔ ካዎቴ ኬን ዲጼቲዛ ዲይኔ ማሲንቆይ ኔና ኡፋይሴስ።

⁹ ካዎቴ ኬን ዲዛ ማጫሳታ ጊዶን ካዎታ ማጫ ናይቲ ዴቴስ፤ ጎዳቴያ ጌሻ ዎርቃን ኣሌቄታዳ ኔፔ ኡሻቻ ባጋን ኤቃዱስ።

¹⁰ ታ ናዬ፥ ኤዝጋ ሲያ፤ ኔ ሃይ ሃ ዬጋ። ኔ ዴራኔ ኔ ኣዋ ኬ ዶጋ።

¹¹ ኔ ሜ ሎኦይ ካዎ ዎዚና ኤኪዴስ፤ ኢዚ ኔስ ጎዳ ጊዲዳ ጊሻስ ኔ ኢዛ ቦንቻ።

¹² ጺሮሴ ኣሳይ ኢዚስ ኢሞታ ኤኪ ያና፤ ዱሬቲ ኔና ኣዳሻና።

¹³ ካዋ ናያ ካዎ ኬ ጊዶን ኣይ ማላ ሎኣዜ! ኢዚ ማይኦይካ ዎርቃን ኣሌቂዴስ።

¹⁴ ባ ኣሌቆ ማይኦዛ ማይኣዳ ካዎዛኮ ባዉስ፤ ኢዚ ላጌ ጊዲዳ ጌላኦቲ ኢዞ ኣዣቢ ኢዛስ ኤኪ ዪዳ።

¹⁵ ኢስቲ ኡፋዬቲሼኔ ሆምቦጪሼ ዪዲ ካዎዛ ኬ ጌሌቴስ።

¹⁶ ካዎ! ኔ ናይቲ ኔ ኣዋታ ሶሆ ላታና፤ ኔኒ ኢስታ ቢታ ኡባ ቦላን ሹማና።

¹⁷ ታኒ ኔ ሱን ዬሌታ ኡባን ሃሳኤታና ማላ ኦና። ሄሳ ጊሻስ ኣሳይ ሜርናስ ኔና ሳባና።