ዬ ማጻፋ 44 - ጋሞ ማጻፋ

ዛማሬታ ካቦስ ቆሬ ናይቲ ሃሳኣን ሺሺዳ ጊንጾ

¹ ኣቤት ጾሳዉ! ቤኒ ኣዳ ዎዴ ኔ ኦዳ ጊታ ሚሻ ኑኒ ሲዪዶስ፤ ኑ ኣዋታ ዎዴካ ኔ ኦዳይሳ ኢስቲ ኑስ ዮቲዳ።

² ካዎቴታ ኔኒ ኔ ኩሼን ጎዳ ኬሳዳሳ፤ ኑ ኣዋታ ኢስታ ቢታን ቶካዳሳ፤ ዴራ ሊቂሳዳሳ፤ ጊዶ ኣቲን ኔ ካዎቴታ ኣሳዳሳ።

³ ኢስቲ ባንታ ማሻን ኦሊዲ ሄ ቢታ ኦይኪቤቴና፤ ኢስቲ ጾኒዳይ ባ ቄሴ ሚኖቴን ጊዴና። ጊዶ ኣቲን ኔኒ ኢስታን ኡፋዬቲዳ ጊሻስ ኔ ኡሻቻ ኩሼይ፥ ኔ ቄሴይኔ ኔ ሲን ፖኦ ዎልቃይ ሄሳ ኦዴስ።

⁴ ታ ጾሳዉ ታ ካዎይ ኔና፤ ያቆቤ ዜሬስ ጾኖ ኢሚዳይ ጾሶ ኔና።

⁵ ኔናን ጊዲዲ ኑ ሞርኬታ ኑ ኦሊ ጾናና፤ ኔ ሱንን ኑናራ ኤቄቲዛይታ ኑኒ ዬና።

⁶ ታኒ ታ ቶራን ኣማኔቲኬ፤ ታ ጊ ማሻይካ ታና ኣሼና።

⁷ ጊዶ ኣቲን ኔኒ ኑና ኑ ሞርኬታፔ ኣሻሳ፤ ቃሴ ኑና ኢጺዛይታ ኔኒ ካዉሻሳ።

⁸ ኑኒ ኡባ ዎዴ ጾሳን ጬቄቶስ፤ ኔ ሱንካ ሜርናስ ሳቦስ።

⁹ ሃኢ ጊዲኮ ኔ ኑና ኣጋዳሳ፤ ቃሴካ ካዉሻዳሳ፤ ኔኒ ኑ ኦላንቻታራ ኢሲፌ ኬዚዛይሳ ኣጋዳሳ።

¹⁰ ኑ ሞርኬታ ሲንፌ ኑና ባቃቲሳዳሳ፤ ኑናራ ኤቄቲዛይቲ ኑ ኣቆታ ቦንቂዳ።

¹¹ ኔኒ ኑና ዶርሳታ ማላ ሹካስ ኣ ኢማዳሳ፤ ቃሴ ካዎቴታ ጊዶን ኑና ላላዳሳ።

¹² ኔኒ ኔ ኣሳ ሂራይሶን ባይዛዳሳ፤ ጊዶ ኣቲን ዎ ዴማቤካ።

¹³ ኔኒ ኑና ኑ ሾሮታስ ጫሻስ፥ ቃሴ ኑ ሄራን ዲዛይታስ ቂሲኔ ሚቻስ ኬሳዳሳ።

¹⁴ ኔኒ ኑና ካዎቴታ ጊዶን ሃይሲኤስ ኬሳዳሳ፤ ኢስቲ ባንታ ሁኤ ኑ ቦላ ቃ ቃ ቂና ማላ ኦዳሳ።

¹⁵ ታ ኡባ ዎዴ ካዉያዲስ፤ ታ ሲን ዬላ ማይኢዴስ።

¹⁶ ሄ ኡባይ ታና ጋኪዳይ ታ ሞርኬቲ ታ ቦላ ሃሎ ኬሲሺን ሃራቲ ካዲ ሚጪዳ ጊሻሳ።

¹⁷ ኑኒ ኔና ዶጎንታ ዲሺን ዎይኮ ኔ ጫቆ ቃላ ፓጪንቾንታ ዲሺን ሃይሲ ኡባይ ኑ ቦላን ጋኪዴስ።

¹⁸ ኑ ዎዚናይ ኔፔ ጉዬ ኡንዱዲቤና፤ ኑ ቶሆይ ኔ ኦጌፔ ጋጻ ኬዚቤና።

¹⁹ ጊዶ ኣቲን ኔኒ ኑና ሜንሬዳ ዶኣ ኦጌን ዬጋዳሳ፤ ጊርዲ ጊዳ ማንካ ኦላዳሳ።

²⁰ ኑ ጾሳ ሱን ኑኒ ባሊዳ ጊዲኮ ኑ ኩሼካ ኤቃ ጾሳታ ዎሳናስ ሚጪዳኮ፥

²¹ ሃይሳ ኤሮይ ጾስ ጾናኔ? ኢዚ ዎዚናን ጌሚ ዲዛ ጹራ ኡባ ኤሬስ

²² ጊዶ ኣቲን ኡባ ጋላስ ኔ ጊሻስ ሃይቆስ ኣ ኢሜቲዶስ፤ ሹካስ ኤፊዛ ዶርሳታ ማላካ ቆዴቲዶስ።

²³ ኣቤት ጎዳዉ ቤጋ! ኣይስ ስካይ? ዴንዳ! ሜርናስ ኑና ኣጎፋ።

²⁴ ኔ ሲን ኑፔ ኣይስ ጌንይ? ኑ ቆሄቴኔ ኑ ኡንኤቴ ኣይስ ዶጋይ?

²⁵ ኑኒ ዱጌ ጉዱላን ዬጌቲዶስ፤ ቢታ ቦላካ ፖርጩ ጊዶስ።

²⁶ ኣቤት ጎዳዉ፥ ኑና ማዳናስ ዴንዳ! ኔ ሜርና ሲቆን ኑና ዎዛ።