ዬ ማጻፋ 42 - ጋሞ ማጻፋ

ናምኣን ማጻፋ ( ማዛ 42—72 ) ዛማሬታ ካቦስ ቆሬ ናይቲ ሃሳኣን ሺሺዳ ጊንጾ

¹ ዉሻይ ፑልቶ ሃ ላሞቲዛ ማላ፥ ኣቤት ጾሳዉ፥ ታኒካ ኔና ላሞታይስ።

² «ታ ሼምፖያ ታኒ ባዳ ጾሳ ሲን ቤያናይ ኣዉዴሻ?» ጋዳ ጾሳ፥ ዴኦ ጾሳ ሳሜታዱስ።

³ ኣሳይ ኡባቶ፥ «ኔ ጾሲ ኣዋን ዲዜ?» ጊዛ ዎዴ ታስ ጋላሲኔ ኦማርስ ኣፉን ቁማ ጊዲዴስ።

⁴ ታ ዎዚናያ ጬጬን ጊዶራ ሴራሼ ሃይታንታ ኣኬካዱስ፤ ዳሮ ዎዴ ታ ጾሳ ኬ ካሌሼ ኢሊሊሳኒኔ ጋላታ ዬን ባኣሌ ቦንቻና ሺቂዳ ዳሮ ኣሳ ጊዶራ ታ ዋና ቢዛኮ ኣሙሳዲስ።

⁵ ታኒ ኣይስ ሂዶታ ቃንጻዚና? ቃሴ ኣይስ ጬጫዚና? ታኒ ጾሳን ኣማኔታይስ፤ ታና ኣሺዛ ታ ጾሳ ታ ቡሮ ጋላታና።

⁶ ታ ጾሳዉ! ታ ዎዚናያ ጬጫዱስ፤ ሄሳ ጊሻስ ታኒ ዮርዳኖሴ ቢታን ሄርሞኔ ዙምቡላ ሚዛሬ ዙማ ቦላ ኤቃዳ ኔና ታ ቆፓና።

⁷ ኔ ፒሳ ጉንን ጪማይ ጪማስ ኣንኬስ፤ ቃሴ ኔ ዳምባላይኔ ኔ ጫርኮ ኡባይ ታ ቦላራ ኣዴስ።

⁸ ጎዳይ ባ ሜርና ሲቆ ጋላስ ታስ ኪቴስ። ታኒካ ኦማርስ ኢዛስ ጋላታ ማዛሙሬ ሺሻይስ፤ ሄሲካ ታ ዴኦ ጾሳስ ሺሺዛ ዎሳ።

⁹ ታ ጾሳዉ ታስ ዛላዉ! «ኔ ታና ኣይስ ዶጋዲ? ታ ሞርኬቲ ታና ቆሂሺን ታ ጬጫሼ ኣይስ ዴኦ?» ጋይስ።

¹⁰ ታ ሞርኬቲ ታና ኡባ ዎዴ፥ «ኔ ጾሳይ ኣዋን ዲዜ?» ጊዲ ዮኦን ታና ጫዴቴስ፤ ሜቄካ ሜን ጫዬቴስ።

¹¹ ታኒ ኣይስ ሂዶታ ቃንጻዚና? ቃሴ ኣይስ ጬጫዚና? ታኒ ጾሳን ኣማኔታይስ፤ ታና ኣሺዛ ታ ጾሳ ታ ቡሮ ጋላታና።