ዬ ማጻፋ 4 - ጋሞ ማጻፋ

ዳዊቲ ዛማሬታ ካቦስ ኦስፑን ሻያን ዋጼቲዳ ዲን ዬጺዳ ማዛሙሬ

¹ ኣቤት ታ ጺሎ ጾሳዉ! ታኒ ጼይጊዛ ዎዴ ኔ ታስ ኮያ። ታኒ ኡንኤቲዳ ዎዴ፥ ኔኒ ታና ሼምፒሳዳሳ፤ ታስ ቃታዳ ታ ዎሳ ሲያ።

² ኢንቴኖ ኣሳቶ! ኢንቴ ኣዉዴ ጋካናስ ታ ቦንቾ ካዉሻኔ? ኢንቴ ኣዉዴ ጋካናስ ሃዳ ሚሽ ሲቃኔ? ኢንቴ ኣዉዴ ጋካናስ ዎርዶ ሚሽ ካላኔ?

³ ጎዳይ ጺሎ ኣሳታ ባስ ሻኪ ዱማ ዎዳይሳ ኢንቴ ኤሪቴ፤ ሄሳ ጊሻስ ታኒ ጎዳ ጼይጊዛ ዎዴ ኢዚ ታስ ሲዬስ።

⁴ ሃንቄቲቴ፤ ጊዶ ኣቲን ኢንቴ ሃንቆን ናጋራ ኦፍቴ። ሂጻን ኢቺ ዲዛ ዎዴ ሲርጲ ጊዲ ኢንቴ ዎዚና ቆሪቴ።

⁵ ጎዳስ ቤሲዛ ያርሾ ያርሺቴ፤ ጎዳንካ ጾሳንካ ኣማኔቲቴ።

⁶ ዳሮቲ፥ «ኑና ሎኦ ቤሳናይ ኦኔ?» ጌቴስ፤ ኣቤት ጎዳዉ! ኔ ሎኦ ኣይፌሶይ ኑ ቦላ ፖኦ።

⁷ ካኔ ዎይኔ ኡሹ ዳሮ ዴሚዲ ሃራቲ ኡፋዬቲዛይሳፌ ኣዳ ኔኒ ታ ዎዚና ኡፋይሳን ኩንዳሳ።

⁸ ኣቤት ጎዳዉ! ኔ ጻላ ታና ሳሮን ናጋ ኣይሲዛ ጊሻስ ታኒ ኢቻዳ ሳሮቴን ስካይስ።