ዬ ማጻፋ 37 - ጋሞ ማጻፋዳዊቴ ዬ 1 ኢታ ኦዛይታ ቤኣዳ ዪሎቶፓ፤ ናጋራ ኦዛይታ ቃናቶፓ። 2 ኣይስ ጊኮ ኢስቲ ማታ ማላ ኤሶን ሜላና፤ ቦንጮ ማላ ኢስቲ ሹሊዲ ቆካና። 3 ኔኒ ጎዳን ኣማኔታ፤ ሎኦ ኦሶካ ኦ፤ ሂስቲኮ ኔኒ ቢታ ቦላ ፓላሂን ዳና። 4 ጎዳን ኡፋዬታ፤ ኢዚ ኔስ ኔ ዎዚና ኣሞ ኢማና። 5 ኔ ኦጌ ጎዳስ ሃዳራ ኢማ፤ ኢዛን ኣማኔታ፤ ኢዚካ ኔስ ኦና። 6 ኢዚ ኔ ጺሎቴ ማላዶ ጻልቄ ማላ ኬሳና፤ ኔ ዮኦዛ ፒርዳካ ሴታ ጋላሳ ኣዋ ማላ ፖኢሳና። 7 ጎዳ ሲንን ጮኡ ጋዳ ኢዚ ኦና ጋካናስ ዳንዳያን ናጋ፤ ኢታ ኣሳቲ ዱሬቲኮኔ ኢስታ ቆፋይ ፖሌቲኮ ኔ ኢስታ ቦላ ዪሎቶፓ። 8 ሃንቆ ኣጋ፤ ዪሎፌ ባቃታ። ዪሎቶፓ፤ ኣይስ ጊኮ ሄሲ ኣስ ሜቶን ዬጌስ። 9 ኢታ ኦዛይቲ ቃሌቲ ያና፤ ጊዶ ኣቲን ጎዳን ሂዶታ ኦዛይቲ ቢታ ላታና። 10 ኢታ ኦዛይቲ ጉ ዎዴፔ ጉዬ ዴኤቴና፤ ኔኒ ኢስታ ኮዪዳኮካ ኢስቲ ቤቴቴና። 11 ጊዶ ኣቲን ኣሽኬቲ ቢታ ላታና፤ ኢስቲ ጊታ ሳሮቴን ኡፋዬቲ ዳና። 12 ኢታ ኣሳቲ ጺሎታ ቦላ ማቄቴቴሲኔ ባ ኣች ጋርጬቴስ። 13 ጊዶ ኣቲን ጎዳይ ኢታታ ቦላን ሚጬስ፤ ኣይስ ጊኮ ኢስቲ ያና ጋላሳይ ጋኪዳይሳ ኢዚ ኤሬስ። 14 ኢታ ኣሳቲ ሂዬሳታኔ ሜቶታንቻታ ይሳናዉ፥ ሱሬቴን ሄሜቲዛይታ ዎናዉ ባንታ ማሻ ሾዴቴሲኔ ባንታ ዎንዳፌዛ ዳፌቴስ። 15 ጊዶ ኣቲን ኢስታ ማሻይ ኢስታስ ዎዚና ኣይፌን ጌላና፤ ኢስታ ዎንዳፌይካ ሜቃና። 16 ጺሎስ ዴኢዛ ጉይ ኢታ ኣሳታስ ዲዛ ዳሮ ኣቆታፔ ኣስ። 17 ኣይስ ጊኮ ኢታታ ዎልቃይ ሜቃና፤ ጺሎታ ጊዲኮ ጎዳይ ሚንስ። 18 ጎዳይ ሱሬ ኣሳታ ኡባ ጋላስ ናጌስ፤ ኢስታ ላታይካ ሜርናስ ኢስታስ ጊዳና። 19 ኢታ ዎዴን ሱሬ ኣሳቲ ዬላቴቴና፤ ኮሻ ላይ ኢስቲ ካሊ ማና። 20 ኢታ ኣሳቲ ጊዲኮ ሃይቃና፤ ጎዳ ሞርኬቲ ባዞ ጪሻ ማላ ቆካና፤ ጩዋ ማላካ ጮ ያና። 21 ኢታ ኣሲ ታልኢ ኤኪዲ ዛሪ ኤሬና፤ ጊዶ ኣቲን ጺሎ ኣሲ ቃቲዲ ጌዴ ኢሜስ። 22 ጎዳን ኣንጄቲዳይቲ ቢታ ላታና፤ ጊዶ ኣቲን ኢዚ ቃንጊዳይቲ ጮ ያና። 23 ኣሳ ኦጌይ ጎዳ ኡፋይሲኮ ጎዳይ ኢዛዴ ታንጎ ካሌሲኔ ሚንስ። 24 ኢዚ ጴቲኮካ ኩንዶንታ ማላ ጎዳይ ባ ኩሼን ኦይኪ ኣሼስ። 25 ታኒ ካሴ ዬላጋ ሺን ሃኢ ጪማዲስ፤ ጊዶ ኣቲን ጺሎ ኣሲ ጮ ዬጌቲ ኣቲሺን፥ ዎይኮ ኢዛ ዜሬ ካ ዎሲ ሚሺን ታኒ ሙሌካ ቤኣ ኤሪኬ። 26 ኢዚ ኡባ ዎዴካ ኪያቴ ኢሜስ፤ ዲቺ ባይንዳ ታልኤስ፤ ኢዛ ዛሬቲካ ኣንጆስ ጊዳና። 27 ኢታፔ ሃካ፤ ሎኦ ሚሽ ኦ። ሂስቲኮ ኔ ኣዱሳ ላይ ዴኣና። 28 ኣይስ ጊኮ ጎዳይ ጺሎቴ ዶሴስ። ጾሳይ ባስ ኣማኔቲዳ ኣሳታ ዬጌና፤ ኢዚ ኢስታ ሜርናስካ ናጋና። ጊዶ ኣቲን ኢታታ ዜሬቲ ማና። 29 ጺሎቲ ቢታዮ ላታና፤ ኢዚን ሜርናስ ዴኣና። 30 ጺሎ ኣሳ ዶናይ ኣ ኤራቴ ዮቴስ፤ ኢዛ ኢንጻርሲካ ጺሎ ሃሳዬስ። 31 ኢዛ ጾሳ ዎጋይ ኢዛ ዎዚናን ዴስ፤ ኢዛ ቶሆይካ ሃርቼና። 32 ኢታ ኣሲ ጺሎ ኣስ ኢታ ኣይፌን ጼሌሲኔ ዎናዉካ ኮዪ ካሌስ። 33 ጊዶ ኣቲን ጎዳይ ጺሎ ኣስ ኢዛ ኩሼን ዬጌና፤ ፒርዳስ ኤቂዛ ዎዴካ ኢዛ ኣ ኢሜና። 34 ጎዳ ሂዶታ ኦ፤ ኢዛ ኣዛዞካ ናጋ፤ ኢዚ ኔና ቢታ ላቲሳና፤ ዛሪዲካ ቦንቻና፤ ኢታ ኣሳቲ ሚ ይሺን ኔ ቤያና። 35 ታኒ ኢሲ ሜንጼ ኢታ ኣሲ ዎላ ማላ ዳዪዳይሳ ቤያዲስ። 36 ጊዶ ኣቲን ታኒ ሄ ሶሆራ ሲማዳ ካንዛ ዎዴ ኢዚ ይዴስ፤ ታ ኮዪንካ ኢዚ ቤቲቤና። 37 ኣኔ ሎኦ ኣስ ኣኬካ፤ ሱሬ ኣስ ቤኣ፤ ሳሮ ኣሳስ ዉርሴ ሎኦ ጊዳና። 38 ጊዶ ኣቲን ናጋራንቻቲ ሙሌራ ያና፤ ኢስቲ ዉርሴን ማና። 39 ጺሎታስ ኣቶቴ ጎዳፔ ዬስ፤ ሜቶ ዎዴ ኢዚ ኢስታስ ጌሚዛሶ። 40 ጺሎቲ ጎዳ ጉዬ ኣዳ፤ ሄሳ ጊሻስ ኢዚ ኢስታ ማዴሲኔ ኣሼስ፤ ኢታታ ኩሼፔካ ዎ ኤኬስ። |
The Word for the World International amp The Word for the World Ethiopia