ዬ ማጻፋ 34 - ጋሞ ማጻፋ

ካዎ ኣቢሜሌኬ ሲንፌ ኣቲ ቢዳ ዎዴ ዳዊቲ ዬጺዳ ማዛሙሬ

¹ ታኒ ጎዳ ኡባ ዎዴ ጋላታና፤ ኢዛ ጋላታይ ኣይ ዎዴንካ ታ ዶናፔ ፓጬና።

² ታኒ ጎዳን ጬቄታይስ፤ ናቄቲዳይቲ ሄሳ ሲዪዲ ኡፋዬቴቶ።

³ ኣኔ ታናራ ኢሲፌ ጎዳ ቦንቾስ፤ ኢዛ ሱንካ ቁ ቁ ኦስ።

⁴ ታኒ ጎዳ ኮያዲስ፤ ኢዚካ ታስ ዛሪዴስ፤ ታኒ ያዪዛ ሚሽ ኡባፌ ታና ኣሺዴስ።

⁵ ኢዛኮ ጼሊዛ ኡባ ሲንይ ፖኤስ፤ ኢስቲ ሙሌካ ዬላቴቴና።

⁶ ሃ ሂዬሳይ ዋሲዴስ፤ ጎዳይ ኢዛ ዋሶዛ ሲዪዴስ፤ ሜቶ ኡባፌ ኢዛ ኣሺዴስ።

⁷ ጎዳ ኪታንቻይ ጎዳስ ያዪዛይታ ናጌስ፤ ኢዚ ኢስታ ዩሾዛን ጊዲዲ ኢስታ ኣሼስ።

⁸ ጎዳይ ኪያ ጊዲዳይሳ ዩሺ ቆፒቴ፤ ኢዛኮ ሺቂዳይ ኣንጄቲዳዴ።

⁹ ኢንቴኖ ጌሻ ኣሳቶ! ጎዳስ ያዪቴ፤ ኣይስ ጊኮ ኢዛስ ያዪዛ ኡባታስ ኣይኮይካ ፓጬና።

¹⁰ ጋሞቲ ሚዛዚ ዪን ኮሻቴቴስ፤ ጎዳ ኮይዛይታስ ጊዲኮ ሎኦ ሚሺ ኣይኮካ ፓጬና።

¹¹ ናይቶ! ሃ ዪቴ፤ ታ ጊዛዝ ሲዪቴ፤ ታኒ ኢንቴና ጎዳስ ያሻቴ ታማርሳና።

¹² ኣዱሳ ላይ ዳናስ ዶሲዛይኔ ሎኦ ሚሽ ቤያናስ ኮይዛይ ኦኔ?

¹³ ኔ ኢንጻርሳ ኢታ ሃሳዮንታ ማላ ናጋ፤ ኔ ዶናፔ ዎርዶይ ኬዞንታ ማላ ናጌታ።

¹⁴ ኢታፔ ሻኬታ፤ ሎኦ ሚሽ ኦ፤ ሳሮቴ ኮያዳ ካላ።

¹⁵ ጎዳ ኣይፌይ ጺሎታኮ ጼሌስ፤ ቃሴ ኢዛ ሃይ ኢስታ ዎሳ ኤዝጌስ።

¹⁶ ኢስታ ሃሳኢሲዛ ሚሽ ቢታፌ ይሳና ማላ፥ ጎዳይ ኢታ ኦዛይታ ባ ሃንቆ ኣይፌን ጼሌስ።

¹⁷ ጺሎቲ ዋሴቴስ፤ ጎዳይ ኢስታ ዋሶ ሲዬስ፤ ኢዚካ ኢስታ ሜቶ ኡባፌ ኣሼስ።

¹⁸ ጎዳይ ዎዚናይ ሜቂዳይታስ ማታን ዴስ፤ ቃሴ ሂዶታ ቃንጺዳይታካ ኣሼስ።

¹⁹ ጺሎ ኣስ ጋኪዛ ሜቶይ ዳሮ፤ ጊዶ ኣቲን ጎዳይ ኢዛ ሄ ኡባፌ ኣሼስ።

²⁰ ጎዳይ ኢዛ ሚን ናጌስ፤ ኢዛ ሜቄታፔ ኢሶይካ ሜቄና።

²¹ ኢታታ ኢስታ ኢታቴ ዎና፤ ጺሎታ ኢጺዛይቲ ፒርዴታና።

²² ጎዳይ ባ ኦሳንቻታ ኣሼስ፤ ኢዛኮ ባቃቲዳ ኦኒኔ ፒርዴቴና።