ዬ ማጻፋ 33 - ጋሞ ማጻፋ

¹ ኢንቴኖ ጺሎቶ! ጎዳን ኡፋዬቲቴ፤ ሱሬ ኣሳቲ ኡፋይሳን ኢሊሊቴ።

² ማሲንቆ ሾጪሼ ጎዳ ጋላቲቴ፤ ታሙ ሻያን ዋጼቲዳ ዲን ኢዛስ ዬጺቴ።

³ ኦራ ማዛሙሬ ኢዛስ ዬጺቴ፤ ዲ ጊግሲ ሾጪቴ፤ ኡፋይሳን ኢሊሊ ጊቴ።

⁴ ጎዳ ቃላይ ቱማ፤ ኢዚ ኦዛ ኦሶ ኡባይ ኣማኔቲዛይሳ።

⁵ ጎዳይ ጺሎቴኔ ቱማ ፒርዳ ዶሴስ፤ ኢዛ ኪያቴ ሳኣ ኩሚዴስ።

⁶ ሳሎቲ ጎዳ ቃላን ሜቲዳ። ኢዛ ዶናፔ ኬዚዛ ፔኖን ሳሎን ዲዛ ሜቴቲ ሜቲዳ።

⁷ ጊታ ኣባ ሃ ኢዚ ኢሲሶን ሺሺዴስ፤ ጪማ ሃ ሚንጃሶን ኤሊሲዴስ።

⁸ ሳኣን ዲዛ ኣሲ ኡባይ ጎዳስ ያዮ፤ ሳሎ ጉፋንይ ጎዳ ቦንቾ።

⁹ ኣይስ ጊኮ ኢዚ ሃሳዪን ሃንዴስ፤ ኢዚ ኣዛዚን ሚኒዲ ኤቂዴስ።

¹⁰ ጎዳይ ካዎቴታ ሃልቾ ላላና፤ ኢስታ ቆፋካ ሃዳ ኦና።

¹¹ ጎዳ ሃልቾይ ሜርናስ ኤቂ ዳና፤ ኢዛ ዎዚና ቆፋይካ ዬሌታፔ ዬሌታ ጋካናዉ ዳና።

¹² ጾሲ ኢዛስ ጎዳ ጊዲዳ ካዎቴይ፥ ኢዚ ባስ ዶሪዳ ዴሬይ ኣንጄቲዳ ዴሬ።

¹³ ጎዳይ ሳሎን ኡቲዲ ዱጌ ጼሌስ፤ ኣሳ ኡባካ ቤኤስ።

¹⁴ ጎዳይ ባ ኣራታን ኡቲዲ ሳኣን ዴኢዛ ኡባ ጼሌስ።

¹⁵ ኢዚ ኡባ ዎዚና ሜዴስ፤ ኢስቲ ኦዛ ሚሽ ኡባ ኤሬስ።

¹⁶ ካዎይ ባ ዎታዳራ ጮራቴን ኣቴና፤ ኦላንቻይ ባ ዎልቃ ሚኖቴን ኬሲ ኤኬና።

¹⁷ ታኒ ፓራን ጾናና ጊ ናጎይ ሃዳ፤ ኢዚ ባ ዎልቃ ሚኖቴን ኦናካ ኣሻናዉ ዳንዳዬና።

¹⁸ ጎዳ ኣይፌቲ ኢዛስ ያዪዛይታኔ ኢዛ ሜርና ሲቆ ሂዶታ ኦዛ ኣሳታ ጼሌስ።

¹⁹ ኢዚ ሄሳን ኢስታ ሃይቆፔ ኣሼስ፤ ኮሻ ዎዴካ ኢስታ ሼምፖራ ፓጻ ዎስ።

²⁰ ኑ ሼምፖያ ጎዳ ሂዶታ ኦዉስ፤ ኢዚ ኑስ ማዶኔ ጎንዳሌ።

²¹ ኑኒ ጌሽ ጊዲዳ ኢዛ ሱንን ኣማኔቶስ፤ ኑ ዎዚናይካ ኢዛን ኡፋዬቴስ።

²² ኣቤት ጎዳዉ! ኑኒ ኔናን ሂዶታ ኦዛይሳ ማላ ሜርና ኔ ሲቆይ ኑናራ ጊዶ።