ዬ ማጻፋ 30 - ጋሞ ማጻፋ

ኬ ኣንጂሶስ ዬጼቲዳ ዳዊቴ ማዛሙሬ

¹ ኣቤት ጎዳዉ! ኔኒ ታና ጪማፌ ኬሳዳሳ፤ ታ ሞርኬቲ ታ ቦላ ኡፋዬቶንታ ማላ ኦዳሳ፤ ሄሳስ ታ ኔና ቁ ቁ ሂስታይስ።

² ኣቤት ታ ጎዳዉ! ኔኒ ታና ማዳና ማላ ታ ኔኮ ዋሳዲስ፤ ኔካ ታና ፓዳሳ።

³ ኣቤት ጎዳዉ! ታና ዱፎን ቦንታ ማላ ናጋዳሳ፤ ዱጌ ጪማ ኦላን ጌሎንታ ማላ ኔኒ ታና ኣሻዳሳ።

⁴ ኢንቴኖ ጾሳ ኣሳቶ! ጎዳስ ዬጺቴ፤ ኢዛ ጌሻ ሱንካ ሳቢቴ።

⁵ ኢዛ ሃንቆይ ጉ ዎዴሳ፥ ጊዶ ኣቲን ኢዛ ኪያቴ ዴኦ ላይ ኡባሳ፤ ኦማርስ ዬኪሼ ኣቂኮካ ማላዶ ዛዋይ ባይንዳ ኡፋይስ ጊዴስ።

⁶ ታኒ ዎፓን ዲዛ ዎዴ፥ «ታኒ ሙሌካ ኮኮሪኬ» ጋዲስ።

⁷ ኣቤት ጎዳዉ! ኔኒ ታስ ኪዪዳ ዎዴ፥ ታና ጊታ ዙማ ማላ ሚን ኤሳዳሳ፤ ጊዶ ኣቲን ኔኒ ኔ ሲን ታፔ ሃራሶ ዛሪዳ ዎዴ ታኒ ዳጋማዲስ።

⁸ ኣቤት ጎዳዉ! ታኒ ኔና ጼይጋዲስ፤ ታኒ ጎዳፔ ማሮቴ ዎሳዲስ፤

⁹ «ታ ሃይቂኮ ዎይኮ ዱፎን ጌሊኮ ኔ ታፔ ኣይ ዴማኔ? ቢታን ጌሊዳ ኣሲ ኔና ጋላቲ ኤሪዜ? ኔ ኣማኔቴ ሃሳዪ ኤሪዜ?

¹⁰ ኣቤት ጎዳዉ! ታ ዎሳ ኔ ሲያ፤ ታስ ቃታ። ኣቤት ጎዳዉ! ኔ ታስ ማዶ ጊዳ» ጋዲስ።

¹¹ ታ ዬሆ ዬን ላማዳሳ። ካዮ ማይኦዛ ታፔ ቃራዳ ኡፋይሳ ማይኦ ታና ማይዛዳሳ።

¹² ሄሳ ጊሻስ ታኒ ኔና ሳባናፔ ኣቲን ጮኡ ጊኬ። ኣቤት ታ ጎዳዉ! ታኒ ኔና ሜርናስ ጋላታና።