ዬ ማጻፋ 28 - ጋሞ ማጻፋ

ዳዊቴ ማዛሙሬ

¹ ኣቤት ጎዳዉ! ታ ዛላዉ! ታኒ ኔና ጼይጊሺን ታስ ሲሲ ኢጾፋ፤ ታ ዋሲሺን ኔ ጮኡ ጊኮ ታኒ ዱፎን ጌሊዛ ኣሳታ ማላ ጊዳና።

² ታ ኩሼዛ ኔ ጌሻ ኣቆሶ ሚጫዳ ዎሲሺኔ ታና ማዳርኪ ጋዳ ታ ዋሲሺን ኔ ሲያ።

³ ባ ዎዚናን ኢታ ቆፒሼ ባ ላጌታራ ሳሮቴ ሃሳይዛ ኢታ ኦዛይታራ ታና ኢስታራ ጋ ኤፎፓ።

⁴ ኔ ኢስታስ ኢስታ ኢታቴ ማላኔ ኢስታ ኦሶ ማላ ኢማ፤ ኢስታስ ኢስታ ኩሼ ኦሶ ማላ ዛራ፤ ኢስቲ ኦዳ ኢታ ኦሶዛስ ሃሎ ኬሳ።

⁵ ኢስቲ ጎዳ ኦሶስ ዉዱ ጎንታ ኢጺዳ ጊሻስ፥ ኢዛ ኩሼ ኦሶታስ ሶሆ ኢሞንታ ኣጊዳ ጊሻስ፥ ኢዚ ኢስታ ላላና፤ ዛሪዲካ ኬጼና።

⁶ ታ ዎሳ ሲዪዳ ጊሻስ፥ ጎዳይ ጋላቴቶ።

⁷ ጎዳይ ታስ ዎልቃኔ ጎንዳሌ፤ ታ ዎዚናይ ኢዛን ኣማኔቴስ፤ ሄሳን ታኒ ማዴታዲስ፤ ሄሳ ጊሻስ ታ ዎዚናይ ኢዛን ኡፋዬቴስ፤ ታኒ ኢዛ ዬን ሳባና።

⁸ ጎዳይ ባ ዴራስ ዎልቃ፤ ኢዚ ባ ቲይዳ ካዎዛ ኣሺዛ ሚጻ።

⁹ ጎዳዉ! ኔ ዴራ ኣሻ፤ ኔስ ጊዲዛይታ ኣንጃ፤ ኢስታ ሄንንቻይ ኔና ጊዳ፤ ኔኒ ኢስታ ሜርናስካ ቶካ።