ዬ ማጻፋ 27 - ጋሞ ማጻፋ

ዳዊቴ ማዛሙሬ

¹ ጎዳይ ታስ ፖኦኔ ታና ኣሺዛይሳ፤ ሂስቲን ታኒ ኦናስ ያያኔ? ጎዳይ ታ ሼምፖይስ ኣቲዛ ሚጻ፤ ሂስቲን ታኒ ኦናስ ባባኔ?

² ኢታ ኣሳቲ፥ ታ ሞርኬቲኔ ታ ባልጋራቲ ታና ዎናዉ ታኮ ሆርዶፊ ዪዛ ዎዴ፥ ኢስቲ ባስ ጴቲዲ ኩንዳና።

³ ሞርኬ ቶራይ ታና ዶዲዛኮካ ታ ዎዚናይ ያዬና፤ ኦላይ ታ ቦላ ዎራጂዳኮካ፥ ታኒ ጎዳን ኣማኔታይስ።

⁴ ታኒ ጎዳ ኢሲ ሚሽ ኦይቻይስ፤ ሄሲካ ታኒ ታ ዴኦ ላይ ኡባን ጎዳ ኬን ዴኣናሳ፤ ታኒ ጎዳ ቦንቾ ሎኦቴ ቤኣናሳ፤ ኢዛ ኬንካ ኢዛ ኮያሼ ዴኣናሳ።

⁵ ሄሳ ጊሻስ ሜቶ ጋላስ ኢዚ ታና ባ ዲዛሶን ጌንና፤ ባ ዱንካኔን ታና ቆቲ ኣሻና፤ ቃ ዛላ ቦላካ ኢዚ ታና ኤሳና።

⁶ ሄ ዎዴ ታና ዶዲዳ ታ ሞርኬታፔ ቦላራ ቁ ቁ ጋና፤ ታኒ ኢዛ ዱንካኔዛ ሲንን ኡፋይሳ ያርሾ ያርሻና፤ ታኒ ጎዳስ ዲጻናኔ ዬጻና።

⁷ ኣቤት ጎዳዉ! ታኒ ኔና ጼይጊዛ ዎዴ ኔኒ ታስ ኮያ፤ ታስ ቃታ፤ ታና ሲያ።

⁸ ኔኒ፥ «ታ ሲን ኮዪቴ» ጊዳ ዎዴ፥ ታ ዎዚናይ፥ «ኣቤት ጎዳዉ! ኤኖ፤ ታኒ ኔ ሲን ኮያና» ጊዴስ።

⁹ ኣቤት ታና ኣሺዛ ታ ጾሳዉ! ኔኒ ታና ማዲዛዴ፤ ኔ ሲን ታፔ ጌንፋ፤ ታና ኔ ኣይሌ ሃንቄታዳ ኔፔ ሃሶፋ። ታና ኦሎፓኔ ኣጎፋ።

¹⁰ ታ ኣዋይኔ ታ ኣያ ታና ኣጊኮካ ጎዳይ ታና ሺሺ ኤካና።

¹¹ ኣቤት ጎዳዉ! ኔ ኦጌ ታና ታማርሳ፤ ታ ሞርኬታ ጊሻስ ታና ሱሬ ኦጌራ ካሌ።

¹² ዎርዶ ማርካቲ ታ ቦላ ማካላቴን ዴንዲዳ፤ ሄሳ ጊሻስ ኔ ታና ኢስታ ኢታ ኣሞስ ኣ ኢሞፋ።

¹³ ታኒ ሼምፖራ ፓጻ ዳሼ ጎዳ ኪያቴ ቤያናይሳ ሂዶታ ኦይስ።

¹⁴ ጎዳን ኣማኔታ፤ ሚና፥ ሂዶታ ቃንጾፋ፥ ጎዳን ኣማኔታ።