ዬ ማጻፋ 21 - ጋሞ ማጻፋ

ዳዊቲ ዛማሬታ ካቦስ ዬጺዳ ማዛሙሬ

¹ ኣቤት ጎዳዉ! ካዎይ ኔ ኢሚዳ ዎልቃ ጊሻስ ኡፋዬቴስ፤ ኔኒ ኢሚዳ ጾኖን ኢዚ ኬሂ ሆምቦጬስ።

² ኔኒ ኢዛ ዎዚና ኣሞ ኢዛስ ኢማዳሳ፤ ቃሴ ኢዚ ኔና ባ ዶናን ኦይቺዳይሳ ኔኒ ዲጋቤካ።

³ ኔኒ ሎኦ ኣንጆራ ኢዛ ሞካሳ፤ ጌሻ ዎርቃ ካላቻ ኢዛ ሁኣን ጎጺሳዳሳ።

⁴ ኔኒ ዴኦ ኢዛስ ኢማና ማላ ኔና ዎሲዴስ፤ ኔካ ኢዛስ ዴኦኔ ኣዱሳ ላይ ኢማዳሳ።

⁵ ኔኒ ጾኖ ኢሚዳ ጊሻስ ኢዛስ ቦንቾይ ዳሪዴስ፤ ጊታቴኔ ቴማ ኢዛስ ኢማዳሳ።

⁶ ኔኒ ኢዛስ ሜርና ኣንጆ ኢማዳሳ፤ ኔ ኢዛራ ዱሳን ኢዛ ኡፋይሳዳሳ።

⁷ ካዎዚ ጎዳን ኣማኔቴስ። ኡባፌ ቃ ጾሳ ኪያቴ ኢዛራ ዲዛ ጊሻስ ኢዚ ያዬና።

⁸ ኔ ኩሼይ ኔ ሞርኬታ ኡባ ዴማና፤ ኔ ኡሻቻይ ኔና ኢጺዛይታ ኦይካና።

⁹ ኔኒ ቆንጪዛ ዎዴ ጮጬን ኤጺዛ ታማ ማላ ኔ ኢስታ ጹጋና፤ ጎዳይ ባ ሃንቆዛ ሱሌን ኢስታ ጹጋና፤ ኢዛ ታማይካ ኢስታ ሚ ይሳና።

¹⁰ ኔኒ ኢስታ ናይታ ቢታፌ ዲጋና፤ ኢስታ ዜሬካ ዴሬፔ ዴን ይሳና።

¹¹ ኔ ሞርኬቲ ኔ ቦላ ጌኔን ዱላቴቴስ፤ ኢታ ሚሺካ ማቄቴቴስ፤ ጊዶ ኣቲን ኢስታስ ሃኔና።

¹² ኔካ ኢስታ ኔ ዎንዳፌዛ ዪሻን ጎዳሳ፤ ኢስቲ ጉዬ ሲሚዲ ባቃታና ማላ ኦሳ።

¹³ ኣቤት ጎዳዉ! ኔ ሚኖቴይ ቁ ቁ ጎ፤ ኔ ጊታ ዎልቃ ጊሻስ ጋላታ ዬ ዬጾስ።