ዬ ማጻፋ 20 - ጋሞ ማጻፋ

ዳዊቲ ዛማሬታ ካቦስ ዬጺዳ ማዛሙሬ

¹ ኔኒ ሜቶቲዳ ዎዴ ጎዳይ ኔ ዎሳ ሲዮ፤ ያቆቤ ጾሳ ሱን ኔና ሚን ኤሶ።

² ባ ኬፌ ኔስ ማዶ ኪቶ፤ ጺዮኔፔ ማዶይ ዮ።

³ ኔ ያርሾ ኡባ ኢዚ ኣኬኮ፤ ኔ ጹጊዛ ያርሾን ኢዚ ኡፋዬቶ።

⁴ ኔ ዎዚና ኣሞ ኔስ ኢሞ፤ ኔ ሃልቾ ኡባ ፖሎ።

⁵ ኔ ጾኒዳ ጊሻስ ኑኒ ኡፋይሳን ሆምቦጫና፤ ኑ ጾሳ ሱንን ኑ ባንዲራ ቁ ኦና፤ ኔ ዎሳ ኡባ ጎዳይ ኔስ ኢሞ።

⁶ ጎዳይ ባ ዶሪዳ ካዎዛስ ጾኖ ኢሚዛይሳ ታኒ ሃኢ ኤራዲስ፤ ባ ኡሻቻ ኩሼዛን ኢዚ ጊታ ጾኖን ኩንና፤ ባ ጌሻ ሳሎፔካ ኢዛስ ዛሮ ኢማና።

⁷ ኢሶቲ ኢሶቲ ባንታ ኦላ ፓራ-ጋሬን ኣማኔቴቴስ፤ ሃራቲ ባንታ ፓራን ጬቄቴቴስ፤ ኑኒ ጊዲኮ ኑ ጎዳ ዎልቃን ጬቄቶስ።

⁸ ኢስቲ ጴቲዲ ኩንዳና፤ ኑኒ ጊዲኮ ዴንዲዲ ሚኒ ኤቃና።

⁹ ኣቤት ጎዳዉ! ካዎዛስ ጾኖ ኢማ፤ ኑኒካ ኔና ጼይጊዛ ዎዴ ሲያ።