ዬ ማጻፋ 2 - ጋሞ ማጻፋ

¹ ካዎቴቲ ኣይስ ዴንዲዞ? ቃሴ ካዎቴይ ኣይስ ኢታ ኦናስ ማቄቲዜ?

² ሳኣ ካዎቲኔ ዳናቲ ዴንዲዳ፤ ኢስቲ ጎዳ ቦላኔ ጎዳይ ቲይዳይሳ ቦላ ዴንዳናስ ኢሲፌ ዱላቲዳ።

³ ኢስቲ፥ «ኣኔ ኑኒ ኢስታ ሳንሳላታ ዱስ፤ ኢስቲ ኑና ቃቺዛይሳካ ኬሲ ዎራ ኦሎስ» ጌቴስ።

⁴ ሳሎን ባ ኣራታ ቦላ ኡቲዳይሲ ኢስታ ቦላ ሚጬስ፤ ጎዳይ ኢስታ ቂስ።

⁵ ጎዳይ ባ ሃንቆን ኢስታ ሴሬስ፤ ባ ዎልቃማ ሃንቆን ኢስታ ዳጋንስ።

⁶ ጎዳይ፥ «ታኒ ታ ጌሻ ዙማ ጺዮኔ ቦላ ታ ካዎዛ ካዎዲስ» ጌስ።

⁷ ሄ ካዎይ፥ «ታኒ ጎዳ ዎጋ ኣዋጃና፤ ጎዳይ ታና፥ ‹ኔኒ ታ ና፤ ታኒ ኔና ሃች ዬላዲስ።

⁸ ኔኒ ታና ኦይቻ፤ ታኒ ካዎቴ ኡባ ኔስ ኢማና፤ ሳኣ ኡባይ ኔስ ጊዳና።

⁹ ኔኒ ቢራታ ጉፌን ኢስታ ቆጼሬና፤ ኢስታ ኔኒ ማና ሚሺ ሜቂዛ ማላ ሜንሬና› ጌስ» ጊዴስ።

¹⁰ ሄሳ ጊሻስ ኢንቴኖ ካዎቶ ኣኬኪቴ፤ ሃ ሳኣ ሃሪዛይቶ ኢንቴ ናጌቲቴ!

¹¹ ጎዳስ ያሻቴን ኦቴ፤ ኢዛስ ኮኮርሳን ሃሬቲቴ።

¹² ጎዳይ ሃንቄቲን ኦጌን ኢንቴ ዮንታ ማላ ኢዛስ ሱሬ ዎዚናን ጎይኒቴ፤ ኣይስ ጊኮ ኢዛ ሃንቆይ ኤሶን ኤጺ ኬዛና። ኢዛ ባንታስ ዜምፖ ኦዛይቲ ኣንጄቲዳይታ።