ዬ ማጻፋ 147 - ጋሞ ማጻፋ

¹ ጎዳይ ጋላቴቶ! ኑ ጾሳ ዬን ሳቦይ ኣይ ማላ ሎኦ! ኢዛ ጋላቲዛይሲ ኡፋይሴስ፤ ሄሲካ ኢዛስ ቤሴስ።

² ጎዳይ ዬሩሳላሜ ኦራጺሳና፤ ኢስራኤሌፔ ቤቲዳይታካ ሺሻና።

³ ዎዚናይ ሜቂዳይታ ኢዚ ኮሌስ፤ ኢስታ ማዱንካ ኢዚ ፓስ።

⁴ ኢዚ ሳሎ ጾሊንቴታ ቆዳ ኤሬስ፤ ኢሳ ኢሳ ኢዛ ሱንን ሱንን ጼይጌስ።

⁵ ኑ ጎዳይ ጊታ፤ ኢዚ ኬሂፔ ዎልቃማ፤ ኢዛ ኤራቴስ ዛዋይ ዴና።

⁶ ጎዳይ ካቲዳይታ ቦንቼስ፤ ጊዶ ኣቲን ኢታታ ካዉሼስ።

⁷ ጎዳስ ጋላታ ማዛሙሬ ዬጺቴ፤ ኑ ጾሳስ ማሲንቆ ሾጪሼ ጋላቲቴ።

⁸ ኢዚ ሳሎ ሻራ ማይዜስ፤ ሳኣስ ኢራ ቡኪሴስ፤ ዙማታ ቦላካ ማታ ሞኪሴስ።

⁹ ሜዶሳሲኔ ቁሮ ዬሎታስ ሚዛ ሚሽ ኢዚ ኢሜስ።

¹⁰ ኢዚ ኡፋዬቲዛይ ፓራታ ዎልቃኒኔ ቶራንቻታ ሚኖቴን ጊዴና።

¹¹ ጎዳይ ባስ ያዪዛይታኒኔ ኢዛ ሲቆን ኣማኔቲዛይታን ኡፋዬቴስ።

¹² ዬሩሳላሜ ካታማዬ! ጎዳ ጋላታ! ሃኔ ጺዮኔ! ኔ ጾሳ ሳባ!

¹³ ኢዚ ኔ ፔንጌ ኮላታ ሚንስ፤ ኔ ጊዶን ዲዛ ኔ ናይታ ኣንጄስ።

¹⁴ ኢዚ ኔ ዛዋ ሳሮቴን ናጌስ፤ ኔና ኬሂፔ ሎኢዛ ጊስቴ ካልሴስ።

¹⁵ ኢዚ ባ ኪታ ሳኣስ ኪቴስ፤ ኢዛ ቃላይካ ኤሶን ጋኬስ።

¹⁶ ኢዚ ሻች ኣፋላ ማላ ሚጬስ፤ ኬንቾካ ቢዲን ማላ ላሌስ።

¹⁷ ኢዚ ሻች ሹቻ ማላ ዱጌ ዬዳና፤ ሄ ሞጬዛን ኤቃናስ ኦኒኔ ዳንዳዬና።

¹⁸ ኢዚ ባ ቃላ ኪቲዲ ሻቻ ማዪሴስ። ኢዚ ጫርኮ ጫርኪሲን ሃ ጎጌስ።

¹⁹ ኢዚ ባ ቃላ ያቆቤ ዜሬስ ባ ማራኔ ዎጋ ኢስራኤሌ ኣሳስ ቆንጪሴስ።

²⁰ ኢዚ ሄሳ ማላ ሃራ ካዎቴታስ ኦቤና፤ ኢስቲ ኢዛ ዎጋ ኤሬቴና። ጎዳይ ጋላቴቶ!