ዬ ማጻፋ 146 - ጋሞ ማጻፋ

ኣሺዛ ጾሳስ ሺቂዳ ጋላታ

¹ ጎዳይ ጋላቴቶ! ታ ሼምፖዬ፥ ጎዳ ጋላታ!

² ታ ዴኦ ላይ ኡባን ታኒ ጎዳ ጋላታና፤ ታኒ ሼምፖራ ፓጻ ዲዛ ዎዴ ኡባን ታ ጾሳ ሳባና።

³ ዴሬ ኣይሲዛይታን ኣማኔቶፍቴ፤ ኣስ ኣሻናዉ ዳንዳዮንታ ኣሾ ማይኢዳ ሜታታን ጬቄቶፍቴ።

⁴ ኢስታ ሼምፖይ ኬዚዛ ዎዴ ኢስቲ ቢታን ሲማና፤ ኢስታ ሃልቾይ ኡባይ ሄ ጋላስ ኣታና።

⁵ ያቆቤ ጾሳይ ማዲዛ ኣሲ ባ ሂዶታካ ባ ጎዳ ቦላ ዎዳ ኣሲ ኣንጄቲዳዴ።

⁶ ጎዳይ ሳሎኔ ሳኣ፥ ጊታ ኣባኔ ኢስታ ጊዶን ዲዛ ኡባ ሜዳይሳ፤ ኢዚ ባ ኣማኔቴ ሜርናስ ናጊዛይሳ።

⁷ ኢዚ ቆሄቲዳይታስ ፒርዲዛይሳ፤ ጋፊዳይታ ሚዚ ካልሲዛይሳ። ጎዳይ ቃሼቲዳይታ ቢርሺ ዬዲዛይሳ፤

⁸ ጎዳይ ቆቄታ ጼሊሴስ። ጎዳይ ኩንዲዳይታ ዴንስ፤ ጎዳይ ጺሎታካ ሲቄስ።

⁹ ጎዳይ ቤቴ ኣሳታ ናጌስ። ኣምኤታኔ ዪኦ ናይታ ማዴስ፤ ጊዶ ኣቲን ኢታታ ኦጌ ይሴስ።

¹⁰ ጎዳይ ሜርናስ ካዎ፤ ጺዮኔ! ኔ ጾሲ ዬሌታፔ ዬሌታ ጋካናስ ካዎታና። ጎዳይ ጋላቴቶ!