ዬ ማጻፋ 145 - ጋሞ ማጻፋ

ዳዊቲ ዬጺዳ ጋላታ ማዛሙሬ

¹ ኣቤት ታ ካዎ ጾሳዉ! ታኒ ኔና ቁ ቁ ሂስታና፤ ኔ ሱን ሜርናስካ ጋላታና።

² ታኒ ኔና ኡባ ጋላስ ሳባና፤ ኔ ሱንካ ሜርናስ ጋላታና።

³ ጎዳይ ጊታ፤ ጊታ ጋላታይ ኢዛስ ቤሴስ፤ ኢዛ ጊታቴይ ኣሳ ቆፋፔ ቦላ።

⁴ ኢሲ ዬሌታይ ካሊዛ ዬሌታስ ኔ ኦዳ ኦሶ ዮቴስ፤ ማላሊሲዛ ኔ ኦሶታካ ቆንጪሳና።

⁵ ኢስቲ ኔ ቦንቾኔ ኔ ጊታ ቴማ ሃሳያና፤ ታኒካ ማላሊሲዛ ኔ ኦሶዛ ዛራ ዛራ ቆፓና።

⁶ ኣሳይ ማላሊሲዛ ኔ ኦሶዛ ጊታቴ ጊሻስ ሃሳዬታና፤ ታኒካ ኔ ጊታቴ ኣዋጃና።

⁷ ኢስቲ ኔ ኪያቴ ዳሮዛ ዮታና፤ ኔ ጺሎቴ ኡፋይሳን ዬጻና።

⁸ ጎዳይ ቃቲዛይሳኔ ማሪዛይሳ፤ ኢዚ ሃንቄታናስ ኤሶቶንታይሳኔ ሲቆይ ኩሚዳይሳ።

⁹ ጎዳይ ኡባስ ኪያ፤ ኢዚ ባ ሜዳ ኡባስ ቃቲዛይሳ።

¹⁰ ኣቤት ጎዳዉ! ሜታ ኡባይ ኔና ጋላታና፤ ኔ ዴሬይ ኡባይካ ኔና ሳባና።

¹¹ ኢስቲ ኔ ካዎቴ ቦንቾ ጊሻስ ሃሳያና፤ ኔ ዎልቃ ጊሻስ ዮታና።

¹² ሄሳን ኔ ዎልቃማ ኦሶታኔ ኔ ካዎቴ ቴማ ቦንቾዛ ኢስቲ ኤሪሳና።

¹³ ዬሌታፔ ዬሌታ ጋካናስ ኔ ሃራና፤ ኔ ካዎቴይ ሜርናሳ። ጎዳይ ባ ጊዳ ቃላን ኣማኔቲዛይሳ፤ ኢዚ ባ ኦሶ ኡባን ኪያ።

¹⁴ ጎዳይ ጋንዲጋርዛይታ ካፌስ፤ ኩንዲዳይታካ ዴንስ።

¹⁵ ኡባ ኣይፌይ ኔኮ ጼሌስ፤ ኢስታስ ኮሺዛ ዎዴን ኔኒ ኢስታስ ቁማ ኢማሳ።

¹⁶ ኔኒ ኔ ኩሼ ሚጫዳ ሼምፖራ ፓጻ ዲዛ ኡባ ኣሞ ኩንሳ።

¹⁷ ጎዳይ ባ ኦጌ ኡባን ጺሎ፤ ኢዚ ባ ኦሶ ኡባን ኪያ።

¹⁸ ጎዳይ ባና ጼይጊዛይታስ ኡባስ ማታ፤ ዎዚናፔ ጼይጊዛ ኡባስ ማታን ዴስ።

¹⁹ ኢዚ ባስ ያዪዛ ኡባስ ኣሞ ኩንስ። ቃሴ ኢዚ ኢስታ ዋሶዛ ሲዪዲ ኢስታ ኣሼስ።

²⁰ ጎዳይ ባና ሲቂዛይታ ኡባ ናጌስ፤ ጊዶ ኣቲን ኢታታ ኡባ ይሳና።

²¹ ታኒ ታ ዶናን ጎዳ ጋላታና። ሜታ ኡባይ ኢዛ ጌሻ ሱን ሜሪ ሜርናስ ጋላቶ!