ዬ ማጻፋ 141 - ጋሞ ማጻፋ

ዳዊቴ ማዛሙሬ

¹ ኣቤት ጎዳዉ! ታኒ ኔና ጼይጋይስ፤ ታና ማዳናስ ኤሌላ። ታኒ ኔኮ ዋሲዛ ዎዴ ታ ዋሶ ሲያ!

² ታ ዎሳይ ኤጻኔ ጩዋ ማላ ኔ ሲን ሺቆ፤ ታኒ ታ ኩሼዛ ሚጪዛይሲ ኔስ ኦማርሳ ዎዴ ያርሾ ማላ ጊዶ።

³ ኣቤት ጎዳዉ! ታ ዶና ናጋናስ ዛቤ ዎ፤ ታ ሜቴርሻታ ፔንጌን ናጊዛይሳ ኤሳ።

⁴ ሞሮ ኦዛ ኣሳታራ ኢታ ኦሶ ኦንታ ማላ ታ ዎዚና ኢታኮ ዛሮፓ፤ ኢስታ ጊቢራካ ታና ሚዞፓ።

⁵ ጺሎ ኣሲ ታና ቃጻዮ፤ ሄሲካ ታስ ሎኦ፤ ኢዚ ታና ሴሪኮ ሄሲ ታ ሁኤን ዛይቴ ቲዪዛ ማላ፤ ሄሳካ ታ ኢጺኬ፤ ጊዶ ኣቲን ታኒ ኡባቶካ ኢታ ኣሳታ ኦሶ ቦላ ዎሳይስ።

⁶ ኢስታ ዳናቲ ኣፎራ ዱጌ ኦሌቲዛ ዎዴ ታ ቃላይ ቱማ ጊዲዳይሳ ኢስቲ ኤራና።

⁷ ጋዴይ ጎዬቲዛ ማላኔ ጳሼይ ሊቂዛ ማላ ኢስታ ሜቄካ ዱፎ ዶናን ላሌታና።

⁸ ኣቤት ጎዳዉ፥ ኡባፌ ዎልቃማ ጾሳዉ! ታ ኣይፌይ ኔና ጼሌስ፤ ታ ዜምፖይ ኔና፤ ታና ሃይቆስ ኣዳ ኢሞፋ።

⁹ ኢስቲ ታስ ዎዳ ዎጺማዴፔኔ ኢታ ኦዛይታ ጊቴፔ ታና ናጋ።

¹⁰ ታ ሳሮ ኣሺን ኢስቲ ባንቲ ዎዳ ጊቴዛን ኦይኬቴቶ።