ዬ ማጻፋ 140 - ጋሞ ማጻፋ

ዳዊቲ ዛማሬታ ካቦስ ዬጺዳ ማዛሙሬ

¹ ኣቤት ጎዳዉ! ኢታ ኣሳታፔ ታና ኣሻ፤ ማካላንቻታፔካ ታና ናጋ።

² ኢስቲ ኡባ ዎዴ ኢታ ኦናስ ማቄቴቴስ፤ ኡባ ጋላሲካ ኦሽ ዴንናስ ዮኦ ፒቄቴስ።

³ ኢስቲ ሃሶ ሾሻ ማላ ኢንጻርስ ቃራሴቴስ፤ ኢስታ ዶናፔ ጎፔ ማርዜ ማላ ቃላይ ኬዜስ።

⁴ ኣቤት ጎዳዉ! ኢታ ኣሳታ ኩሼፔ ታና ኣሻ፤ ታ ቶሆ ቃጻናስ ቆፒዛ ማካላንቻታፔካ ታና ናጋ።

⁵ ኦቶራንቻቲ ታስ ዎጺማዴ ዎዳ፤ ጊቴ ጊግሲዳ፤ ታ ኦጌንካ ዲዛ ዎዳ።

⁶ ታኒ ጎዳ፥ «ኔኒ ታ ጾሳ» ጋይስ። ኣቤት ጎዳዉ! ታኒ ሾቢዛይሳ ሲያ።

⁷ ኣቤት ኡባፌ ዎልቃማ ጎዳዉ! ታና ኣሺዛ ሚኖዞ! ኦላ ጋላስ ታስ ጎንዳሌ ጊዳዳሳ!

⁸ ኣቤት ጎዳዉ! ኢታታ ኣሞይ ፖሌቶፎ፤ ኢስታ ቆፋይ ፖሌታና ማላ ኦፋ!

⁹ ታ ሞርኬታን ታና ጾኒሶፓ፤ ኢስቲ ቆፒዳ ኢታ ቆፋይ ኢስታ ሁኤን ጻጼቶ።

¹⁰ ኢስታ ቦላ ታማ ቦንቆይ ቆሌቶ፤ ኢስቲ ታማን ኦሌቴቶ፤ ሲሚ ኬዛናስ ዳንዳዮንታ ኦላን ኩንዴቶ።

¹¹ ኢታ ሃሳይዛይታ ቢታይ ቶኮፎ፤ ማካላንቻታ ኢታ ሚሺ ኦይኮ።

¹² ጎዳይ ሂዬሳታስ ፒርዲዛይሳኔ ሜቶታንቻታስ ሞቴቲዛይሳ ታ ኤራይስ።

¹³ ጺሎቲ ቱሙፔ ኔ ሱን ጋላታና፤ ሱሬቲካ ኔ ሲንን ዴኣና።