ዬ ማጻፋ 139 - ጋሞ ማጻፋ

ዳዊቲ ዛማሬታ ካቦስ ዬጺዳ ማዛሙሬ

¹ ኣቤት ጎዳዉ! ኔኒ ታና ፒልጋ ኤራዳሳ።

² ታኒ ኣዉዴ ኡቲዛኮኔ ኣዉዴ ኤቂዛኮ ኔኒ ኤራሳ፤ ኔኒ ታ ቆፋ ኡባ ሃኮፔ ኣኬካሳ።

³ ታኒ ቢዛሶኔ ሼምፒዛሶ ጾሞሳሳ፤ ታ ኦጌታ ኡባ ኔኒ ኤራሳ።

⁴ ኣቤት ጎዳዉ! ታኒ ታ ዶናፔ ኢሲ ቃላካ ሃሳያናፔ ካሴታዳ ኔኒ ታ ቆፋ ኡባ ኤራሳ።

⁵ ኔኒ ታ ዩሾ ኡባን ዳሳ፤ ኔ ኩሼዛን ታና ናጋሳ።

⁶ ኔ ኤራቴይ ታና ኬሂፔ ማላሊሴስ፤ ታኒ ኣኬካናስ ዳንዳይዛይሳፌካ ቄስ።

⁷ ታኒ ኔ ኣያናፔ ኣዋ ባናስ ዳንዳያዚና? ዎይኮ ኔ ሲንፌ ኣዋ ባቃታናስ ዳንዳያዚና?

⁸ ፑዴ ሳሎ ኬኢኮ ኔኒ ሄን ዳሳ! ዱጌ ሲኦሌ ዎኮካ ኔኒ ሄን ዳሳ።

⁹ ኣርሼይ ሞኪዛሶ ባጋ ፓላ ቢኮ፥ ዎይኮ ኣርሼይ ዉሊዛሶ ባጋ ሃካ ቢኮ፥

¹⁰ ታና ሄን ኔ ኩሼይ ካሌስ፤ ኔ ኡሻቻ ኩሼይካ ታና ሚን ኦይኬስ።

¹¹ ታኒ፥ «ማዞ! ታና ጌን፤ ፖኦዞ! ታ ዩሾን ማ» ጊኮ፥

¹² ማይ ኔና ጼሎ ዲጌና፤ ኦማርሲ ኔስ ጋላሳ ማላ ፖኤስ፤ ማይኔ ፖኦይ ኔስ ኢሲ ማላ።

¹³ ኔኒ ታ ኣሳቴ ኡባ ሜዳሳ፤ ታ ኣዬይ ኡሎንካ ታና ቲላ ሜዳሳ።

¹⁴ ኔኒ ታና ኬሂ ዬጋልኔ ማላሊሲዛዝ ሂስታ ሜዳ ጊሻስ ታ ኔና ጋላታይስ፤ ኔ ኦሶቲ ማላሊሲዛይታ! ታ ሼምፖያ ሄሳ ኡባ ኤራዉስ።

¹⁵ ታኒ ጌማሶን ሜቲዳ ዎዴ ታ ሜቄቲ ኔፔ ጌሚቤቴና፤ ታኒ ታ ኣዬይ ኡሎን ጪማ ጊዶን ሂላን ኦሴቲዛ ዎዴ፥

¹⁶ ታ ኣዪ ኡሎን ቡሮ ሱ ጊዳ ታ ዲሺን ኔ ኣይፌቲ ቤኢዳ፤ ታ ላይታፔ ኢሶይኔ ዶሜቶንታ ዲሺን ታስ ኔኒ ባሪዳ ጋላሳቲ ኡባይ ኔ ማዝጋባን ጻፌቲዳ።

¹⁷ ኣቤት ጾሳዉ! ኔ ታስ ቆፒዛ ቆፋይ ኣይ ማላ ሎኦ! ኢዚካ ኣይ ኬና ጮራ!

¹⁸ ታኒ ኢዛ ቆዲኮ ኣጬፔካ ዳሮ፤ ታ ኢቻ ቤጊዛ ዎዴ ሃኢካ ኔናራ ዴኣይስ።

¹⁹ ኣቤት ጾሳዉ! ኔኒ ኢታታ ሲፊዳኮ ኣዜ ዲዛይ! ሱ ጉሳና ሳሜቲዛ ኣሳቲ ታፔ ሃኪቴ!

²⁰ ኢስቲ ኔ ቦላ ኢታ ሚሽ ሃሳዬቴስ፤ ኔ ሞርኬቲ ኔ ሱን ሞሬቴስ።

²¹ ኣቤት ጎዳዉ! ኔና ኢጺዛይታ ታኒ ኢጺኪና? ኔ ቦላ ዴንዲዛይታ ታኒ ሃራሴቲኪና?

²² ታ ኢስታ ሙሌራ ኢጻይስ፤ ኢስታ ታኒ ታ ሞርኬታ ማላ ቆዳይስ።

²³ ኣቤት ጾሳዉ! ታ ዎዚና ፒልጋዳ ኤራ፤ ታና ፓጫዳ ታ ጬጬ ቆፋካ ሻካ ኤራ።

²⁴ ኣኔ ታናን ኢታይ ዴኢኮ ጼላ፤ ሂስታዳ ሜርና ኦጌራ ታና ካሌ።