ዬ ማጻፋ 138 - ጋሞ ማጻፋ

ዳዊቴ ማዛሙሬ

¹ ኣቤት ጎዳዉ! ታኒ ታ ኩሜ ዎዚናፔ ኔና ጋላታይስ፤ ጾሳታ ሲንን ኔና ሳባይስ።

² ኔ ጌሻ ኬኮ ሲማዳ ኔና ጎይናይስ፤ ኔ ሲቆ ጊሻሲኔ ኔ ኣማኔቴ ጊሻስ ታኒ ኔ ሱን ሳባይስ፤ ኔኒ ኔ ሱንኔ ኔ ቃላ ኡባፌ ኣዳ ቁ ሂስታዳሳ።

³ ታኒ ጼይጊዳ ጋላስ ታስ ኮያዳሳ፤ ኔ ሚኖቴን ታና ሚን።

⁴ ኣቤት ጎዳዉ! ሳኣን ዲዛ ካዎቲ ኡባይ ኔ ዶናፔ ኬኢዳ ቃላ ሲዪዲ ኔና ጋላቴቶ!

⁵ ጎዳ ቦንቾይ ጊታ ጊዲዳ ጊሻስ ኢስቲ ኢዚ ኦዳ ኦሶ ጊሻስ ዬጼቶ።

⁶ ጎዳይ ቦላ ቃን ዲኮካ ሂዬሳታ ሎኦ ኣይፌን ጼሌስ፤ ጊዶ ኣቲን ኦቶራንቻታ ኢዚ ሃሆፔ ኤሬስ።

⁷ ታኒ ሜቶ ጊዶን ዲኮካ ኔኒ ታና ናጋሳ፤ ታ ሞርኬታ ሃንቆ ቦላ ኔ ቄሴ ዴንሳ፤ ኔ ኡሻቻ ኩሼን ታና ኣሻሳ።

⁸ ጎዳይ ታስ ቆፒዳይሳ ፖላና፤ ኣቤት ጎዳዉ! ኔ ሲቆይ ሜርናሳ፤ ኔ ኩሼ ኦሶ ዬጋ ኣጎፋ።