ዬ ማጻፋ 135 - ጋሞ ማጻፋ

¹ ኢንቴኖ ጎዳ ኣይሌቶ! ኢዛ ጋላቲቴ! ጎዳ ሱን ሳቢቴ!

² ኢንቴኖ ጎዳ ኬን ኦዛይቶ! ኢንቴኖ ኑ ጾሳ ኬ ዛጎን ኤቂዳይቶ ጋላቲቴ!

³ ኢዚ ኪያ ጊዲዳ ጊሻስ ጎዳ ጋላቲቴ! ኢዚ ሎኦ ጊዲዳ ጊሻስ ኢዛ ሱንስ ዬጺቴ!

⁴ ጎዳይ ያቆቤ ባስ ቡዞ ኦዴስ፤ ኢስራኤሌካ ባስ ኣልኦ ሚሽ ሂስቲ ዶሪዴስ።

⁵ ጎዳይ ጊታ ጊዲዳይሳኔ ኑ ጎዳይ ጾሳታ ኡባፌ ቂዛይሳ ታኒ ኤራይስ።

⁶ ሳሎኒኔ ሳኣን፥ ኣባታኒኔ ጪማታ ኡባ ጊዶንካ ጎዳይ ባ ዶሲዳይሳ ኡባ ኦስ።

⁷ ካሬ ሻራ ሳኣ ጋጻፔ ኢዚ ዴንስ፤ ኢዚ ኢራራ ዎልቃን ኪቴስ፤ ባ ሚንጂ ዎዳሶፔ ጫርኮ ኬሲ ዬዴስ።

⁸ ጊብጼ ቢታን ኣሳፔ ቢዲ ሜሄ ጋካናስ ባይራ ዬሌቲዳ ኡባ ዎዴስ።

⁹ ኔኖ ጊብጼ! ፓሮኔ ቦላኔ ኢዛ ኦሳንቻታ ቦላ ኦራኔ ማላሊሲዛ ሚሽ ዬዲዴስ።

¹⁰ ኢዚ ዳሮ ካዎቴታ ይሲዴስ፤ ዎልቃማ ካዎታካ ዎዴስ።

¹¹ ኣሞሬታ ካዎ ሲሆኔ፥ ባሳኔ ካዎ ኣጌኔ ካናኔ ካዎታ ኡባ ዎዴስ።

¹² ኢስታ ቢታካ ባ ዴራ ኢስራኤሌ ላቲሲዴስ።

¹³ ኣቤት ጎዳዉ! ኔ ሱን ሜርናስ ዳና፤ ዬሌታፔ ዬሌታ ጋካናስ ኔኒ ሃሳኤታና።

¹⁴ ጎዳይ ባ ኣሳስ ፒርዳና፤ ኢዚ ባ ኣይሌታስካ ቃታና።

¹⁵ ካዎቴቲ ጎይኒዛ ኤቃ ጾሳቲ ቢራፔኔ ዎርቃፌ ኣሳ ኩሼን ኦሴቲዳይታ።

¹⁶ ኢስታስ ዶናይ ዴስ ሺን ሃሳዬቴና፤ ኣይፌይ ዴስ ሺን ጼሌቴና።

¹⁷ ሃይ ዴስ ሺን ሲዬቴና፤ ኢስታ ሲን ፔኖይካ ዴና።

¹⁸ ኢስታ ሜዳይቲኔ ኢስታን ኣማኔቲዛይቲ ኡባይ ኢስታ ማላ ጊዴቶ።

¹⁹ ኢስራኤሌ ዴሬዞ! ጎዳ ጋላቲቴ፤ ኣሮኔ ኬ ኣሳቶ! ጎዳ ሳቢቴ፤

²⁰ ሌዌ ኬ ኣሳቶ! ጎዳ ጋላቲቴ፤ ጎዳስ ያዪዛይቶ! ኡባይ ጎዳ ጋላቲቴ።

²¹ ዬሩሳላሜን ዴኢዛ ጎዳይ ጺዮኔን ጋላቴቶ! ጎዳይ ጋላቴቶ!