ዬ ማጻፋ 116 - ጋሞ ማጻፋ

¹ ኢዚ ታ ሾባ ዎሲዛ ዎሳ ሲዪዳ ጊሻስ ታኒ ጎዳ ዶሳይስ።

² ኢዚ ባ ሃይ ታኮ ዬጊዳ ጊሻስ ታኒ ዴኢዛ ዎዴ ኡባን ኢዛ ጼይጋና።

³ ሃይቆይ ዎጺማዴ ማላ ታና ዶዲ ኦይኪዴስ፤ ዱፎን ጌሎይ ታና ሂርጊሲዴስ። ጬጬይኔ ኡንኦይ ታና ቶሊ ኦይኪዴስ።

⁴ ሄ ዎዴ ታኒ፥ «ኣቤት ጎዳዉ! ሃዳራ! ታና ኣሻ» ጋዳ ጎዳ ሱን ጼይጋዲስ።

⁵ ጎዳይ ኪያኔ ጺሎ፤ ኑ ጾሳይ ማሪዛይሳ።

⁶ ጎዳይ ኣሽኬታ ናጌስ፤ ታኒ ሜቶቲዳ ዎዴ ኢዚ ታና ኣሺዴስ።

⁷ ታ ሼምፖዬ ኣኔ ዎፑ ጋ፤ ጎዳይ ኔስ ሎኦ ሚሽ ኦዴስ።

⁸ ጎዳይ ታና ሃይቆፔ፥ ታ ኣይፌ ኣፉንፌ፥ ታ ቶሆካ ጴፔ ኣሺዴስ።

⁹ ሄሳ ጊሻስ ታኒ ጎዳ ሲንን ሼምፖራ ፓጻ ዲዛይታ ጊዶን ሄሜታይስ።

¹⁰ ታ፥ «ታኒ ኬሃ ኡንኤታዲስ» ጊዛ ዎዴካ ኣማኖ ኣጋቤኬ።

¹¹ ታስ ጊዛዚ ዪን፥ «ኣሲ ኡባይ ዎርዶ» ጋዲስ።

¹² ኢዚ ታስ ኪዪዳ ኪያቴ ጊሻስ ታኒ ጎዳስ ኣይ ቃንጻናስ ዳንዳያዚና?

¹³ ጎዳይ ታና ኣሺዳ ጊሻስ ዎይኔ ኡሹ ጋላታስ ሺሻዳ ኢዛ ሱን ጼይጋና።

¹⁴ ኢዛ ዴራ ኡባ ሲንን ታኒ ኣዲኒዳ ኣዲና ጎዳስ ጋና።

¹⁵ ጌሻታ ሃይቆይ ጎዳ ሲንን ቦንቾ።

¹⁶ ኣቤት ጎዳዉ! ታኒ ኔ ኣይሌ፤ ታኒ ኔ ኣይሌይ ና፤ ታና ቃሾፔ ቢርሻዳሳ።

¹⁷ ኣቤት ጎዳዉ! ታኒ ጋላታ ያርሾ ኔስ ያርሻና፤ ሂስታዳ ኔ ሱን ጼይጋና።

¹⁸ ኢዛ ዴራ ኡባ ሲንን ታኒ ኣዲኔቲዳ ኣዲና ጎዳስ ጋና።

¹⁹ ሄሳካ ታኒ ጋናይ፥ ዬሩሳላሜን ዲዛ ጎዳ ኬ ዳባባና። ጎዳይ ጋላቴቶ!