ዬ ማጻፋ 111 - ጋሞ ማጻፋ

¹ ጎዳ ጋላቲቴ! ሱሬታ ሺቆኒኔ ዴሬ ዱላታን ታኒ ኩሜ ዎዚናፔ ጎዳ ጋላታና።

² ጎዳ ኦሶቲ ኣይ ኬና ጊታ! ኢስታን ኡፋዬቲዛይቲ ኡባይ ኢስቲ ዩሺ ቆፓናስ ቤሴስ።

³ ኢዛ ኦሶቲ ቦንቾኒኔ ቴማን ኩሚዳይታ፤ ኢዛ ጺሎቴካ ሜርናስ ዴስ።

⁴ ኢዚ ባ ማላሊሲዛ ኦሶታ ሃሳኤታና ማላ ኦዴስ። ኢዚ ኪያኔ ማሪዛ ጎዳ።

⁵ ባስ ያዪዛይታስ ካ ኢሜስ፤ ባ ጫቆ ቃላካ ሜርናስ ቆፔስ።

⁶ ኣላጋታ ቢታ ባ ዴራስ ኢሚዲ ባ ሚኖ ኦሶዛ ባ ካዎቴ ቤሲዴስ።

⁷ ኢዛ ኦሶቲ ቱማኔ ሱሬ፤ ኢዛ ዎጋቲካ ኡባይ ኣማኔቲዛይታ።

⁸ ኢስቲ ሜርናስ ኤቂ ዴኢዛይታ፤ ቱማቴኒኔ ሱሬቴን ኢሜቲዳ።

⁹ ኢዚ ባ ኣሳስ ኣቶቴ ኢሚዴስ፤ ባ ጫቆ ቃላካ ኢስታስ ሜርናስ ኣዛዚዴስ፤ ኢዛ ሱን ጌሺኔ ያሺሲዛዛ።

¹⁰ ኣ ኤራቴስ ኮይሮይ ጎዳስ ያሻቴ፤ ኢዛ ኣዛዞ ኦዛይታስ ሎኦ ኣኬካይ ዴስ። ጎዳይ ሜርናስ ጋላቴቶ!