ዬ ማጻፋ 107 - ጋሞ ማጻፋ

ኢቻሻን ማጻፋ ( ማዛ 107—150 )

¹ ኢዚ ኪያኔ ኢዛ ሲቆይ ሜርናስ ጊዲዳ ጊሻስ ጎዳ ጋላቲቴ።

² ጎዳይ ኢስታ ዎዚዳይቲ፥ ኢስታ ሞርኬታ ኩሼፔ ኢዚ ኣሺዳይቲ ሂዝጌቶ፤

³ ኣርሼይ ሞኪዛሶፔኔ ዉሊዛሶፔ፥ ፑዴሃፔኔ ዱጌሃፔ ዴሬ ኡባፌ ኢዚ ሺሺዳይቲ ሂዝጊ ሃሳዬቶ።

⁴ ኢስታፌ ኢሶቲ ኢሶቲ ባዞ ቢታን ቶይላቲዳ፤ ባ ዴኢዛ ካታማ ኤፊዛ ኦጌ ዴማናስ ዳንዳይቤቴና።

⁵ ኢስቲ ጋፊዳኔ ሳሜቲዳ፤ ኬሂፔ ዳቡርዳ።

⁶ ኢስቲ ሜቶቲዳ ዎዴ ጎዳኮ ዋሲዳ፤ ኢዚካ ኢስታ ዋዬዛፔ ኣሺዴስ።

⁷ ኢስቲ ዴኣና ካታማ ጋካናስ፥ ኢዚ ኢስታ ሲታ ኦጌራ ካሌዴስ።

⁸ ሜርና ኢዛ ሲቆዛሲኔ ኢዚ ኣሳስ ኦዳ ማላሊሲዛ ሚሻታስ ኢስቲ ጎዳ ጋላቴቶ!

⁹ ኣይስ ጊኮ ኢዚ ሳሜቲዳይታ ኡሺ ኣሊሴስ፤ ጋፊዳይታካ ሎኦ ሚሻን ካልሴስ።

¹⁰ ኢስታፌ ኢሶቲ ኢሶቲ ቢራታ ሳንሳላታን ቃሼቲዲ ዋዬቲዛይታ፤ ሳካና ማ ጊዶንካ ኡቲዳይታ፤

¹¹ ጋሶይካ ኢስቲ ጾሳ ቃላ ቦላ ማካሊዳኔ ኡባፌ ቃ ጾሳ ዞሬ ካዳ።

¹² ሄሳ ጊሻስ ዎልቃ ኦሶን ኢስታ ኢጼዴስ፤ ኢስቲ ዳቡሪን ኢስታ ማዲዛይ ይዴስ።

¹³ ኢስቲ ሜቶቲዳ ዎዴ ጎዳኮ ዋሲዳ፤ ኢዚካ ኢስታ ዋዬዛፔ ኣሺዴስ።

¹⁴ ሳካና ማፔ ኢስታ ኬሲዴስ፤ ኢስቲ ቃሼቲዳ ሳንሳላታካ ዱሴሬዴስ።

¹⁵ ሜርና ኢዛ ሲቆዛሲኔ ኢዚ ኣሳስ ኦዳ ማላሊሲዛ ሚሻታስ ኢስቲ ጎዳ ጋላቴቶ።

¹⁶ ኣይስ ጊኮ ኢዚ ጻርቂማላፔ ኦሴቲዳ ፔንጌ ሜንዴስ፤ ቢራታ ኮላታታካ ቃንጼሬዴስ።

¹⁷ ኢስታፌ ኢሶቲ ኢሶቲ ባ ማካላቴ ጋሶን ኤያ ጊዲዳ፤ ባ ናጋራ ጋሶንካ ሜቶን ጌሊዳ።

¹⁸ ኢስታ ቆይ ካ ኢጺን ሃይቃና ማቲዳ።

¹⁹ ኢስቲ ሜቶቲዳ ዎዴ ጎዳኮ ዋሲዳ፤ ኢዚካ ኢስታ ዋዬዛፔ ኣሺዴስ።

²⁰ ኢዚ ባ ቃላ ኪቲዲ ኢስታ ፓዴስ፤ ዱፎ ዶናፔካ ኢስታ ኣሺዴስ።

²¹ ሜርና ኢዛ ሲቆዛሲኔ ኢዚ ኣሳስ ኦዳ ማላሊሲዛ ሚሻታስ ኢስቲ ጎዳ ጋላቴቶ።

²² ኢስቲ ኢዛስ ጋላታ ያርሾ ያርሼቶ፤ ቃሴካ ኡፋይሳ ዬን ኢዚ ኦዳ ኦሶ ቆንጪሴቶ።

²³ ኢስታፌ ኢሶቲ ኢሶቲ ማርካቤን ጊታ ኣባ ጊዶራ ቢዳ፤ ሄ ጊታ ኣባ ቦላ ባንታ ኦሶ ኦዳ።

²⁴ ኢስቲ ጎዳ ኦሶ ቤኢዳ፤ ኢዚ ጪማ ጋርሳን ኦዳ ማላሊሲዛ ኦሶታ ጼሊዳ።

²⁵ ኢዚ ኣዛዚን ጎቴ ጫርኮይ ዴንዲዴስ፤ ሂስቲን ኣባ ዳምባላይ ቃጺዴስ።

²⁶ ኢስቲ ፑዴ ሳሎ ኬዚዳ፤ ሲሚዲካ ዱጌ ጪማን ጌሊዳ፤ ኢስታ ጋኪዳ ሜቶፔ ዴንዶይሳን ኢስታ ዎዚናይ ታሂዴስ።

²⁷ ኢስቲ ማቲዳ ኣሳ ማላ ዪጮቲዲ ጋንዲጋርዳ፤ ኢስታስ ኣኬኪዛ ዎዚናይካ ዳሚዴስ።

²⁸ ኢስቲ ሜቶቲዳ ዎዴ ጎዳኮ ዋሲዳ፤ ኢዚካ ኢስታ ዋዬዛፔ ኣሺዴስ።

²⁹ ኢዚ ጎቴ ጫርኮዛ ጮኡ ሂስቲዴስ፤ ኣባ ዳምባላካ ሲርጲ ሂስቲዴስ።

³⁰ ጮኡ ጊዳ ጊሻስ ኢስቲ ኡፋዬቲዳ፤ ኢስቲ ኣሞቲዛ ዎዴቤን ጋዴስ።

³¹ ሜርና ኢዛ ሲቆዛሲኔ ኢዚ ኣሳስ ኦዳ ማላሊሲዛ ሚሻታስ ኢስቲ ጎዳ ጋላቴቶ።

³² ኢስቲ ኢዛ ዴሬ ዱላታን ቁ ቁ ሂስቴቶ፤ ቃሴ ጪማታ ሺቆን ኢዛ ጋላቴቶ።

³³ ሻፋታ ሙሌራ ሜሊሲዴስ፤ ፑልቶቲ ፑልቶንታ ማላ ቴቂዴስ።

³⁴ ሄን ዴኢዛ ኣሳ ኢታቴ ጋሶን ኣራዳ ቢታዮ ኣይኮ ዶሊሶንታ ማጺኔ ቢታ ኦዴስ።

³⁵ ኢዚ ባዞን ሃ ኤሊሲዴስ ሜላ ቢታን ፑልቶይ ቃና ማላ ኦዴስ።

³⁶ ጋፊዳይታ ሄን ዎዴስ፤ ኢስቲካ ባንታስ ዴኣና ካታማ ኬጺዳ።

³⁷ ኢስቲ ባንታ ጎሻን ዜሪዳ፤ ዎይኔ ቶኪዳ፤ ዳሮ ካ ሺሺዳ።

³⁸ ኢዚ ኢስታ ኣንጂን ኢስቲ ኬሂ ጮራቲዳ፤ ኢስታ ሜሄታካ ጉቤና።

³⁹ ሜቶን፥ ዋዬኒኔ ጬጬን ጾኔቲን ኢስታ ቆዳይ ጉጺዴስ።

⁴⁰ ጎዳይ ሃላቃታ ካዉሺዴስ፤ ኦጌይ ባይንዳ ባዞን ቶይላታና ማላ ኢስታ ኦስ።

⁴¹ ጊዶ ኣቲን ኢዚ ሜቶታንቻታ ኢስታ ዋዬፔ ኬሲዴስ፤ ዶርሳ ዉዴ ማላ ጮራ ናይታካ ኢስታስ ኢሚዴስ።

⁴² ሱሬ ኣሳቲ ሄሳ ቤኢዲ ኡፋዬቴቴስ፤ ጊዶ ኣቲን ጌላታ ዶናይ ጎርዴታና።

⁴³ ኤራ ኣሲ ሃ ዮኦዛ ባ ዎዚናን ዎ፤ ኢዚካ ጎዳ ማሮቴ ኣኬኮ።