ዬ ማጻፋ 103 - ጋሞ ማጻፋ

ዳዊቴ ማዛሙሬ

¹ ታ ሼምፖዬ! ጎዳ ጋላታ! ታ ኩሜ ኣሳቴይ ኢዛ ጌሻ ሱን ጋላቶ።

² ታ ሼምፖዬ! ጎዳ ጋላታ! ኢዚ ኔስ ኦዳ ኪያቴ ኡባ ዶጎፓ።

³ ኢዚ ኔ ናጋራ ኡባ ኣቶ ጌስ፤ ኢዚ ኔ ሃርጌ ኡባፌ ኔና ፓስ።

⁴ ኢዚ ኔና ዱፎን ጌሎንታ ማላ ኣሼስ፤ ሜርና ሲቆኒኔ ማሮታን ኔና ኣንጄስ።

⁵ ጎሌ ካፎ ኔኒ ኦራጻና ማላ ኢዚ ኔ ኣሞ ኡባ ሎኦ ሚሻን ኩንና።

⁶ ጎዳይ ናቄቲዳይታስ ጺሎ ኦሲኔ ሱሬ ፒርዳ ፒርዴስ።

⁷ ኢዚ ባ ኦጌ ሙሴ ቤሲዴስ፤ ባ ኦሶካ ኢስራኤሌ ኣሳ ኤሪሲዴስ።

⁸ ጎዳይ ቃቲዛዴኔ ማሪዛዴ፤ ኢዚ ሃንቄታናስ ኤሶቶንታዴ፤ ኢዛ ሲቆይ ኬሂፔ ዳሮ።

⁹ ኢዚ ኡባ ዎዴ ኑ ሞሮስ ሞቴና፤ ሜርናስካ ሃንቄቴና።

¹⁰ ኢዚ ኑ ናጋራ ማላ ኑስ ኦቤና፤ ኑ ኢታቴ ማላ ኑስ ዛሪቤና።

¹¹ ሳሎይ ሳኣፔ ቂዛ ማላ ጎዳስ ያዪዛይታስ ኢዛ ሲቆይ ጊታ።

¹² ኣርሼይ ሞኪዛሶፔ ዉሊዛሶይ ሃኪዛ ማላ ጎዳይ ኑ ሞሮዛ ኑፔ ሃሲዴስ።

¹³ ኣዋይ ባ ናይታስ ቃቲዛ ማላ ጎዳይ ባስ ያዪዛይታስ ቃቴስ።

¹⁴ ኑኒ ኣዛፔ ሜቲዳኮ ኢዚ ኤሬስ፤ ኑኒ ቢታ ጊዲዳይሳካ ኢዚ ኣኬኬስ።

¹⁵ ኣሳ ዴኦይ ጊዲኮ ማታ ማላ፤ ኢዚ ባዞ ጪሻ ማላ ጪዬስ።

¹⁶ ጫርኮይ ጫርኪዛ ዎዴ ቆቆፌቲ ዬስ፤ ኢዚ ካሴ ዲዛሶይ ሙሌካ ኤሬቴና።

¹⁷ ጊዶ ኣቲን ጎዳስ ያዪዛይታስ ኢዛ ሲቆይ ሜርናፔ ሜርና ጋካናሳ፤ ኢዛ ጺሎቴይካ ዬሌታፔ ዬሌታ ጋካናሳ።

¹⁸ ሄሲ ሃናናይ ኢዛ ጫቆ ቃላ ናጊዛይታሲኔ ኢዛ ኣዛዞ ፖላናስ ሚኔቲዛይታሳ።

¹⁹ ጎዳይ ባ ኣራታ ሳሎን ኤሲዴስ፤ ኢዛ ካዎቴይ ኡባ ሃሬስ።

²⁰ ኢንቴኖ ኢዛ ኪታንቻቶ! ኢዛ ኣዛዞ ፖሊዛ ዎልቃማቶ! ኢዚ ጊዛይሳ ኤዝጊዛይቶ! ጎዳ ጋላቲቴ።

²¹ ኢንቴኖ ሳሎን ዴኢዛ ሚኖቶ! ኢዛ ሼኔ ኦዛ ኣይሌቶ! ጎዳ ጋላቲቴ።

²² ኢንቴኖ ኢዚ ሃሪዛ ሶሆ ኡባን ዴኢዛ ሜታቶ! ኡባይካ ጎዳ ጋላቲቴ። ታ ሼምፖዬ! ጎዳ ጋላታ።