ዬ ማጻፋ 10 - ጋሞ ማጻፋ

¹ ኣቤት ጎዳዉ! ኔ ኣይስ ሃካዳ ኤቃይ? ሜቶ ዎዴንካ ኣይስ ጌማይ?

² ኢታ ኣሳቲ ኦቶሬቴቴስ፤ ሂዬሳታካ ዬዴቴስ፤ ኢስቲ ሃራስ ዎዳ ዎጺማዴን ዛሪ ኦይኬቴቶ።

³ ኢታ ኣሲ ባ ዎዚና ኣሞን ጬቄቴስ፤ ዮራይ ጎዳ ጫዬሲኔ ካዴስ።

⁴ ኢታ ኣሲ ኦቶሬቴን ጾሳ ኮዬና፤ ኢዛ ቆፋ ኡባን ጾሲ ዴና።

⁵ ኡባ ሚሺ ኢዛስ ኩሜስ፤ ኔ ዎጋይ ኢዛስ ጌሌና፤ ኦቶራንቻይ ኔ ዎጋፔ ሃኬስ፤ ሄሳ ጊሻስ ባ ሞርኬታ ቦላን ኢዚ ቂልጬስ።

⁶ ባ ዎዚናን ኢዚ፥ «ታና ኣይኮይካ ቃና፤ ታና ሙሌካ ሜቶይ ጋኬና» ጊዲ ቆፔስ።

⁷ ኢዛ ዶናን ቃንጌ፥ ዎርዶይኔ ማንዴይ ኩሚዴስ፤ ኢዛ ኢንጻርሳን ጌኔይኔ ባሌይ ዴስ።

⁸ ዴሬ ጊዶን ጌማሶን ዙጊ ኡቴስ፤ ማዶይ ባይንዳይታ ይሳናስ ናጌቴስ፤ ጺሎ ኣሳታ ጌማን ዎስ።

⁹ ባ ቆቴቲዛሶን ጌሚዲ፥ ሂዬሳ ኦይካናዉ ጋሞ ማላ ዙጌስ፤ ማዶይ ባይንዳይታ ባ ዎጺማዴን ኦይኪዲ ጎቺ ኤፌስ።

¹⁰ ማዶይ ባይንዳይኔ ሂዬሳይ ኢዛ ኩሼን ኩንዴስ፤ ኢዚካ ኢስታ ኒፒ ሂስቲ ሜንሬስ።

¹¹ ኢታ ኣሲ ባ ዎዚናን፥ «ጾሲ ታና ዶጊዴስ፤ ባ ሲን ታፔ ጌንዴስ፤ ሙሌካ ኢዚ ታና ቤኤና» ጌስ።

¹² ኣቤት ጎዳዉ! ዴንዳ። ጾሶ! ኔ ኩሼዛ ቁ ሂስታ ዴን፤ ማዶይ ባይንዳ ሜቶታንቻታ ዶጎፓ።

¹³ ኢታ ኣሲ ጾሳ ኣይስ ካዜ? ባ ዎዚናንካ፥ «ጾሲ ታና ቃጻዬና» ኣይስ ጊዜ?

¹⁴ ጊዶ ኣቲን ጾሶ! ኔኒ ሜቶዛኔ ዋዬዛካ ቤያሳ፤ ኔኒ ኡባ ዎዴ ማዳናስ ጊጋ ኡታዳሳ፤ ኔኒ ዪኦታ ማዳሳ፤ ማዶይ ባይንዳይቲካ ባና ኔስ ሼቴስ።

¹⁵ ጌኔ ኣሳታ ዎልቃ ሜን፤ ኢታ ኣሳታ ዎልቃካ ሊቂሳ፤ ኢስቲ ናምኣን ኢታ ኦንታ ማላ ኢስታ ኦሶ ማላ ኢስታ ቃጻያ።

¹⁶ ጎዳይ ሜሪፔ ሜርናስ ካዎቲዲ ዴስ፤ ሃራ ካዎቴቲ ኢዛ ቢታፌ ያና።

¹⁷ ኣቤት ጎዳዉ! ኔኒ ሂዬሳታ ኣሞ ኤራሳ፤ ኢስታ ዎሳካ ሲያዳ ሚንሳ።

¹⁸ ኦኒካ ኢስታ ያሺሶንታ ማላ ማዶይ ባይንዳይታሲኔ ዪኦታስ ኔ ፒርዳ።