ሌሚሶ ማጻፋ 8 - ጋሞ ማጻፋ

ኣ ኤራቴ ሳባ

¹ ሲዪቴ! ኣ ኤራቴያ ባ ቃላ ዶቁ ሂስታ ጼይጌኬ? ኣኬካይካ ባ ጬንጉርሳ ቁ ሂስታ ሲሴኬ?

² ኦጌ ዶናን ዴኢዛ ዙምቡላታ ቦላኔ ዳጋላ ኦጌታን ኤቃዉስ።

³ ጊምቤዛ ላንቄን ካታማታ ጌሊዛ ፔንጌን ኤቃዳ ባ ቃላ ቁ ሂስታዳ፥

⁴ ሃይቶ ኣሳቶ! ታኒ ኢንቴና ጼይጋይስ፤ ታኒ ኣሳ ዜሬ ኡባ ጼይጋይስ።

⁵ ኢንቴኖ ኣኬካይ ፓጪዳይቶ! ዎዚናማ ጊዲቴ፤ ኢንቴኖ ኤያቶ ኣኬካ ዴሚቴ።

⁶ ታኒ ጎኢዛ ሚሽ ዮቲዛ ጊሻስ ኤዝጊቴ፤ ታ ዶናፔ ሱሬ ዮኦይ ኬዜስ።

⁷ ታ ዶናይ ቱማ ሃሳዬስ፤ ታ ሜቴርሻቲካ ኢታ ሚሽ ኢጼቴስ።

⁸ ታ ዶናፔ ኬዚዛ ቃላቲ ኡባይ ቱማ፤ ጌላ ዎይኮ ቦካ ጊዴቴና።

⁹ ኣኬካይ ዲዛ ኣሳስ ታ ሃሳያይ ሊኬ፤ ኤራቴ ዲዛይታስ ታ ሃሳያን ዎርዶይ ዴና።

¹⁰ ቢራፔ ኣዲ ታ ዞሬ ኤኪቴ፤ ሙሩታ ዎርቃፌ ኣዲ ኤራቴ ዶሪቴ።

¹¹ ኣይስ ጊኮ፥ «ታኒ ኣ ኤራቴ ዞኦ ኢንቁፌካ ኬሃ ኣልኣይስ፤ ኔኒ ኣሞቲዛ ሚሽ ኡባይካ ታናራ ጊናታናስ ዳንዳዬና።

¹² ታኒ ኣ ኤራቴ ኣኬካራ ዳይስ፤ ኤራቴኔ ዎዚናማቴ ታ ሚሻታ።

¹³ ጎዳስ ያሻቴ ኢታ ኢጾ፤ ታኒ ኦቶሮኔ ሃላጫ፥ ሜንጼ ኢታቴኔ ጌላ ሃሳያ ኢጻይስ።

¹⁴ ዞሬይኔ ሎኦ ፒርዳይ ታይታ፤ ታስ ኣኬካይኔ ዎልቃይ ዴስ።

¹⁵ ካዎቲ ታናን ካዎቴቴስ፤ ዴሬ ኣይሲዛይቲ ሱሬ ዎጋ ኬሴቴስ።

¹⁶ ዳናቲ ታኒ ማዲን ዴራ ኣይሴቴስ፤ ዴራ ሃሪዛ ጊታ ኣሳቲ ኡባይ ሃሬቴስ።

¹⁷ ታና ሲቂዛይታ ታኒ ሲቃይስ፤ ሚኒ ኮይዛይቲ ታና ዴማና።

¹⁸ ዱሬቴኔ ቦንቾይ ታ ማታን ዴቴስ፤ ዉሮንታ ኣቆታይኔ ኢንጄይ ታ ማታና።

¹⁹ ኢንቴ ታፔ ዴሚዛ ጎኣይ ሙሩታ ዎርቃፌ ኣስ፤ ታ ኢሞታይካ ሴሪሲ ኬሲዳ ቢራፔ ዳሬስ።

²⁰ ታኒ ጺሎቴ ኦጌን ሄሜታይስ፤ ሱሬ ፒርዳ ካላይስ።

²¹ ታና ሲቂዛይታስ ታኒ ዱሬቴ ኢማና፤ ኢስታ ሚንጃ ኬካ ታኒ ኩንና።

²² «ጎዳይ ታና ባ ኦሶ ኡባፌ ኮይሮ ሜዴስ፤ ቤኒፔካ ኢዛ ኦሳስ ኮይሮይ ታና።

²³ ሳሎይኔ ሳኣይ ሜታናፔ ካሴ ቤኒ ሜርናሶፌ ታኒ ሹሜታዲስ።

²⁴ ዎጋ ጊታ ኣባቲ ባይንዳ ዎዴ፥ ሃ ፑልቶቲ ቃናፔ ካሴ ታኒ ዬሌታዲስ።

²⁵ ዙማቲኔ ዙምቡላቲ ሜታናፔ ካሴ ታኒ ዬሌታዲስ።

²⁶ ጎዳይ ሳኣኔ ሳኣ ቦላ ዲዛ ዴምባታ ዎይኮ ኣላሜ ቦላ ዲዛ ጉዱላታ ሜናፔ ካሴ ታኒ ዬሌታዲስ።

²⁷ ጎዳይ ሳሎታ ሚጪዳ ዎዴኔ ጊታ ኣባታፔ ቦላራ ሳሎ ጉፋን ጊግሲዳ ዎዴ ታኒ ሄን ዴኣይስ።

²⁸ ጎዳይ ሻራታ ቦላን ዎዳ ዎዴ፥ ጊታ ኣባ ፑልቶታ ሲዳ ዎዴ፥

²⁹ ኣባ ሃቲ ባንታስ ኢሜቲዳ ዛዋፔ ፒኒዲ ኣንታ ማላ ዛዋ ዎዳ ዎዴ፥ ሳኣስ ዮች ዬጊዳ ዎዴ፥

³⁰ ሄ ዎዴ ታኒ ኢዛ ማታን ዋና ኦሳንቻ፤ ኡባ ጋላስ ታኒ ኡፋይሳን ኩማይስ፤ ታኒካ ኢዛ ሲንን ኡፋዬታይስ።

³¹ ኢዛስ ጊዲዳ ኣላሜ ኡባን ታ ኡፋዬታይስ፤ ኣሳ ናይታንካ ታ ኡፋዬታይስ።

³² «ሃኢካ ታ ናይቶ! ታኒ ጊዛይሳ ኤዝጊቴ፤ ታ ኦጌ ናጊዛይቲ ኣንጄቲዳይታ።

³³ ታ ቲሚርቴ ሲዪቴ፤ ኣ ኤራንቻታ ጊዲቴ፤ ዉዳ ዮፒቴ።

³⁴ ታኒ ዮቲዛይሳ ሲዪዛ ኣሲ፥ ሃች ሃች ታ ፔንጌን ቤቲዛ ኣሲ፥ ታሶ ጌሊዛሶንካ ናጊዛ ኣሲ ኣንጄቲዳዴ።

³⁵ ታና ዴሚዳይ ዴኦ ዴሜስ፤ ጎዳፔ ኢዚ ሳባ ዴሜስ።

³⁶ ጊዶ ኣቲን ታና ዴሞንታ ኣጊዳ ኣሲ ባና ቆሄስ፤ ታና ኢጺዛ ኡባቲ ሃይቆ ሲቄቴስ» ጋዱስ።