ሌሚሶ ማጻፋ 5 - ጋሞ ማጻፋ

ላይማቴፌ ናጌቴ

¹ ታ ናዞ! ታ ኣ ኤራቴ ኔ ዎዚናን ዎ፤ ታኒ ኣኬካን ዮቲዛ ቃላ ሎኤ ኤዝጋ።

² ሄሲካ ዎዚናማቴ ኔስ ሚሽ ጊዳና ማላኔ ኔ ሜቴርሻቲ ኤራቴ ናጋና ማላሳ።

³ ላይማ ማጫሳ ኢንጻርሳፌ ኤሳ ኢሊሎይ ጾኬስ፤ ኢዚ ሃሳያይ ኦይሳፌካ ኣ ሹጌስ።

⁴ ጊዶ ኣቲን ኢዛ ዉርሴን ጎዳሬ ኡ ማላ ጫማዉስ፤ ናምኡ ባጋራ ቃንጺዛ ቃራ ማሻ ማላ።

⁵ ኢዚ ቶሆቲ ዱጌ ሃይቆሶ ቤቴስ፤ ኢዚ ታንጎይ ሲቲ ሂስቲ ዱጌ ዱፎን ካሌስ።

⁶ ኢዛ ዴኦ ኦጌስ ዉዱ ጉኩ፤ ኢዚ ኦጌቲ ጌላ፤ ጊዶ ኣቲን ጌላ ጊዲዳይሳካ ኢዛ ኤሩኩ።

⁷ ታ ናይቶ! ታና ኤዝጊቴ፤ ታ ዮቲዛ ቃላፔ ኬኦፒቴ።

⁸ ኢንቴ ኦጌ ኢዚፔ ሃሲቴ፤ ኢዚ ፔንጌራካ ኣፍቴ።

⁹ ሄሲካ ኢንቴ ኢንቴ ጎባቴ ሃራታስ፥ ኢንቴ ላይካ ሜንጼ ኢታታስ ኢንቴ ኢሞንታ ማላሳ።

¹⁰ ኣላጋቲ ኢንቴ ኣቆታን ካኦንታ ማላኔ ኢንቴ ዳቡራንካ ሃራ ኣሳሶይ ዱሬቶንታ ማላሳ።

¹¹ ኢንቴ ኣሾይ ዉሪን፥ ኢንቴ ሜቄ ጊልቂን ዉርሴ ላይን ኢንቴ ጎታራና።

¹² ቃሴካ ኔኒ፥ «ታኒ ኣይስ ሴራ ኢጻዲና! ታ ዎዚናይካ ዞሬ ኣይስ ካዴ!

¹³ ታና ታማርሲዛይቲ ዮቲዳይሳ ኤካቤኬ፤ ታና ዞሪዛይታ ዞሬዛካ ኤዝጋቤኬ።

¹⁴ ሄሳ ጊሻስ ታኒ ሺቂዳ ዱላታ ሲንፌ ያና ማታዲስ» ጋና።

¹⁵ ኔኒ ኤሊሲዳ ኔ ፑልቶ ሃፌ ኡያዳ ኣሊዛ ማላ ኔ ማቼይስ ኣማኔታዳ ኢዚ ሲቆን ኣላ።

¹⁶ ቤታ ቤታ ማጫሲ ኡዪዛ ፑልቶ ሃ ጊዶፓ።

¹⁷ ኔናቴ ኔ ማቼይስ ናጋ፤ ሃራ ማጫሳራ ዚንኦፋ።

¹⁸ ኔ ማቼያ ኔስ ኣንጄቲዳ ፑልቶ ጊዱ፤ ዬላጋቴን ኔኒ ኤኪዳ ኔ ማቼይራ ኡፋዬታ።

¹⁹ ሎኢዛ ጋራ ማላኔ ኡፋይሲዛ ጌኔሳ ማላ፥ ኢዚ ንቲ ኡባ ዎዴ ኔና ኣሌቶ፤ ኢዚ ሲቆይ ኔና ኡባቶ ኦይኮ።

²⁰ ታ ናዞ! ላይማ ማጫሳይ ሲቆን ኣይስ ማታይ? ሃራ ኣሳ ማቺራ ኣይስ ቆሜታይ?

²¹ ጋሶይካ ኣሲ ኦዛ ኡባ ጎዳይ ቤዬስ፤ ኢዚ ሄሜቲዛ ሄሜታ ኡባ ፒልጊ ጼሌስ።

²² ናጋራንቻ ኢዚ ኦዳ ናጋራይ ዛሪ ኦይኬስ። ኢዛ ናጋራ ጊቴይ ኢዛ ቃቼስ።

²³ ኢዚ ባ ኤያቴ ዳሮን ኦጌ ባላና፤ ባና ሃራና ዳንዳዮንታ ኣጊዳ ጊሻስ ኢዚ ሃይቃና።