ሌሚሶ ማጻፋ 31 - ጋሞ ማጻፋ

ካዎ ሊሙኤሌ ኣያ ባ ናዛስ ኢሚዳ ቲሚርቴ

¹ ካዎ ሊሙኤሌ ኣያ ካዎ ሊሙኤሌ ታማርሲዳ ቲሚርቴይ ሃይሳፌ ካሊዳይሳ።

² «ታ ናዞ! ታ ኡሎፔ ዎዳ ታ ናዞ! ታኒ ኣዲኔታ ዬሊዳ ታ ናዞ!

³ ማጫሳን ኔ ዎልቃ ዉርሶፋ፤ ካዎታ ባሺዛ ሚሻን ኔ ኣካታ ይሶፋ።

⁴ «ሊሙኤሌ ሃይሲ ካዎታስ ቤሴና፤ ካዎቲ ዎይኔ ኡሹ ኡያናስ ቤሴና፤ ዴሬ ኣይሲዛይቲ ማሲዛ ኡሹ ያሬታናስ ቤሴና።

⁵ ኢስቲ ኡዪዛ ዎዴ ዎጋ ባሌቴቴስ፤ ቆሄቲዳይታ ማታ ሱጌቴስ።

⁶ ሃይቃና ሃኒዛይታስ ማሲዛ ኡሹ ሜቶ ቦላ ዲዛይታስ ዎይኔ ኡሹ ኢሚቴ።

⁷ ኢስቲ ኡዪዲ ባንታ ማንቆቴ ዶጌቶ፤ ባንታ ቱጋካ ዛሪ ቆፖፌቶ።

⁸ «ባንታ ጊሻስ ሃሳያናስ ዳንዳዮንታይታስ ኔኒ ሃሳያ፤ ሜቶታንቻታ ማታ ጊሻስ ኔኒ ሞቴታ።

⁹ ሃሳያዳ ኢስታስ ሱሬ ፒርዳ ፒርዳ፤ ሂዬሳታኔ ሜቶታንቻታ ማታ ቦንቺሳ» ጋዳ ታማርሳዱስ።

ዎዚናማ ማቾ

¹⁰ ዎዚናማ ማቾ ኦኒ ዴማናዉ ዳንዳይዜ? ኢዛ ዞኦ ኢንቁፌካ ኬሃ ኣዉስ።

¹¹ ኢዚ ኬ ኣዋይ ኢዞ ኡባ ሚሻንካ ኣማኔስ፤ ኢዛስ ኣይኮይካ ፓጬና።

¹² ኢዛ ባ ዴኦ ላይ ኡባን ኢዛስ ሎኦ ኣቲን ኢታ ሚሽ ኦኩ።

¹³ ዶርሳ ኢስኬፌኔ ታልባ ቡጻ ኤካዳ፥ ኦሶ ዶሲዛ ባ ኩሼን ሱቃዉስ።

¹⁴ ኢዛ ዛልኣንቻታ ማርካቤ ማላ፤ ባ ካ ሃኮ ቢታፌ ኤሃዉስ።

¹⁵ ኢዛ ባ ሶ ኣሳስ ቁማ ካናሲኔ ባ ማጫ ኣይሌታስ ኦሶ ሻካ ኢማናስ፥ ሳኣይ ቡሮ ዎንታና ጊሺን ዴንዳዉስ።

¹⁶ ኢዛ ባርካ ቆፓዳ ጎሻ ጋዴ ሻማዉስ፤ ባ ዴሚዳ ሚሻን ዎይኔ ቶካዉስ።

¹⁷ ኢዛ ሚናዳ ባ ኦሶ ፖላዉስ፤ ኢዚ ቄሴቲካ ኦሶስ ሚኖ።

¹⁸ ኢዛ ባ ኦሶስ ዎይ ዲዛይሳ ኣኬካዉስ፤ ኦማርሲካ ኢዚ ጾምፔይ ቶኤና።

¹⁹ ኢዛ ባ ሊቃቃን ሱቃዉስ፥ ባ ኣፋላ ዳዳዉስ።

²⁰ ኢዛ ሂዬሳታስ ባ ኩሼ ሚጫዉስ፤ ሜቶታንቻታስ ኪያቴ ኢማዉስ።

²¹ ኢዚ ሶ ኣሳይ ኡባይ ሆኢዛ ማይኦ ማይኢዳ፤ ሄሳ ጊሻስ ኢዛ ሻቺ ቡኪኮካ ሂርጉኩ።

²² ሂን ኦንጊዛ ማይኦ ኦዉስ፤ ላይኖኔ ኦቻ ቴራ ሚሳቲዛ ማይኦ ማይኣዉስ።

²³ ዴሬ ጪማቲ ዱቡሻ ሺቂዛሶን ኢዚ ኬ ኣዋይ ቦንቼቲዳ ኣሳ።

²⁴ ላይኖፔ ሴሎ ማይኦታ ኦዳ ባይዛዉስ፤ ዛልኣንቻታስካ ዳንጮ ዳዳ ሺሻዉስ።

²⁵ ኢዛ ሚኖኔ ፑላራ ዲዛ ማጫሳ፤ ኢዛ ዪዛ ላይታ ኡፋይሳን ሞካዉስ።

²⁶ ኣ ኤራን ኢዛ ሃሳያዉስ፤ ኢዚ ኢንጻርሳፌ ሱሬ ዞሬይ ኬኤስ።

²⁷ ኢዛ ባ ሶ ኣሳ ሃኖ ሎኤ ካላዉስ፤ ኣዛላ ሃኖይ ኢዚ ቦላን ቤቲ ኤሬና።

²⁸ ኢዚ ናይቲ ኢዞ፥ «ኣንጄቲዳሬ» ጌቴስ፤ ኢዚ ኬ ኣዋይካ ኢዞ ጋላቲሼ፥

²⁹ «ሎኦ ሚሽ ኦዳ ዳሮ ማጫሳቲ ዴቴስ፤ ጊዶ ኣቲን ኔኒ ኢስታ ኡባፌ ኣሳ» ጌስ።

³⁰ ማላ ሎኦይ ባሌስ፤ ፑላይካ ቆኬስ፤ ጊዶ ኣቲን ጎዳስ ያዪዛ ማጫሲ ኢዛ ኣንጄቲዳሮ።

³¹ ኢዚስ ቤሲዛ ኢሞታ ኢሚቴ፤ ኢዛ ኦዳ ኦሶይ ኡባይ ዱቡሻን ኢዞ ጋላቲሶ።