ሌሚሶ ማጻፋ 3 - ጋሞ ማጻፋ

ጎዳን ኣማኔቴ

¹ ታ ናዞ! ታኒ ኔና ታማርሲዛይሳ ዶጎፓ፤ ታ ኣዛዞታካ ኔ ዎዚናን ዎ።

² ኢስቲ ኔ ላይ ኣዱሳና፤ ኢሻሎ ዴኦኔ ሳሮቴ ኔስ ጉጃና።

³ ሲቆይኔ ቱማቴ ኔፔ ሃኮፌቶ፤ ኢስታ ኔ ቆን ቃቻ፤ ኔ ዎዚናንካ ጻፋ።

⁴ ሂስቲኮ ኔኒ ጾሳ ሲንኒኔ ኣሳ ሲንን ሳቤታናኔ ሎኦ ሱን ዴማና።

⁵ ኔኒ ፖሎ ዎዚናን ጎዳን ኣማኔታ፤ ኔኒ ኔ ኣኬካን ዜምፖፋ።

⁶ ኔኒ ቢዛ ኦጌ ኡባን ኢዛ ሲንሳ፤ ኢዚካ ኔ ቢዛ ኦጌ ሱሪሳና።

⁷ ኔርካ ኔና ኣ ኤራንቻ ጎፓ፤ ጎዳስ ያያ፤ ኢታፔካ ሃካ።

⁸ ሄሲ ኔ ቦላ ፓያ ዎና፤ ኔ ሜቄታካ ጻሊሳና።

⁹ ጎዳ ኔ ኣቆታን ቦንቻ፤ ቢታይ ኔስ ኢሚዛ ኣይፌ ኡባፌ ጼራ ኢዛስ ኢሞን ቦንቻ።

¹⁰ ኔ ሄሳ ኦኮ ኔ ጎታራቲ ኩሚ ፓላሃና፤ ኔኒ ዎይኔ ኡሹ ኣጊዛሶቲ ጪፒ ጊ ኩማና።

¹¹ ታ ናዞ! ጎዳ ሴራ ካፓ፤ ኢዚ ኔና ሃንቂዛ ዎዴካ ላንጮፋ።

¹² ኣዋይ ባ ሲቂዛ ና ሴሪዛይሳ ጎዳይካ ባ ዶሲዛ ና ሴሬስ።

¹³ ኣ ኤራቴ ዴማናስ ዎጺዛ ኣሲ፥ ኣኬካካ ባስ ሚሼ ኦዛ ኣሲ ኣንጄቲዳዴ።

¹⁴ ጋሶይካ ኢዚፔ ዴሚዛ ጎኣይ ቢራፔ ዴሚዛ ጎኣፔ ኣስ፤ ኢዚፔ ቤቲዛ ጎኣይ ዎርቃፌ ቤቲዛ ጎኣፔ ኣስ።

¹⁵ ኣ ኤራቴ ዞኦ ኢንቁፌ ኬሂ ኣልኦ፤ ኔኒ ዴማናስ ኣሞቲዛ ኡባይ ኢዚራ ጊናቴና።

¹⁶ ኢዛ ኡሻቻ ኩሼን ኣዱሳ ላይ፥ ሃዲርሳ ኩሼን ኣቆታኔ ቦንቾ ኦይካዱስ።

¹⁷ ኢዚ ኦጌቲ ኡፋይሲዛ ኦጌታ፤ ኢዛ ሄሜቲዛ ኦጌ ኡባይካ ሳሮ።

¹⁸ ኢዛ ባና ኢዲሚዛይታስ ዴኦ ሚ፤ ኢዞ ኦይኪዛይቲካ ኣንጄታና።

¹⁹ ጎዳይ ባ ኣ ኤራቴን ሳኣ ሜዴስ፤ ባ ኣኬካንካ ሳሎታ ኢስቲ ዲዛሶን ሚንዴስ።

²⁰ ሻፋቲ ኢዛ ኤራቴን ጎጌቴስ፤ ሻራቲ ኢራ ኢሜቴስ።

²¹ ታ ናዞ! ሱሬ ፒርዳኔ ሻኪ ኤሮ ናጋ፤ ኢስቲ ኔ ሲንፌ ሃኮፌቶ።

²² ኢስቲ ኔስ ዴኦ ጊዳና፤ ኔ ቆስካ ኣሌቆ ጊዳና።

²³ ሄ ዎዴ ኔኒ ኦጌን ሂርጋይ ባይንዳ ሄሜታና፤ ኔ ቶሆይካ ጴቴና።

²⁴ ኔኒ ኢቺዳ ዎዴ ባባካ፤ ኢቻዳካ ማልኦ ስኮ ስካና።

²⁵ ኣኬኮንታ ጋኪዛ ሜቶኔ ኢታታ ቦላ ጋኪዛ ይሳስ ባባካ።

²⁶ ኣይስ ጊኮ ጎዳይ ኔስ ኣማኔቲዛዴ ጊዳና፤ ኔ ቶሆይ ዎጺማዴን ኦይኬቶንታ ማላ ኢዚ ኔና ናጋና።

²⁷ ኔስ ማዳና ዎልቃይ ዲሺን ማዶ ቤሲዛይታስ ሎኦ ኦሶ ኣጎፋ።

²⁸ ሃኢ ኔስ ዲሺን ኔ ሾሮዛስ፥ «ሲማዳ ያ፤ ታኒ ኔስ ዎንቶ ኢማና» ጎፓ።

²⁹ ኔናን ኣማኔቲዲ ኔ ማታን ዲሺን ኔ ሾሮዛ ቦላ ኢታ ሚሽ ኦናስ ሃልቾፋ።

³⁰ ኔና ቆሆንታ ኣስ ጋሶይ ባይንዳ ጮ ሞቶፓ።

³¹ ጌኔ ኦዛ ኣሳታ ቁሎፋ፤ ኢስታ ኢታ ኦጌካ ካሎፋ።

³² ጋሶይካ ጎዳይ ኢታ ኦዛይታ ኢጼስ፤ ጊዶ ኣቲን ሱሬታስ ኢዚ ባ ዎዚና ቆፋ ቆንጪሴስ።

³³ ጎዳ ቃንጌ ኢታ ኦዛይታ ኬና፤ ጊዶ ኣቲን ኢዛ ኣንጆይ ጺሎታሶና።

³⁴ ኦቶሬቴን ቂልጪዛይታ ቦላ ጎዳይካ ቂልጬስ፤ ጊዶ ኣቲን ባንታና ካዉሺዛይታ ቦንቼስ።

³⁵ ኣ ኤራንቻቲ ቦንቾ ላታና፤ ኤያቲ ጊዲኮ ካዉሻቴስ ኣ ኢሜታና።