ሌሚሶ ማጻፋ 28 - ጋሞ ማጻፋ

¹ ኢታ ኣሲ ኦኒካ ዬዴንታ ባቃቴስ፤ ጊዶ ኣቲን ጺሎይ ጋሞ ማላ ዎዚና ኩሜ።

² ዴሬይ ማካሊኮ ሃሪዛይ ጮራቴስ፤ ጊዶ ኣቲን ኤራ ኣሲኔ ኣኬኪዛ ኣሲ ዎጋ ኤሴስ።

³ ሂዬሳታ ኡንኤዛ ዳናይ ካ ይሲዛ ዎልቃማ ኢራ ማላ።

⁴ ዎጋ ቦንቾንታ ኣሲ ሞራንቻታ ሳቤስ፤ ጊዶ ኣቲን ዎጋ ቦንቺዛይ ኢስታ ቆፋ ፓልቄስ።

⁵ ኢታ ኣሳታስ ሱሬ ፒርዳይ ጌሌና፤ ጊዶ ኣቲን ጎዳስ ጎይኒዛይቲ ኡባካ ኤሬቴስ።

⁶ ጌላ ኣስ ጊዲ ኡቲዲ ዱሬ ጊዳናፔ ቦሬይ ባይንዳ ሂዬሳ ጊዴ ሎኦ።

⁷ ዎጋ ናጊዛ ናይ ኣኬካንቻ፤ ጊዶ ኣቲን ጋንጃማታራ ዙፔቲዛይ ባ ኣዋ ዬላሴስ።

⁸ ቤሶንታ ዲሾን ባ ኣቆታ ዳጋሲዛ ኣሲ ሄ ኣቆታ ሂዬሳስ ኪዪዛ ኣሳስ ሺሼስ።

⁹ ዎጋ ሲያናፔ ባ ሃይ ዎራ ዛሪዛ ኣሳ ዎሳይ ጾሳ ሃራሴስ።

¹⁰ ሱሬታ ኢታ ኦጌ ካሌዛ ኣሲ ባ ቦኪዳ ኦላን ኩንዳና፤ ጊዶ ኣቲን ጌሻ ኣሲ ሎኦ ሚሽ ላታና።

¹¹ ዱሬ ኣሲ ባና ኣ ኤራንቻ ጊዲ ቆፔስ፤ ጊዶ ኣቲን ኣኬካይ ዴኢዛ ሂዬሳይ ኢዛ ፓጬስ።

¹² ጺሎቲ ጾኒዳ ዎዴ ኣሳይ ኡባይ ኡፋዬቴስ፤ ጊዶ ኣቲን ኢታቲ ማታ ኦይኪዳ ዎዴ ኣሳይ ባቃቴስ።

¹³ ባ ናጋራ ጌንዛ ኣሲ ኣጬና፤ ጊዶ ኣቲን ፓጺዛይኔ ናጋራ ኣጊዛይ ማሬታና።

¹⁴ ጎዳስ ኡባቶ ያዪዛ ኣሲ ኣንጄቲዳዴ፤ ጊዶ ኣቲን ባ ዎዚና ዳማሲዛ ኣሲ ሜቶን ጌላና።

¹⁵ ሂዬሳ ሃሪዛ ኢታ ዳናይ ጻጊዛ ጋሞኔ ጉፒ ኦይኪዛ ዛርዶ ማላ።

¹⁶ ዎዚናይ ፓጪዳ ዳናይ ሜንጼ ኢቴስ፤ ጊዶ ኣቲን ቤሶንታ ጎኣ ኢጺዛዴይ ዳሮ ላይ ዴኤስ።

¹⁷ ኣስ ዎዳ ኣሲ ሃይቃና ጋካናስ ቶይላቲሼ ዴስ፤ ኢዛ ኦኒካ ሺሺ ኤኬና።

¹⁸ ቦሬይ ባይንዳ ሄሜቲዛ ኣሲ ቆሄቶንታ ኣታና፤ ጊዶ ኣቲን ጌላ ኣሲ ኢሲ ጋላስ ኩንዳና።

¹⁹ ባ ጋዴ ጎዪዛ ሚኖ ኣሲ ካ ካሌስ፤ ጊዶ ኣቲን ሃዳ ዮኦ ካሊዛ ኣሲ ማንቆቴፌ ኬኤና።

²⁰ ኣማኔቲዳ ኣሲ ኬሂ ኣንጄታና፤ ጊዶ ኣቲን ዱሬታናስ ጃሚዛይ ቃጻዬቶንታ ኣቴና።

²¹ ሻኪዲ ማዶይ ሎኤና፤ ጊዶ ኣቲን ኣሲ ጉ ካስ ጊዲ ሞሮ ኦስ።

²² ኡዜቲዛ ኣሲ ዱሬታናስ ጃሜስ፤ ባና ሂዬሳቴ ኦይካናይሳካ ኤሬና።

²³ ኣስ ጮ ሳቢዛ ኣሳፔ ሴሪዛ ኣሲ ጉዬፔ ዶሴቴስ።

²⁴ ባ ኣዋፔኔ ባ ኣይፔ ካይሲዲ፥ «ታኒ ኣይኮካ ናጋራ ኦቤኬ» ጊዛ ኣሲ ባሺዛ ኣሳራ ኢሲ ማላ።

²⁵ ዪቄይ ኣሲ ኦሽ ዴንስ፤ ጊዶ ኣቲን ጎዳን ኣማኔቲዛይ ኣንጄቴስ።

²⁶ ባናን ኣማኔቲዛ ኣሲ ኤያ፤ ጊዶ ኣቲን ኣ ኤራቴን ሄሜቲዛይ ሳሮን ዴኤስ።

²⁷ ሂዬሳስ ኢሚዛ ኣሳስ ፓጬና፤ ጊዶ ኣቲን ኢስቲ ቤኢሼ ቤኦንታ ሃኒዛዴ ቃንጌ ጋካና።

²⁸ ኢታ ኣሳቲ ማታ ዴሚዛ ዎዴ ዴሬይ ባቃቴስ፤ ጊዶ ኣቲን ኢስቲ ይዛ ዎዴ ጺሎቲ ጮራቴቴስ።