ሌሚሶ ማጻፋ 27 - ጋሞ ማጻፋ

¹ ዎንቶይሳን ጬቄቶፋ፤ ዎንቶ ኣዚ ሃናናኮ ኔ ኤራካ።

² ኔና ሃራ ኣሲ ጋላቶፔ ኣቲን ኔርካ ኔና ጋላቶፓ፤ ሃራ ኣሲ ኔና ሳቦፌ ኣቲን ኔኒ ኔርካ ኔና ሳቦፋ።

³ ሹቺ ዴጾ፤ ኣንጮይ ቶኮ፤ ጊዶ ኣቲን ኤያ ኣሲ ዴንዛ ኦሺ ናምኣታፔካ ዴጼስ።

⁴ ሼኔይ ሜንጼ ኢታ፤ ሃንቆይ ሜንጼ ኢታ፤ ቃናቴ ሲንን ኤቂ ዳንዳያናይ ኦኔ?

⁵ ጌሚዳ ሲቆፔ ቆንጬን ሴሪዛ ሴራይ ሎኦ።

⁶ ሞርኬይ ኔና ዳሮቶ ዬራናፔ ሲቆይ ኔና ዴቺዛይሲ ኪያ።

⁷ ካሊዳ ኣስ ኤሳ ኢሊሎይ ኢቴስ፤ ጊዶ ኣቲን ጋፊዳ ኣስ ጋራ ማላ ጫሚዛ ሚሺካ ማልኤስ።

⁸ ባ ሶ ኣጊዲ ዩዪዛ ኣሲ፥ ባ ኬፌ ሃካ ፓሊዛ ካፎ ማላ።

⁹ ሺቶይኔ ኤጻኔይ ኣስ ኡፋይሲዛይሳ ማላ፥ ሲቆ ላጌ ዞሬይካ ኡፋይሴስ።

¹⁰ ኔ ላጌኔ ኔ ኣዋ ላጌ ኣጎፋ፤ ኔ ኢሻኮ ቦፓ። ሃሆን ዲዛ ኢሻፔ ኔስ ማታን ዲዛ ሾሮይ ኪያ።

¹¹ ታ ናዞ! ኔኒ ኣ ኤራንቻ ጊዳ፤ ታ ዎዚና ኡፋይሳ፤ ሂስቲኮ ታና ካዛይታ ኦይሻካ ዛራና።

¹² ጪንጫ ኣሲ ሜቶይ ዪዛ ዎዴ ቤኢዲ ቆቴቴስ፤ ጊዶ ኣቲን ኣኬካይ ፓጪዳ ኣሲ ሜቶ ጋርስ ቢ ጌሌስ፤ ሂስቲዲ ጉዬፔ ቆሄቴስ።

¹³ ኤሮንታ ኣሳስ ሁርቡታ ጌሊዛ ኣሳ ማይኦ ቃራ ኤካ፤ ሃዉሻ ማጫሳስ ዋሴ ጌሊዛ ኣሳ ማይኦ ኦይካ።

¹⁴ ማላዶ ዎንታራ ባ ቃላ ቁ ሂስቲዲ ባ ሾሮ ኣንጆይ ቃንጌ ማላ ቆዴቴስ።

¹⁵ ኡባ ዎዴ ኦሽ ኦዬቲዛ ማቻ ኢራ ጋላስ ፓጬይ ባይንዳ ኣዛ ኬ ማላ።

¹⁶ ጫርኮ ቴቃናስ ዎይኮ ዛይቴ ጩጩሚዲ ኦይካናስ ዳንዳዬቶንታይሳ ማላ ኢዞ ጮኡ ኦናስ ዳንዳዬቴና።

¹⁷ ቢራታይ ቢራታ ቃራሲዛ ማላ ኣሲካ ኢሶይ ኢሳ ቃራሴስ።

¹⁸ ባላሴ ሚዮ ኢሻልሲዲ ናጊዳ ኣሲ ኢዚ ኣይፌ ማና፤ ባ ጎዳስ ኦዛ ኣሲ ቦንቼታና።

¹⁹ ሃይ ሄሬጋ ሲን ቤሲዛ ማላ ኣሳ ዎዚናይ ኢዛዴ ካንዶ ቤሴስ።

²⁰ ሃይቆይኔ ባሺ ካሊ ኤሬቴና፤ ሄሳካ ኣሳ ኣይፌይ ካሌና።

²¹ ቢራይኔ ዎርቃይ ታማን ፓጬቲዲ ጌይዛ ማላ ኣሲካ ባ ኤኪዛ ጋላታን ፓጬቴስ።

²² ኤያ ኣስ ካ ማላ ኡዱላን ዬጋዳ፥ ኡዱላ ሚን ጫዲዛኮካ ኢዛፔ ኤያቴ ኪቼና።

²³ ኔ ዶርሳቲ ዴኢዛ ሃኖታ ሎኤዳ ኤራ፤ ኔ ዉዴካ ዎዚናፔ ሄማ።

²⁴ ኣይስ ጊኮ ዱሬቴ ሜርናስ ዴኤና፤ ካላቻይካ ዬሌታፔ ዬሌታ ጋካናስ ሚኒ ዴኤና።

²⁵ ሜላ ማታይ ቡጬቲዳፔ፥ ኣጫ ማታይ ኬኢዳፔ፥ ዙምቡላታ ቦላን ዴኢዛ ማታይ ሺቂዳፔ ጉዬን፥

²⁶ ዶርሳታ ኢስኬፌ ኔኒ ኔስ ማይኦ ኬሳና፤ ዴይሻታን ኔስ ጎሻ ጋዴ ሻማና።

²⁷ ኣቲዳ ዴይሻታ ማ ኔሲኔ ኔ ሶ ኣሳስ፥ ኔ ማጫ ኣይሌታስካ ቁማ ጊዳናስ ኩሚ ፓላሃና።