ሌሚሶ ማጻፋ 26 - ጋሞ ማጻፋ

¹ ቦኔን ሻቺ፥ ካ ሺሺዛ ዎዴንካ ኢራይ ኮሾንታይሳ ማላ፥ ኤያስ ቦንቾይ ኮሼና።

² ካፎቲ ያኔ ሃ ፓሊሼ ኣስ ቆሆንታይሳ ማላ፥ ጋሶይካ ባይንዳ ቃንጊዛ ቃንጌ ኣስ ጋኬና።

³ ፓራሲ ሊሶ፥ ሃሬስ ኣንጫፋ ኮሺዛይሳ ማላ፥ ኤያ ዞኮዛስ ዱርቃ ኮሼስ።

⁴ ኤያ ኣሳስ ኢዛ ኤያቴ ማላ ዛሮፓ፤ ዛሪኮ ኔኒካ ኢዛ ማላ ጊዳና።

⁵ ጊዲኮካ ኤያስ ኢዛ ኤያቴ ቤሳ፤ ሂስቶንታ ኣጊኮ ኢዚ ባና ኤራንቻ ማላ ቆዳና።

⁶ ኤያ ኣሳ ቦላ ኪታ ዬዶይ ባርካ ባ ቶሆታ ቃንጺዛይሳ ማላ፤ ዎይኮ ዎዛ ማርዜ ኡሻ ማላ።

⁷ ኤያ ኣሳ ሌሚሶይ ሲሊዳ ቶሆ ማላ።

⁸ ኤያ ኣሳስ ቦንቾ ኢሞይ ያንባርሻ ቦላ ቃቺ ዎዲ ዩሺዛ ሹቻ ማላ።

⁹ ኤያ ኣሳ ሌሚሶይ ማቲዳ ኣሳ ኩሼን ኤቂዳ ኣጉን ማላ።

¹⁰ ኤያ ኣስ ዎይኮ ባስ ኦጌራ ካን ቢዛ ኣስ ኦሶስ ቃጻሪዛ ኣሲ ባ ዎንዳፌን ጮ ዴሚዳ ኣስ ዱኪ ማዱንዛ ኣሳ ማላ።

¹¹ ካናይ ባ ጮሺ ሲሚ ላጪዛ ማላ፥ ኤያይ ባ ኤያቴ ኦሶ ዛሪ ዛሪ ዬጌስ።

¹² ባርካ ባና፥ «ታኒ ኣ ኤራንቻ» ጊዛ ኣስ ቤያዲ? ኢዛፔ ኤያ ኣሳስ ሎኦ ቃዳይ ዴስ።

¹³ ኣዛላይ፥ «ኦጌን ጋሞይ ዴስ፤ ያሺዛ ጋሞይ ዎጋ ኦጌን ዩዬስ» ጌስ።

¹⁴ ፔንጌይ ባ ማጻፋ ቦላን ያኔ ሃ ቃጺዛ ማላ ኣዛላይካ ባ ሂጻን ያኔ ሃ ሺሬቲ ሺሬቲ ዎስ።

¹⁵ ኣዛላይ ባ ኩሼ ማዳን ዬዴስ፤ ጊዶ ኣቲን ፑዴ ባ ዶናን ዛራናስ ዋዬቴስ።

¹⁶ ኣዛላ ኣሲ ኣኬካን ዮቲዛ ላፑን ኤራንቻታፔ ባና ኣ ኤራንቻ ጊዲ ቆፔስ።

¹⁷ ባና ጋንታ ኣሳ ዮኦን ጉፒ ጌሊዛ ኣሲ ካና ሃይ ኦይኪዛ ኣሳ ማላ።

¹⁸ ጎዪዛ ኣሲ ታማ ጺፋ ኦሊዛ ማላ ዎይኮ ዎንዳፌ ዱኪዛ ማላ፤

¹⁹ «ታኒ ካሳስ ኦዲስ» ጊሼ ባ ላጌዛ ጪሚዛ ኣሲካ ሄሳ ማላ።

²⁰ ሚ ዉሪኮ ታማይ ቶኤስ፤ ዚጊርሲ ይኮ ኦሺ ኣቴስ።

²¹ ጺጺን ቦንቆ ዳርሲዛይሳ ማላኔ ሚ ታማ ዳርሲዛይሳ ማላ፥ ዶናማ ኣሲ ኦሽ ዳሪሴስ።

²² ዚጊርሳንቻ ቃላይ ማልኦ ቁማ ማላ ኣሳስ ዱጌ ማራጬ ጋኬስ።

²³ ዎዚናን ኢታ ሚሺ ዲሺን፥ ባ ኢንጻርሳን ሊቆ ቃላ ሃሳይዛ ኣሲ ቢራን ሜሼቲዳ ማና ሚሻ ማላ።

²⁴ ጌኔ ኣሲ ባ ዶናን ጪሜስ፤ ጊዶ ኣቲን ባ ዎዚናን ኢታቴ ጹንቴስ።

²⁵ ኢዛ ዎዚናን ላፑን ቱናቴ ኩሚ ኡቲዴስ፤ ሄሳ ጊሻስ ኢዚ ሎኦ ቃላ ሃሳይኮካ ኣማኖፓ።

²⁶ ኢዚ ባ ጌኔ ባሌን ጌንናስ ዳንዳዬስ፤ ጊዶ ኣቲን ኢዚ ኦዳ ኢታቴ ዱላታን ቆንጫና።

²⁷ ሃራታስ ኦላ ቦኪዛ ኣሲ ሄ ኦላን ባስ ኩንዳና፤ ሃራታ ቦላ ሹች ቡሉሊዛ ኣሳ ቦላ ሄ ሹቻይ ሲሚ ኢዛ ቦላ ኩንዳና።

²⁸ ዎርዶቲዛ ኢንጻርሲ ባ ቆሂዳ ኣሳታ ኢጻዉስ፤ ጪሚዛ ሜቴርሺካ ባሽ ኤሃዉስ።