ሌሚሶ ማጻፋ 24 - ጋሞ ማጻፋ

¹ ታ ናዞ! ኢታ ኣሳታ ማላ ጊዳርኪና ጎፓ፤ ኢስታራ ላጌቴካ ኔና ሎኦፖ።

² ኢስቲ ኡባቶ ማካላ ሚሽ ማቄቴቴስ፤ ባንታ ኢንጻርሳንካ ጌኔ ሃሳዬቴስ።

³ ኬ ኣ ኤራቴን ኬጼቴስ፤ ኣኬካንካ ሚኔስ።

⁴ ኤራይ ዴኢኮ፥ ኬ ኣልኦኒኔ ሎኦ ሚሻን ኩሜስ።

⁵ ዎዚናማ ኣሳስ ጊታ ዎልቃይ ዴስ፤ ኤራንቻ ኣሲካ ሚኖቴ ጉጄስ።

⁶ ኦላ ኦሌታናስ ኔስ ሎኦ ዞሬ ጾኖ ዴማናስካ ዳሮ ዞራንቻታ ኮሼስ።

⁷ ኤያ ኣሲ ኣ ኤራቴፌ ኬሂ ሃሆን ዴስ፤ ዱላታ ሲንን ኤቂዲ ሃሳያና ዳንዳዬና።

⁸ ኢታ ኦናስ ሃልቺዛ ኣሲ «ጌናንቻ» ጌቴቴስ።

⁹ ኤያቴ ቆፋይ ናጋራ፤ ቂልጪዛዴ ኣሲ ኢጼስ።

¹⁰ ኔኒ ሜቶ ጋላስ ላፊኮ፥ ኔ ዎልቃይ ኣይ ማላ ጉ?

¹¹ ሃይቆስ ላጌቲ ቢዛይታ ኣሻ፤ ሹኬታናስ ጎሼቲ ቢዛይታ ኣሻ።

¹² ኔኒ፥ «ታ ሃይሳ ኤሪኬ» ጊኮ፥ ዎዚና ፒልጊ ኤሪዛይሲ ኢዚ ኣኬኬኔ? ኔ ሼምፖ ናጊዛይሲ ኤሬኔ? ኣስ ኡባስ ኢዛ ኦሶ ኦሶ ማላ ኢሜኔ?

¹³ ታ ናዞ! ሎኦ ጊዲዳ ጊሻስ ኤሳ ማ፤ ኢሊሎ ኤሲ ዶናን ማልኤስ።

¹⁴ ኣ ኤራቴካ ሄሳ ማላ፤ ኢዚ ኔ ሼምፖስ ማልኦ ጊዲዳይሳ ኤራ። ኔኒ ኢዞ ዴሚዛ ጊዲኮ ዎንቶ ኔስ ዜምፖ ጊዳና፤ ኔ ሂዶታይካ ሃዳ ጊዴና።

¹⁵ ጺሎ ኣሳ ኬ ቦንቃናስ ፓንጋ ማላ ዛማዶፓ፤ ኢዛ ኬ ቦላ ሜቶ ጋፋ።

¹⁶ ጺሎ ኣሲ ላፑንቶ ኩንዲኮካ ዴንዴስ፤ ጊዶ ኣቲን ኢታቲ ሜቶን ዬቴስ።

¹⁷ ኔ ሞርኬይ ኩንዲዛ ዎዴ ኡፋዬቶፋ፤ ኢዚ ጴቲዛ ዎዴካ ኔ ዎዚናን፥ «ሃሹ!» ጎፓ።

¹⁸ ኔ ሂስቶንታ ኣጊኮ ጎዳይ ሄሳ ቤኢዲ ኡፋዬቴና፤ ኢዚ ባ ሃንቆዛ ኔ ሞርኬዛ ቦላፌ ዛራና።

¹⁹ ኢታ ኣሳታ ኦሶን ጬጮፓ፤ ኢስታ ማላ ጊዳርኪና ጎፓ።

²⁰ ኢታ ኣሳስ ሂዶታይ ባዋ፤ ኢታታ ጾምፔይ ቲፒ ጊዲ ቶኣና።

²¹ ታ ናዞ! ጎዳሲኔ ካዋስ ያያ፤ ማካሊዛይታራካ ዙፔቶፓ።

²² ኣይስ ጊኮ ሄሳ ማላ ኣሳታ ቆፖንታ ሜቶይ ጋኬስ፤ ካዎፔኔ ጎዳፔ ያና ሜቶ ኦኔ ኤሪዛይ?

ኣ ኤራንቻይ ጉጂ ዮቲዳ ሃራ ሌሚሶታ

²³ ኣ ኤራንቻቲ ጉጂዲካ ሃይሳ ጊዳ፤ ፒርዲሼ ማዶ ፒርዳይ ሎኦ ጊዴና።

²⁴ ሞራንቻ፥ «ኔኒ ጺሎ» ጊዛዴ ዴሬይ ቃንጌስ፤ ካዎቴቲካ ኢዛ ሂሌቴስ።

²⁵ ጊዶ ኣቲን ሞራንቻ፥ «ኔኒ ሞራዳሳ» ጊዛይታ ኢስታራ ሎኦ ሚሺ ጋይታና፤ ኢስታስ ኬሂ ዳሮ ኣንጆይ ያና።

²⁶ ሱሬ ዛሮ ኢሞይ ዶና ዬሬቴ ማላ።

²⁷ ካሴታዳ ኔ ካሬን ዲዛ ኦሶ ኦ፤ ኔ ጎሻ ጊጊሳ፤ ሄሳፌ ጉዬ ኔ ኬ ኬጻ።

²⁸ ኔ ሾሮዛ ቦላ ጋሶይ ባይንዳ ማርካቶፋ፤ ኔ ዶናንካ ጪሞፋ።

²⁹ ኢዚ ታስ ኦዳ ማላ ታኒ ኢዛስ ኦና፤ «ታኒ ኢዛስ ኢዛ ኦሶ ኩሼ ዛራና» ጎፓ።

³⁰ ታኒ ኣዛላ ኣሳ ጋዴራ ኣዲስ፤ ኣኬካይ ፓጪዳ ኣሳ ዎይኔ ቱራ ጊዶራ ካንዲስ።

³¹ ኡባሶን ኣጉን ሞኪዴስ፤ ጋዳ ሻራፋይ ጎዚዴስ፤ ጊምቤይካ ላሌቲዴስ።

³² ታኒ ቤኢዳይሳ ዩሻ ቆፓዲስ፤ ታኒ ቤዮይሳፌ ቲሚርቴ ዴማዲስ።

³³ ኔኒ፥ «ጉራ ሊጲጲ ጋይስ፤ ጉራ ስካ ኤካይስ፤ ኔ ኩሼዛካ ሺሻዳ ጉራ ሼምፓ ኤካይስ» ጊኮ፥

³⁴ ማንቆቴ ኔ ቦላ ፓንጋ ማላ ያና፤ ፓጬይካ ኦላ ሚሻ ኦይኪዳ ኣሳ ማላ ፑቱ ጋና።