ሌሚሶ ማጻፋ 23 - ጋሞ ማጻፋ

¹ ኔኒ ዴሬ ሃሪዛይሳራ ካ ማናስ ኡቲዳ ዎዴ፥ ኔ ሲንን ዴኢዛይሳ ሎኤዳ ኣኬካ።

² ኔኒ ዳሮ ዮራ ኣስ ጊዲኮ፥ ኬሂፔ ናጌታ።

³ ኢዚ ኔና ፓጫናስ ዳንዳይዛ ጊሻስ፥ ሺቂዳ ማልኦ ቁማስ ዪቄቶፓ።

⁴ ዱሬታና ጋዳ ዳቡሮፓ፤ ሃይሳ ማላ ቆፋ ኣጋናስ ኣኬካንቻ ጊዳ።

⁵ ሄሳ ማላ ዱሬቴ ቦላ ኔኒ ኔ ኣይፌ ዎኮ ሄራ ያና፤ ቄፌ ኬሲዳ ጎሌ ካፎ ማላ ሳሎራ ፓላና።

⁶ ኡዜ ኣሳ ካ ሞፓ፤ ማልኢዛ ኢዛ ካ ማናስ ኣሞቶፋ።

⁷ ቆፔ ቆሞን ኢዚ ኔና፥ «ማ፤ ኡያ» ጌሲፔ ኣቲን ኢዛ ዎዚናይ ኔናራ ዴኤና።

⁸ ኔኒ ሚዳ ጉ ካይካ ኔና ጮሻና፤ ኔ ጋላታይካ ሃዳ ጊዳና።

⁹ ኤያራ ሃሳዮፓ፤ ኣይስ ጊኮ ኔ ኣ ኤራ ሃሳያ ኢዚ ካና።

¹⁰ ቤኒሶፌ ዲዛ ሳ ሾዶፋ። ቃሴ ዪኦ ናይታ ጋዴ ሱጎፓ፤

¹¹ ኣይስ ጊኮ ኢስታ ኣሺዛ ጎዳይ ሚኖ፤ ኢዚ ኢስታ ጊሻስ ኔናራ ሞቴታና።

¹² ኔ ዎዚና ዞሬስ፥ ኔ ሃይካ ኤራቴ ቃላኮ ዛራ።

¹³ ኔ ና ሴራናፔ ጉዬ ጎፓ፤ ኔኒ ቂርጩንቻን ሾጪኮ ኢዚ ሃይቄና።

¹⁴ ኔኒ ቂርጩንቻን ሾጫ፤ ኢዛ ሼምፖ ሃይቆፔ ኣሻ።

¹⁵ ታ ናዞ! ኔ ዎዚናይ ኣ ኤራንቻ ጊዲኮ ታ ዎዚናይካ ኡፋዬቴስ።

¹⁶ ኔ ኢንጻርሳይ ሱሬ ሃሳይዛ ዎዴ ታ ዎዚናይ ኡፋዬቴስ።

¹⁷ ናጋራንቻታ ቦላ ቃናቶፓ፤ ጊዶ ኣቲን ኡባቶ ጎዳስ ያሻቴ ኣጎፋ።

¹⁸ ሂስቲኮ ኔስ ሲንፌ ኪያና፤ ኔ ሂዶታይ ሃዳ ጊዴና።

¹⁹ ታ ናዞ! ሲያ፤ ዎዚናማ ጊዳ፤ ኔ ዎዚናይ ሱሬ ኦጌፔ ካሬ ኬዞፖ።

²⁰ ዳሮ ዎይኔ ኡሹ ኡዪዛይታራኔ ኣሾ ሙሳስ ያሬቲዛይታራ ዙፔቶፓ።

²¹ ኣይስ ጊኮ ማቲዛይቲኔ ዮራቲ ማንቃና፤ ስኮ ዳሮይ ጫርቃ ማይዜስ።

²² ኔና ዬሊዳ ኣዋይ ዮቲዛይሳ ሲያ፤ ኔ ኣዪያካ ጬጊዳ ዎዴ ካፓ።

²³ ቱማ ሻማፌ ኣቲን ሙሌካ ባይዞፓ፤ ኣ ኤራቴ፥ ሴራኔ ኣኬካ ኔስ ሚሼ ኦ።

²⁴ ጺሎ ና ኣዋይ ኬሂፔ ኡፋዬቴስ፤ ዎዚናማ ና ዬሊዳ ኣሲካ ኢዛን ኡፋዬቴስ።

²⁵ ኔ ኣዋይኔ ኔ ኣያ ኡፋዬቴቶ፤ ኔና ዬሊዳራካ ኡፋዬቱ።

²⁶ ታ ናዞ! ኔ ዎዚና ሃ ታኮ ዛራ፤ ኔ ኣይፌቲ ታ ኦጌፔ ካሬ ኬዞፔቶ።

²⁷ ኣይስ ጊኮ ላይማ ማጫሳያ ጪማ ኦላ ማላ፤ ላጌ ማቻ ጹን ኦላ ማላ።

²⁸ ኢዛ ፓንጋ ማላ ዛማዳ ናጋዉስ፤ ኣማኔቶንታ ኣዴታ ዴሬ ጊዶን ዳርሳዉስ።

²⁹ «ዎ!» ጊዛ ዋሶይ ኦሴ? ጬጬይ ኦሴ? ኦሺ ኦሴ? ዙዙን ኦሴ? ጋሶይካ ባይንዳ ማዱን ኦሴ? ኣይፌይ ዞኢዛይ ኦሴ?

³⁰ ዎይኔ ኡሹ ኡዪሼ ጋምኢዛይታስ ጊዴኔ? ዋላኬቲዳ ዎይኔ ኡሹ ዩዪ ዩዪ ጋንጺዛይታስ ጊዴኔ?

³¹ ዎይኔ ኡሺ ዞኢዳ ዎዴ፥ ኢዛ ሜይ ቢሪሌ ጊዶን ጶሊዛ ዎዴ፥ ዱቂሺን ጮሮሩ ጊ ጌሊዛ ዎዴ ኢዛ ቲሺ ሂስታ ጼሎፋ።

³² ዉርሴን ኢዚ ሾሻ ማላ ዱኬስ፤ ጎፔ ሾሻ ማላካ ባ ዪሻ ፑኬስ።

³³ ኔ ኣይፌይ ቤዪ ኤሮንታዝ ቤያና፤ ኔ ዎዚናይካ ኤሉሜታና።

³⁴ ኔኒ ኣባ ጊዶን ዲዛ ማርካቤ ጼራን ኢቺዳ ኣሳ ማላ ጊዳና።

³⁵ ኔኒ፥ «ኢስቲ ታና ዴቺዳ፤ ጊዶ ኣቲን ታኒ ቆሄታቤኬ፤ ኢስቲ ታና ዋዳ፤ ጊዶ ኣቲን ታስ ኤሬቲቤና። ሃራ ኡሻ ኡያናስ ታኒ ኣዉዴ ዴንዳንዲናሻ?» ጋና።