ሌሚሶ ማጻፋ 22 - ጋሞ ማጻፋ

¹ ሎኦ ሱን ዳሮ ዱሬቴፌ ኣስ፤ ኣሳ ማታን ቦንቼቴካ ቢራፔኔ ዎርቃፌ ኣስ።

² ዱሬኔ ማንቆ ኡባ ጎዳይ ሜዴስ፤ ሄሳን ኢስታ ናይካ ኢሲ ጊና።

³ ኣኬካንቻ ኣሲ ኢታ ቤኢዲ ኣታናስ ባቃቴስ፤ ጊዶ ኣቲን ኣኬካይ ፓጪዳ ኣሲ ሜቶን ጌሊዲ ቆሄቴስ።

⁴ ኣሽኬቴኔ ጎዳስ ያሺ፥ ዱሬቴ፥ ቦንቾኔ ዴኦ ኢሜስ።

⁵ ኢታ ኣሳ ኦጌን ኣጉንኔ ያርዴይ ዴስ፤ ጊዶ ኣቲን ባና ናጊዛ ኣሲ ሄሳፌ ሃኬስ።

⁶ ናይ ዋኒዲ ዴኣና ቤሲዛኮ ታማርሳ፤ ሂስቲኮ ኢዚ ጪሚዲካ ሄሳፌ ሃኬና።

⁷ ዱሬይ ማንቆ ሃሬስ፤ ታልኤ ኤኪዳዴይ ታልኤ ኢሚዳዴስ ኣይሌ ጊዴስ።

⁸ ኢታቴ ዜሪዛ ኣሲ ዋዬ ጫኬስ፤ ኢዛ ሃንቆ ጉፌይ ያና።

⁹ ኪያ ኣሲ ኣንጄቴስ፤ ባ ቁማፔካ ሂዬሳስ ኢሜስ።

¹⁰ ቂልጪዛ ኣስ ዲጋ፤ ሂስቲኮ ፓላማይ ኣታና፤ ኦሺኔ ጫሺካ ያና።

¹¹ ዎዚና ጌሻቴ ዶሲዛ ኣሲኔ ዶናፔ ሎኦ ሃሳይዛ ኣሳራ ካዎይ ላጌቴስ።

¹² ጎዳ ኣይፌቲ ኤራቴ ናጌቴስ፤ ጊዶ ኣቲን ዎርዳንቻታ ቃላ ሃዳ ኬሴስ።

¹³ ኣዛላ ኣሲ፥ «ጋሞይ ካሬን ዴስ፤ ታና ኦጌን ዎና» ጌስ።

¹⁴ ላይማ ማጫሳ ዶናይ ጪማ ኦላ ማላ፤ ጎዳይ ሃንቄቲዳ ኣሲ ኢዚን ዉሌስ።

¹⁵ ና ዎዚና ኤያቴ ባቂ ኦይኬስ፤ ጊዶ ኣቲን ሴራ ሾች ኢዛፔ ሃሴስ።

¹⁶ ባስ ኣቆታ ጉጃና ጊዲ ሂዬሳ ናቂዛይኔ ዱሬሲ ኢሞታ ኢሚዛይ ናይካ ማንቃና።

ኣ ኤራንቻ ዞሬ ሄ ታማታ

¹⁷ ኣ ኤራንቻ ዞሬ ዎዚናፔ ሲያ፤ ኔ ዎዚናይካ ታ ቲሚርቴኮ ሲሞ!

¹⁸ ኣይስ ጊኮ ኢስታ ኔ ዎዚናን ዎኮ፥ ኔ ዶናንካ ኢስታ ኡባ ሃሳይኮ ኔ ኡፋዬታና።

¹⁹ ኔ ኣማኖይ ጎዳን ጊዳና ማላ ታኒ ኔና ሃች ታማርሳይስ።

²⁰ ታኒ ኔሲ ዞሬኔ ኤራቴ ኢሚዛ ሎኦ ቲሚርቴታ ጻፋቤኪና?

²¹ ኔና ኪቲዳይሳስ ቤሲዛ ዛሮ ዛራና ማላ፥ ታኒ ኔና ቱማኔ ኣማኔቲዳ ቃላታ ታማርሳና ማላ ጊዴኔ?

²² ሂዬሳታሲ ኣይኮይካ ባይንዳ ጊሻስ ኢስታ ቦንቆፋ፤ ሺሎታንካ ሜቶታንቻታ ዋዪሶፓ።

²³ ኣይስ ጊኮ ጎዳይ ኢስታ ጊሻስ ሞቴታና፤ ኢስታ ቦንቂዳይታካ ኢዚ ቦንቃና።

²⁴ ሃንቄቲዛ ኣሳራ ላጌቶፓ፤ ሃንቄታናስ ኤሶቲዛ ኣሳራካ ዙፔቶፓ።

²⁵ ኔኒ ኢዛ ሃኖዛ ሜዜቲኮ፥ ጉዬፔ ኣጋናዉ ዳንዳያካ።

²⁶ ዋሴ ጌላናስ ጫቆፋ፤ ኣሳ ኣጮ ቃንጻናስ ዋሴ ጌሎፓ።

²⁷ ኔሲ ቃንጺዛዚ ይኮ፥ ኔ ኢቺዛ ኣልጋይካ ኣቶንታ ኤኬታና።

²⁸ ኔ ኣዋቲ ኤሲዳ ቤኒሶፌ ዲዛ ዛዋ ሾዶፋ።

²⁹ ባ ኦሶን ሎሂዳ ኣስ ቤያዲ? ኢዚ ካዎታስ ኦሲፔ ኣቲን ቤሶንታ ኣሳታስ ኦና።