ሌሚሶ ማጻፋ 21 - ጋሞ ማጻፋ

¹ ካዎ ዎዚናይ ጎዳ ኩሼን ዴስ፤ ኢዚ ኢዛ ዎዚና ጎጊዛ ሃ ማላ ባ ዶሲዳሶ ዛሬስ።

² ኣሲ ቢዛ ኦጌይ ኢዛዴስ ሱሬ ሚሳቴስ፤ ጎዳይ ጊዲኮ ዎዚና ፒልጊ ጼሌስ።

³ ያርሾፌ ቦላራ ጺሎኔ ሱሬ ፒርዳ ጎዳይ ዶሴስ።

⁴ ኦቶሮይኔ ሃላጫይ ኢታ ኣሳታ ቤሲዛ ማላታ፤ ሄሲካ ናጋራ።

⁵ ሚኖ ኦሳንቻ ሃልቾይ ዱሬሴስ፤ ጊዶ ኣቲን ቢቻሪሲ ማንቂሴስ።

⁶ ዎርዶቲዲ ዳጋሲዳ ኣቆታይ ይዛ ፔንታ ማላ፤ ቃሴካ ዎዛ ዎጺማዴ ማላ።

⁷ ኢታቲ ሱሬ ኦሶ ዶሶንታ ጊሻስ ኢታታ ኢስታ ማካላቴ ይሳና።

⁸ ሞራንቻቲ ጌላ ኦጌራ ሄሜቴቴስ፤ ጊዶ ኣቲን ጌሻቲ ሱሬ ሃኔቴስ።

⁹ ዱናማ ማቺራ ዳናፔ ኬ ዳራንቻን ኣቆይ ሎኦ።

¹⁰ ኢታቲ ኢታ ሚሽ ኦናስ ኬሂ ኣሞቴቴስ። ኢዛ ላጌይ ኢዛፔ ቃታ ዴሜና።

¹¹ ቂልጪዛዴይ ቃጻዬቲዳ ዎዴ ዎዚናይ ፓጪዳ ኣሲ ኣ ኤራቴ ታማሬስ፤ ዎዚናማ ኣሲካ ታማርዲ ኤራቴ ዴሜስ።

¹² ጺሎ ጾሳይ ኢታታሶን ኦሴቲዛ ኡባ ጫዲ ጼሌስ፤ ኢስታ ሙሌራ ይሴስ።

¹³ ማንቆ ዋሶ ሲያናፔ ጊዲ ባ ሃይ ቱጪኮ ኢዚካ ዋሲዛ ዎዴ ኣሊዛ ኣሲ ያና።

¹⁴ ጌማን ኢሚዛ ኢሞታይ ሃንቆ ዶሺሴስ፤ ኣፋላ ጊዶራ ኢሚዳ ማታኤይ ሱሌ ሃንቆ ኢርጺሴስ።

¹⁵ ሱሬ ፒርዳይ ጺሎታ ኡፋይሴስ፤ ኢታ ኦዛይታ ጊዲኮ ሺሮሴስ።

¹⁶ ኣኬካ ኦጌፔ ካሬ ኬዚዛ ኣሲ ሞይቲሌ ዱላታን ሼምፔስ።

¹⁷ ሃላጫ ዱስ ዳና ኮይዛ ኣሲ ማንቄስ፤ ኡሺኔ ሙስ ጎዲዛ ኣሲ ዱሬቴና።

¹⁸ ጺሎታ ቦላ ዪዳ ሜቶይ ኢታታ ቦላ ሲማና፤ ሱሬ ኣሳታ ቦላ ዪዳ ሜቶይ ኣማኔቶንታይታ ቦላ ጋካና።

¹⁹ ዎጫሚዛኔ ዶናቲዛ ማቺራ ዳናፔ ባዞን ዱሲ ኪያ።

²⁰ ዎዚናማ ኣሳ ሶን ማልኦ ቁማይኔ ዛይቴይ ዳጋቲ ዴስ፤ ጊዶ ኣቲን ኤያ ኣሲ ባስ ዲዛይሳ፥ ባይንዳ ኡባ ዲፒ ሂስቲ ሜስ።

²¹ ጺሎቴኔ ሲቆ ካሊዛዴይ ዴኦ፥ ዱሬቴኔ ቦንቾ ዴሜስ።

²² ዎዚናማ ኣሲ ዎልቃማ ኦላንቻቲ ዲዛ ካታማ ሜን ጌሌስ፤ ኢስቲ ኣማኔቲዳ ሚጻታካ ላሊ ዬጌስ።

²³ ባ ዶናኔ ባ ኢንጻርስ ናጊዛ ኣሲ ባና ቦሻፔ ናጌስ።

²⁴ ኦቶራንቻይኔ ሃላጫ ኣሲ ቂንቻ ጌቴቴስ፤ ኢዚ ኦቶሮ ሃኖ ሃኔስ።

²⁵ ኣዛላ ኣሞይ ዎስ፤ ኣይስ ጊኮ ኢዚ ኦናስ ኮዬና።

²⁶ ኣዛላይ ጋላስ ኩሜ ኣሞቲሼ ፔኤስ፤ ጺሎይ ጊዲኮ ኡዜቶንታ ኢሜስ።

²⁷ ኢታ ኣሳ ያርሾይ ሃራሴስ፤ ኢታ ቆፋን ሺሺዛ ጊዲኮ ኣይ ማላ ኢታ ጊዳኔ?

²⁸ ዎርዶ ማርካይ ያና፤ ጊዶ ኣቲን ቱሙ ማርካቲዛይ ሚኒዲ ዴኣና።

²⁹ ኢታ ኣሲ ቤሶንታዝ ጻላ ጻሌስ፤ ጊዶ ኣቲን ሱሬ ኣሲ ዩሺ ቆፔስ።

³⁰ ኣሲ ባ ኤራን፥ ኣኬካኒኔ ሃልቾን ጎዳራ ኤቄታናስ ዳንዳዬና።

³¹ ኦላ ጋላሳስ ፓራ ጊጊሴስ፤ ጊዶ ኣቲን ጾኖይ ጎዳፔ ዬስ።